«Պայքարելու եմ, որ ինչ-որ թատրոնում հանդես գամ»․ Էրմինա Զախարովան՝ առաջիկա ծրագրերի և իր մասնակցությամբ նոր հեռուստասերիալի մասին

Երիտասարդ դերասանուհի Էրմինա Զախարովան, որը հեռուստադիտողներին հայտնի դարձավ «Ոսկե դպրոց» հումորային նախագծից, այս տարի ավարտել է Թատերական ինստիտուտը։ Էրմինային շուտով հեռուստադիտողներին կներկայանա նոր ձևաչափում՝ 16 մասից բաղկացած հեռուստանովելում։

Tert.am Life-ի հետ զրույցում Էրմինան պատմեց ներկայիս զբաղվածության ու առաջիկա ծրագրերի մասին։ Երիտասարդ դերասանուհու խոսքով՝ չնայած ինստիտուտն ավարտել է լավ գնահատականներով, ավելի շատ կարևորում է այն գիտելիքները, որոնք հասցրել է ձեռք բերել սովորելու ընթացքում:

«Անկեղծ ասած, դիպլոմն ինձ համար որևէ բան չի փոխում։ Իմ կուրսի ղեկավարը՝ Հրաչյա Գասպարյանը, մեզ այնքան բան է տվել, որ մեր կուրսում հաստատ բոլորս ինչ-որ մի բանի կհասնենք։ Արդեն կարող եմ ասել, որ ձեռք եմ բերել մասնագիտություն, որով ուզում եմ զբաղվել ամբողջ կյանքում։ Ինձ չեմ պատկերացնում այդ մասնագիտությունից դուրս ինչ-որ տեղ աշխատելիս։ Պայքարելու եմ, որ ինչ-որ թատրոնում  հանդես գամ»,- ասաց նա։

Բացի թատրոնում հանդես գալու մեծ ցանկությունը, դերասանուհին իր մասնագիտության համար կարևորում է նաև հեռուստատեսության դերը․ «Բոլորս էլ հասկանում ենք, որ թատրոնն այն միջոցը չէ, որով հնարավոր կլինի նորմալ ապրել»։

Եթե թատրոնի հետ համագործակցելն Էրմինայի համար դեռ ցանկության մակարդակում է, հեռուստատեսությունների հետ համագործակցության տեսանկյունից նա նորություն ունի։ Այս ընթացքում Էրմինան համագործակցել է ռեժիսոր Հայկ Կբեյանի հետ։ Դերասանուհու խոսքով՝ «Ոսկե դպրոց» նախագծից հետո տարբեր ռեժիսորներ և հեռուստաընկերություններ նկատել են իրեն․ «Սեպտեմբերից «Առաջին ալիքով» կցուցադրվի 16 մասից բաղկացած «Վերջին ուսուցիչը» հեռուստանովելը, որտեղ ես ևս նկարահանվել եմ: Սա ինձ համար շատ կարևոր նախագիծ է, աշխատանքները մի քիչ այլ են։ Օրինակ՝ էմոցիոնալ առումով ռեժիսոր Հայկ Կբեյանը, երբեմն․ նկատողություն էր անում ու ասում, որ պետք չէ թատերական խաղալ, պետք է ավելի քիչ էմոցիաներ ցույց տալ»։

Բացի սպասվող նոր աշխատանքը, դերասանուհին այլ զբաղվածություն ներկայումս չունի։ «Դեռ վայելում եմ արձակուրդս: Հեռուստաընկերություններում էլ, կարծում եմ, արձակուրդային շրջան է։ Եթե այս ընթացքում  լինի հումորային նախագծի առաջարկ, որն ինձ կգրավի, իհարկե կլինեմ նաև հումորային ժանրում, բայց ավելի շատ ցանկանում եմ լինել հումորայինից դուրս որևէ նախագծում՝ կարող է լինել հեռուստասերիալ, լիամետրաժ գեղարվեստական ֆիլմ»,- ասաց Էրմինան։

Դերասանուհու խոսքով՝ այս ընթացքում մեկ անգամ  հասցրել է հանգստի մեկնել ընտանիքի հետ։ Ե՛վ պասիվ, և՛ ակտիվ հանգստի սիրահար դերասանուհին ներկայումս պլանավորում է ամառային հաջորդ հանգիստը․ «Դեռ մտածում եմ, թե այս տարի ինչպիսի հանգիստ կկարողանամ կազմակերպել, այդ ամենը կախված է նաև ընտանիքիս անդամներից»։