«Հասկացանք, որ եթե հիմա Հայաստանում չլինի ՈւՀԱ-ի վերածնունդ, մենք կկորցնենք բոլոր հնարավորությունները»․ Հայաստանում կրկին անցկացվել է ՈւՀԱ-ի պաշտոնական լիգա

Հայաստանում կրկին անցկացվել է ՈւՀԱ պաշտոնական լիգա։ ՈւՀԱ հայաստանյան լիգայի տնօրեն Դավիթ Սարգսյանի խոսքով՝ մեր երկրում այն առաջին անգամ է լինելու պաշտոնական կարգավիճակով, թեև Հայաստանում անցկացվել են «ՈՒՀԱ» առաջնություններ և 20 տարի առաջ «Նոր հայեր» թիմը մեծ հաջողություն է ունեցել: Tert.am Life-ի հետ զրույցում Դավիթ Սարգսյանը խոսել է «Ուրախների և հնարավիտների ակումբը» վերստեղծելու մասին:

«ՈւՀԱ-ի միջազգային պաշտոնական լիգայի ղեկավար Ալեքսանդր Մասլյակովի և մեր կազմակերպչական թիմի հետ եկանք եզրահանգման, որ եթե հիմա Հայաստանում չլինի ՈւՀԱ-ի վերածնունդ, չլինի նոր շարժում, մենք կկորցնենք բոլոր հնարավորությունները, որոնք ունեցել ենք մինչև այս։ Շատ դեպքեր են եղել, երբ երիտասարդները հավաքվել են, սակայն չեն ունեցել ուղղորդում, խմբագիրներ, որոնք կարող էին դաստիարակել նրանց։ Բոլորս եկանք եզրահանգման, որ առանց պաշտոնական լիգայի չենք կարող Հայաստանում ունենալ ՈւՀԱ-ի ապագա, հատկապես, որ կան տաղանդավոր երիտասարդներ»,- ասաց նա:

ՈւՀԱ-ի հայաստանյան պաշտոնական լիգայի բացման արարողությունը չնայած անվանում են մրցութային, հաջորդ փուլում ելույթ ունենալու հնարավորություն ստացել են բոլոր մասնակիցները՝ 12 թիմ, որոնց հիմնական կազմում են երիտասարդներ Հայաստանի տարբեր բուհերից, Արցախից, թիմեր Սոչիից, Նիժնի Նովգորոդից, Մոսկվայից, Աստրախանից։  

«Բացման արարողությանը որոշեցինք ժյուրիին փոխարինել փորձագետներով։ Այսինքն՝ մարդիկ, որոնք կարող են խիստ չդատել, տալ հնարավորություն, քանի որ բեմում կային երիտասարդներ, որոնք առաջին անգամ էին ելույթ ունենում նման դահլիճում։ Ժյուրիի աթոռին նստած էինք ես, Դմիտրի Բուշուևը և Women’s Club-ից Մաշան, որը նույնպես ժամանակին խաղացել է ՈւՀԱ-ում, շատ լավ տիրապետում է ռուսերենի և հասկանում է ՈւՀԱ-ի հումորը»,- ասաց Դավիթ Սարգսյանը։

Հիմնական ժյուրիի անդամների մասին խոսելով՝ Դավթից հետաքրքրվեցինք՝ արդյոք ժյուրիի կազմում կլինեն  ՈւՀԱ-ից հայտնի հայ դեմքեր՝ «Նոր հայեր»-ի թիմից։ «Որպես ժյուրի՝ շատերին ենք հրավիրել, սակայն մարդիկ այլ ծրագրեր ունեին, ասացին, որ չեն կարող, եղան մարդիկ, որոնք ուղղակի չցանկացան։ Ինչ վերաբերում է Գարիկ Մարտիրոսյանին՝ նրա հետ անձամբ եմ խոսել, նա ТНТ-ի կողմից արգելք ունի հանդես գալ ՈւՀԱ-ի ապրանքանիշի ներքո, այնպես որ, մեկ տարի նրան հաստատ չենք տեսնի ժյուրիի կազմում»,- ասաց Դավիթը։ 

Դավիթ Սարգսյանը նշեց, որ իրենք հրավիրել են ՈւՀԱ բարձրագույն լիգայի գործող չեմպիոններին, որոնք անձամբ կպատրաստեն կադրերի և կաշխատեն հայ երիտասարդների հետ։ Հաշվի առնելով փաստը, որ առավել հեշտ է ծիծաղեցնել 18+ հումորների միշոցով՝ հետաքրքրվեցինք գրաքննության և հումորների թեմատիկ սահմանափակումների, թույլատրելիի և անթույլատրելիի մասին․ «Մեզ մոտ գրաքննությունը բավականին խիստ է դրված, կարծում եմ, դրա հետևանքով մենք որևէ բան չենք կորցնի։ Հակառակը՝ դրանով մենք մարդկանց օգնում ենք լինել ինտելեկտուալ և զարգանալ հումորի դաշտում։ Ինչ վերաբերում է քաղաքականությանը, 18+-ին և, առհասարակ, նման հումորներին, դրանք հեշտ են, քանի որ չեն պահանջում գիտելիքների բազա, ինտելեկտի առկայություն։ Որպեսզի առանց այս ամենի քո հոմորով լինես և՛ հասկանալի, և՛ սիրելի հասարակության կողմից, պետք է կարողանաս ինքդ քեզ վրա աշխատել, կարդալ, աճել։ Մեր դեպքում այդ սահմանափակումները բավականին խիստ են դրված, իհարկե, լավ իմաստով։ Մենք օգնում ենք, տալիս ենք հնարավորություն, որպեսզի մարդիկ հումորի տեսանկյունից զարգանան, ոչ թե ստեղծագործական ու բարոյական քայքայում լինի։ Մեզ թվում է՝ դա ինչ-որ չափով հաջողել ենք»։

Նրա խոսքով՝ իրենց լիգայում տիրում է հայկական ավանդական ջերմ մթնոլորտ․ «Կա գաղափար, որ մենք բոլորս անում ենք մի գործ, որը ծառայելու է ապագային։ Մասնակիցները ևս հասել են դրան՝ իրար օգնում ենք, աջակցում, համագործակցում»։  

Ինչ վերաբերում է ՈւՀԱ-ի հայաստանյան լիգայի լեզվին, Դավթի խոսքով, իրենք որևէ սահմանափակում չեն դրել, չնայած կարծում են՝ ՈւՀԱ լեզուն, ամեն դեպքում, ռուսերենն է: «Ես ինքս հայ եմ, հայրենասեր եմ, տիրապետում եմ հայերենին, սակայն ինձ դուր եկավ այն, որ մեր երիտասարդները, պատանիները շատ զարգացած են՝ թե՛ ռուսերենին, թե՛ հայերենին տիրապետելու տեսանկյունից։ Սա նշում եմ, որովհետև այն թիմերը, որոնց ներկայացրած համարները ռուսերենով էին, առավել ծիծաղելի ստացվեցին, առավել ինտելեկտուալ։ Այսինքն՝ մարդիկ գիտեն իրենց վրա աշխատել և հասկանում են, որ ՈւՀԱ-ն ռուսերենի խաղ է։ Կարծում եմ, երբ ՈւՀԱ-ից ռուսերենը հանում ես, այն դառնում է հումորային այլ արտադրանք։ Մենք տվել ենք հնարավորություն առանց լեզվի խտրականության, սակայն եթե ապագայում գնանք այս ոլորտում սերունդներ տալու ուղղությամբ, մեզ պետք կլինի սովորել, խոսել, տրամաբանորեն մտածել և ստեղծագործել ռուսերենով։ Մենք բոլորս էլ ցանկանում ենք, որ բարձրագույն լիգա անցնի հայկական թիմ, սակայն ինչպե՞ս, եթե չխոսեն ռուսերեն, այնտեղ նրանց չեն հասկանա»,- ասաց նա:

Ներկայումս ՈւՀԱ-ի հայաստանյան լիգայի շրջանակում թիմերի հետ աշխատում է խմբագրական կազմ, որի անդամներն են Դմիտրի Բուշուևը, Նիկիտա Տրունովը, Կարեն Սահակյանը՝ Չարենցը, Անդրանիկ Սարգսյանը և Գոռ Բարսեղյանը։  

Աշնանը Հայաստան է ժամանելու ՈւՀԱ-ի ղեկավար Ալեքսանդր Մասլյակովը, հենց այդ շրջանում էլ տեղի կունենա հայաստանյան լիգայի հաջորդ փուլը։