«Զարմանում են, որ իրականում ավելի երիտասարդ եմ»․ «Մոր խոստումից» Աննան՝ էկրանից մեծ երևալու, դստեր ծննդից հետո փոխված կյանքի և ամուսնու հետ 12 տարվա տարիքային տարբերության մասին

13:30 • 23.07.19

Շոուբիզնես

Դերասանուհի Օֆելյա Զաքարյանն այս շրջանում ներկայանում է «Մոր խոստումը» հեռուստասերիալի շրջանակում՝ մարմնավորելով գլխավոր հերոսուհուն՝ Աննային: 37 տարին դեռ չբոլորած Օֆելյայի համար 45-ն անց կնոջ մարմնավորելը բարդ չէր: Այս դեպքում ամենակարևորը մոր հոգեվիճակը ճիշտ վերարտադրելն էր, ինչում իրեն օգնում է մայրիկ լինելը:

Tert.am Life-ը դերասանուհու հետ զրուցել է ինչպես հեռուստասերիալի, այնպես էլ անձնական կյանքի՝ դստեր ու ամուսնու մասին:

Իմ մասնագիտություններն իրար օգնում են

Օֆելյան առաջին մասնագիտությամբ ռեժիսոր է, թեև պարբերաբար ներկայանում է նաև որպես դերասանուհի, խաղացել է «Որոգայթ», «Եդեմի գաղտնիքը», «Անծանոթը», «Խաչվող հետքեր» հեռուստասերիալներում: Նա նկատեց, որ իր մասնագիտություններն իրար օգնում են:

«Դերասանի աշխատանքն ինձ համար, կարծես, հոբբի լինի: Ռեժիսորի մասնագիտությունն ինձ օգնում է որպես դերասանուհու, դերասանի մասնագիտությունը՝ որպես ռեժիսորի: Երկու դեպքում էլ հակառակ կողմից նայելու հնարավորություն եմ ունենում»,- ասաց Օֆելյան ու հավելեց, որ ավարտել է նաև Գեղարվեստի ակադեմիան: Նրա խոսքով՝ նկարչուհու մասնագիտությունը ևս իրեն օգնում թե՛ ռեժիսուրայի, թե՛ դերասանական աշխատանքի մեջ:

Եթե ես մայր չլինեի, գուցե, կերպարս այսքան հաջող չստացվեր

Պրոդյուսեր Ելենա Արշակյանը ավելի վաղ Tert.am Life-ին տված հարցազրույցում ասել էր, որ շատ կարևորում Աննայի դերում տեսնել դերասանուհու, որը գիտի՝ ինչ է մայրիկ լինելը: Օֆելյան ևս կարծում է, որ սա շատ կարևոր փաստ էր՝ հերոսուհուն ավելի ճիշտ ներկայացնելու համար:

«Երբ եկա քասթինգին, Ելենան ինձ ասաց, որ գլխավոր դերի համար է ուզում փորձել: Հետո զրուցեցինք իր հետ, պատմեցի, որ նախկինում խաղացել եմ մոր կերպար, բայց երբեք չեմ հասկացել, թե դա ինչ է: Դա ավելի շատ խաղ է եղել՝ պատկերացնելով սեր դեպի ծնողը, հարազատ մարդը, սակայն հիմա, երբ երեխա ունեմ, շատ լավ հասկանում եմ, որ այդ սերը ոչնչով չես կարող փոխարինել: Ելենան էլ ասաց, որ այս դերի համար հենց մայրիկ-դերասանուհու էր ուզում։ Կարծում եմ, եթե ես մայր չլինեի, գուցե, կերպարս այսքան հաջող չստացվեր,- ասաց Օֆելյան ու հավելեց, որ սա իր առաջին աշխատանքն է Ելենայի հետ: -Ֆիլմի հաջողությունը, իմ կերպարի բացումը, այն, որ ես կարողացա ճիշտ ընկալել և ներկայացնել կերպարս, կախված է նաև թիմից՝ Ելենայից, Քաջայրից: Իրենք ինձ ճիշտ են տվել խնդիրը»:

Դերասանուհին նկատեց, որ հիմա իրեն ավելի հաճախ են մայրիկի կերպար առաջարկում: «Երևի կերպարը հաջողվել է, որովհետև ինձ վերջերս շատ են տեսնում հենց մոր դերում: Վերջերս մայրիկի մասին տեսահոլովակում էլ նկարահանվեցի: Պրոդյուսերն ասում էր՝ հենց երգը լսեցի, քեզ մտաբերեցի»:

Իմ տարիքից մեծ երևալուց չեմ վախենում

Լսարանը դերասաններին ընկալում է այնպես, ինչպես տեսնում է էկրաններից՝ բարի չար, տարիքով կա երիտասարդ: Սեպտեմբերին Օֆելյան կդառնա 37 տարեկան, սակայն հեռուստասերիալում մարմնավորում է 45-ն անց կնոջ: Փաստը, որ իրեն ավելի մեծ են պատկերացնում, Օֆելյային չի խանգարում:

«Քանի որ ավելի երիտասարդ եմ, կերպարի համար ինձ մեծացնում են՝ թե՛ սանրվածքով, թե՛ դիմահարդարմամբ, թե՛ հագուստով: Երբ փողոցում ինձ տեսնում են, մի պահ նայում են, հետո ասում՝ վայ, Աննան: Զարմանում են, որ իրականում երիտասարդ եմ, բացատրում եմ, որ կերպարս է թելադրում, որ ֆիլմում այդպիսի գրիմով ներկայանամ: Ինձ դա չի խանգարում»,- ասաց նա ու հավելեց, որ ավելի մեծ տարիքի կնոջ մարմնավորելն իրենից բարդություն չի ներկայացնում, քանի որ այս դեպքում առաջնային նոր հոգեվիճակը ճիշտ ներկայացնելն է:

Աղջիկս դարձավ մեր կյանքի Շողերը

Օֆելյան ամուսնացած է արդեն 3 տարի: Դուստրը՝ Շողերը, 1 տարեկան 9 ամսական է: Փոքրիկն ամբողջությամբ փոխել է մայրիկի կյանքը: Անվան ընտրությունը ծնողները պատահական չեն արել՝ մայրիկն ասում է՝ դուստրը դարձավ իրենց կյանքի Շողերը նաև բառի բուն իմաստով:

Օֆելյան ուշ տարիքում է ամուսնացել և մայրիկ դարձել: «Ես միշտ ժամանակ չեմ ունեցել, 3 ինստիտուտ եմ ավարտել, աշխատել եմ: Մեծ տարիքում ավելի հասուն ես որոշում կայացնում, բայց երբ պուճուրդ ծնվում է, հասկանում ես, որ ուշացել ես: Կուզեի ավելի երիտասարդ տարիքում ինքը լիներ իմ կյանքում: Մինչև երեխայիդ ծնունդն ինչ էլ անես, կյանքդ դատարկ է, երբ նա արդեն կա, կյանքդ իմաստավորվում է: Դու հասկանում ես՝ հանուն ինչի ես անում: Արդեն մենակ չես ու միայն քո առաջ չես պատասխանատու: Կա մի փոքր էակ, որին Աստված տվել է քեզ, պետք է իրեն նվիրվես: Երեխա պահելն աշխարհի ամենաբարդ, բայց և ամենալավ բանն է: Կարծում եմ՝ կնոջ առաքելությունը հենց մայրանալու մեջ է,- ասաց դերասանուհին, որը ցանկություն ունի երկրորդ անգամ մայրանալ: -Ես ուզում եմ էլի երեխաներ ունենալ: Սեռի նախընտրություն ոչ ես, ոչ էլ ամուսինս չունենք: Ինչպես Աստված կամենա, այնպես էլ կլինի: Ամեն դեպքում, խոսքը դեռ այս էտապի մասին չէ»:

Ժամանակի մեծ մասը Օֆելյան անցկացնում է դստեր հետ: Նրա խոսքով՝ շաբաթական առավելագույնը 2 նկարահանման օր է ունենում: Այդ օրերին երեխային թողնում է մայրիկի խնամքին․ «Նա մեծ սիրով մնում է մայրիկիս մոտ և խնդիր չի առաջանում: Մյուս դեպքերում ժամանակիս մեծ մասն իր հետ եմ անցկացնում: Սիրում ենք խաղալ իրար հետ, զբոսանքների գնալ: Աղջիկս շատ է սիրում մուլտֆիլմեր նայել, ես էլ օգտվում եմ առիթից ու այդ ընթացքում այլ գործեր անում»:

Էկրանից մայրիկին տեսնելիս Շողերն առաջ ուրախանում էր, հիմա՝ ոչ: Մայրիկին էկրանից այն կողմ լացելիս տեսնելը նրան ստիպել է այլևս չնայել սերիալը․ «Սկզբում հենց լսում էր անոնսի երաժշտությունը՝ անկախ նրանից՝ կադրում ինձ կտեսնե՞ր, թե՞ ոչ, գոռում էր՝ մամա: Սակայն ես սկսեցի ավելի դրամատիկ պահեր խաղալ, լացել, և նա սկսեց չնայել սերիալը: Իրեն դուր չէր գալիս, որ ես անընդհատ տխուր եմ, տառապում եմ»:

Ամուսինս ավելի հասուն է, ես՝ ավելի թեթև

Օֆելյայի ամուսինը՝ Դավիթը, երկար տարիներ աշխատել է հեռուստատեսությունում՝ որպես ռեժիսոր, սցենարիստ, պրոդյուսեր, հիմա այլ բնագավառում է աշխատում: Զույգի միջև 12 տարվա տարբերություն կա: Օֆելյան նկատեց, որ դա արդեն մի սերունդ է, և հետաքրքրությունները հաճախ տարբեր են լինում, բայց դա իրենց չի խանգարում: Իր բնորոշմամբ՝ ավելի հասուն դատող ամուսնուց դերասանուհին միշտ սովորում է:

«Ամուսինս ավելի հասուն է, ես՝ ավելի թեթև: Թե՛ ճաշակի, թե՛ երաժշտության, թե՛ ֆիլմերի առումով տարբեր ենք, բայց դա հակասություն չի առաջացնում: Ես իրենց շատ բան եմ սովորում: Մեր ընտանիքի մեծն է՝ շատ ավելի կարդացած, ավելի շատ բան գիտի, ես ամեն ինչ իրեն հարցնում եմ, խորհուրդ եմ լսում, որովհետև փորձառու է»,- ընդգծեց նա:

«Մոր խոստումը» նախագիծն Օֆելյային ավելի մեծ հայտնիություն բերեց: Կողմնակի ուշադրությունից նա չի սրտնեղում, իսկ ահա ամուսնուն դա դուր չի գալիս: Դա հաշվի առնելով՝ ամուսնու լուսանկարն էլ չցանկացավ հրապարակել:

«Մարդկանց դրական վերաբերմունքն ինձ դրական տրամադրություն ու լիցքեր է հաղորդում, իմպուլս է տալիս, որ դերս ավելի լավ տանեմ: Հաճախ, մարդիկ ինձ հետ շատ ջերմ խոսում են, կարծես 100 տարի ճանաչեն ինձ, ես նույն կերպ պատասխանում եմ և մտերմիկ զրույց ենք ունենում: Ես հայտնիությունը չեմ կարևորում, բայց չի եղել պահ, երբ դա ինձ խանգարի կամ փորձեմ թաքնվել։ Ամուսնուս դա մի փոքր նյարդայնացնում է, կողմնակի ուշադրությունը ձգված է պահում: Երբ որոշեցի նկարաhանվել սերիալում, նա դեմ էր: Ավելի շատ սիրում է, երբ ես ռեժիսուրայով եմ զբաղվում»,- եզրափակեց Օֆելյան:

Հեղինակ Ամալյա Հովհաննիսյան