Գեղեցկուհու տիտղոսը նվաճած Լիանա Ոսկերչյանը 2 տարի առաջ մասնակցել է «Միսս Արմենիային», բայց մրցանակ չի ստացել․ արխիվային լուսանկարներ

Tert.am Life-ն իր ընթերցողներին ներկայացրել է «Միսս աշխարհ Արմենիա» մրցույթի մանրամասներն ու հաղթողին: Tert.am Life-ի ուշադրությունից չի վրիպել 20-ամյա Լիանա Ոսկերչյանը, որը դարձավ գեղեցկուհու նոր տիտղոսակիրն ու Հայաստանը կներկայացնի «Միսս աշխարհ» հեղինակավոր մրցույթում, երկրորդ անգամ է մասնակցում մրցույթին:

Լիանան մասնակցել է «Միսս Արմենիա 2017»-ին, որտեղ հաղթեց Լիլի Սարգսյանը, իսկ Լիանան իր տեղը գտավ լավագույն տասնյակում: Ասում է՝ այդ ժամանակ չէր պատկերացնում, թե ուր է եկել, 24 մասնակցի կազմում հայտնվելն արդն առաջընթաց էր իր համար: 2 տարի անց Լիանան համարում է, որ մրցույթին մասնակցելու որոշումը կայացրել է շատ ավելի գիտակցված և պատրաստված:

«Կարծում եմ՝ հաղթանակիս բանալին թաքնված էր առաջին պարտության մեջ: Գուցե, սա շատ լավ օրինակ լինի աղջիկների, առհասարակ, բոլորի համար, որ երբեք պետք չէ հիասթափվել: Միշտ պետք է փորձել ու չհրաժարվել քո նպատակից: Առաջին մասնակցությանս ժամանակ 18 տարեկան էի, ոչ բեմում լինելու, ոչ էլ տեսախցիկի հետ աշխատելու փորձ չունեի, մոդելինգով չէի զբավել: Այդ ամենն ինձ համար կարծես հեքիաթ լիներ, անսպասելի էր, որ, առհասարակ, անցա քասթինգն ու հայտնվեցի մասնակից  աղջիկների կողքին: Նույնիսկ պայմանագիրը ստորագրելիս երկմտում էի՝ սա իմ տե՞ղն է, թե ոչ, հանկարծ բեմում չսխալվեմ, խայտառակ չլինեմ: Հիմա հասկանում եմ, որ առաջին անգամ դեռ պատրաստ չէի այդ ամենին: Չէի հասկանում, թե որտեղ եմ ու ինչի համար: Դա ավելի շատ մանկության երազանքի պես մի բան էր, որը կատարվել էր ու վայելում էի»,- ասաց նա ու հավելեց, որ երկրորդ մասնակցությունը շատ ավելի պատրաստված էր: Նրա խոսքով՝ որոշումը հանպատրաստից է կայացրել, բայց գիտակցված:

«Իմ մասնակցության հաջորդ տարում չեմ մտածել կրկին մասնակցելու մասին: Նախ՝ առաջին տարվա կրքերը չէին մարել, քննադատությունները շատ էին, բացի այդ, իմ կյանքում այնպիսի փուլ էր, որ այդ ամենի համար ժամանակ չունեի: Մտքովս էլ չէր անցել կրկին մասնակցել, ավելին, այդ ժամանակ չէի էլ մտածում, որ կգա մի օր, երբ կորոշեմ կրկին մասնակցել մրցույթին: Հանպատրաստից որոշեցի հայտ լրացնել, ոչ ոքի չէի ասել, նույնիսկ մայրիկիս: Քասթինգի ժամանակ Գոհար Հարությունյանն ասաց, որ անցնում եմ քասթինգը, որովհետև նախորդ անգամ էլ լավագույն տասնյակում էի, բայց միայն մայրիկիս ասացի, որ նորից եմ մասնակցել ու անցել քասթինգը, նա շատ ուրախացավ: Ծանոթներիս ու ընկերներիս ոչինչ չէի ասել: Այդ մասին սկսեցի խոսել միայն այն ժամանակ, երբ պաշտոնապես ներկայացվեց մասնակիցների անունների ցանկը: Ընկերներս ուրախ էին, որ ևս մեկ անգամ մասնակցում եմ մրցույթին»,- պատմեց նա:

Անդրադառնալով հարցին, թե կոնկրետ ինչ շտկումներ է արել այս 2 տարվա ընթացքում, Լիանան պատասխանեց, որ այս ընթացքում մասնակցել է նկարահանումների, ցուցադրությունների և փորձ է ձեռք բերել: «Կարծում եմ՝ հիմա ավելի լավ էի կարողանում ներկայացնել ինձ: Աշխատել եմ ինձ վրա, դեֆիլեի ուղղությամբ: Յուրաքանչյուր ցուցադրության կամ նկարահանման մասնակցելիս ինչ-որ բան եմ քաղել: Ցուցադրություններից հետո տեսանյութերը նայում էի, փորձում էի շտկել սխալներս: Մրցույթի շրջանակում էլ դեֆիլեի դասեր անցանք Նարե Զաքարյանի մոտ: Դա ևս շատ մեծ դեր ունեցավ, որ կատարելագործեմ քայլվածքս: Տարիքը, փորձը իրենց ազդոեցությունն ունեն»,- ասաց նա:

Այս ընթացքում Լիանան  հաճախել է նաև ֆիթնեսի, թեև նշեց, որ մարզասրահ վաղուց է հաճախում: Նրա խոսքով՝ իր հասակը 1.78 սմ է քաշը՝ 60 կգ: Գեղեցկուհու տիտղոսակիրը նշեց, որ հատուկ դիետաներ չի պահում, բայց փորձում է հնարավորինս առողջ սնվել:

Լիանայի փոխանցմամբ՝ հաղթանակի պահին շատ հուզված էր, հիմա էլ  դժվարանում է նկարագրել զգացողությունները: Նա նշեց, որ հիմա պատրաստվում է «Միսս աշխարհ» մրցույթին լավագույնս ներկայանալու համար․ «Ունեմ շատ անելիքներ, ֆոտոշարքեր: Պետք է լավագույնս ներկայացնեմ մեր երկիրը: Հուսով եմ՝ բոլորի հույսերը կարդարացնեմ»:

Իր հաղթանակը նա նշել է ամենամտերիմ մարդկանց հետ: Նա  ասաց, որ իր ամենահարազատ մարդիկ դահլիճում էին: Մրցույթի նախորդ օրն էլ հաճելի անակնկալ են մատուցել իրեն: «Մրցույթից մեկ օր առաջ մորաքրոջս տղան անակնկալ մատուցեց ինձ ու ժամանեց Հայաստան: Փորձից  հետո ուշ ժամի վերադարձա տուն, զարմացա, թե ինչու է մեր տան դուռը բաց, մեկ էլ տեսա մորաքրոջս տղային: Շատ-շատ էի ուրախացել: Նա, քույրիկս, մայրիկս ու ամենահարազատ ընկերներս դահլիճում էին: Հաղթանակից հետո բոլորով գնացինք այն նշելու»,- պատմեց Լիանան ու հավելեց, որ հիմա Հանքավանում է՝ մի քանի օր հանգստանալու և մրցույթից հետո ուժերը վերականգնելու։ Նա նշեց, որ մի քանի օրից կվերադառնա և նոր թափով կնախապատրաստվի «Միսս աշխարհին»։

Լիանայի ելույթը «Միսս Արմենիա 2017»-ին