«Բումերանգ» ներկայացման պրեմիերան, փոքրիկ միջադեպն ու հայտնի հյուրերը

2018 թվականի մայիսին Հայաստանում տեղի ունեցած քաղաքական իրադարձություններն ու դրանց հաջորդած դեպքերի զարգացումների հիման վրա գրված պիեսը՝ «Բումերանգը» երեկ հանձնվեց հանդիսատեսի դատին:

Tert.am Life-ը ներկա է եղել ռեժիսոր Սեդրակ Գոջամանյանի և սցենարիստ, պրոդյուսեր Արմեն Վարդանյանի  ներկայացման պրեմիերային, ֆիքսել հետաքրքիր դրվագներն ու զրուցել ռեժիսորի հետ:

Լևոն Հարությունյանի, Լուիզա Ներսիսյանի, Անդրանիկ Հարությունյանի, Զիրոյանի, Ժաննա Հովակիմյանի և Միլենա Ավանեսյանի մասնակցությամբ ներկայացման հիմքում բումերանգի սկզբունքն ու «թիթեռնիկի էֆեկտն» է: Այս մասին դերասանները խոսում են բեմից: Մինչ երբեմնի կաշառակեր օլիգարխն իր սիրուհու համար փշերը մաքրած ձուկ է պատվիրում, սիրուհին նրան դավաճանում է հաշվապահի հետ, իսկ որդին ավելի է տարվում թմրանյութերով: Հանդերձյալ կյանքի պաշտոնական ներկայացուցիչը, սակայն, գեղեցիկ ու սեքսուալ կնոջ կերպարով հայտնվում ու փոխում է պիեսի հերոսների կյանքը:

Չնայած սցենարիստը խուսափել էր իրական կյանքից հերոսներ բերել պիես, մտացածին հերոսների երկխոսությունները համեմված էին քաղաքական դաշտում տարածում գտած և հումորի վերածված մի շարք բառերով ու արտահայտություններով:

Ավելի վաղ Tert.am Life-ի հետ զրույցում ներկայացման ստեղծագործական կազմը՝ ռեժիսորը, սցենարիստն ու դերասանները, հույս էին հայտնել, որ հանդիսատեսը դահլիճը կլքի մտածմունքներով, բայց դրական տրամադրությամբ:

«Հակասականությունից չենք կարող խուսափել, որովհետև որքան մարդ, այդքան ճաշակ ու արձագանք: Կարծում եմ՝ հանդիսատեսին դուր եկավ՝ հաշվի առնելով ներկայացման ընթացքում պարբերաբար հնչող ծափողջույնները: Ընդհանուր առմամբ՝ հանդիսատեսը բավականին բուռն արձագանքեց, ծիծաղեց, ինչն էլ ինձ հիմք է տալիս կարծելու, որ դրական տպավորություններով են դահլիճից դուրս գալիս: Ինքս դեռ շատ էմոցիոնալ եմ և պետք է մարսեմ այն, ինչ այսօր կատարվեց: Տեխնիկական տեսանկյունից դեռ շատ շտկումներ կան, բայց այդ ամենը միշտ ժամանակ է պահանջում»,- ասաց ռեժիսոր Սեդրակ Գոջամանյանը։

Ռեժիսորի խոսքով՝ չնայած ներկայացման դրամատուրգիան թույլ չէր տալիս, դերասանները, ամեն դեպքում փոքրիկ իմպրովիզներ են արել․ «Իմպրովիզներից ևս չխուսափեցինք, ինչը սպասելի էր, քանի որ բեմին մեծ մասամբ իմպրովիզատոր դերասաններ են՝ մարդիկ, որոնք սքեթչերում և ինտերակտիվ ներկայացումներում են խաղում»։

Սեդրակ Գոջամանյանը ծիծաղելով անդրադարձավ ներկայացման ընթացքում տեղի ունեցած փոքրիկ միջադեպին, երբ Զիրոյանի մարմնավորած կերպարը՝ օլիգարխի որդի Համլետը, առաջարկեց սինքրոն անել հեղափոխության հայտնի «դմփ-դմփ-հու» ծափերը, սակայն հանդիսատեսն այդպես էլ չկարողացավ տեմպի մեջ ընկնել: «Հեղափոխությունը կրկին մուտք գործեց դահլիճ. էմոցիաները և հայտնի ծափերը, կարծես, ինչ-որ չափով մոռացված էին և մարդիկ քիչ, թե շատ վերհիշեցին։ Հայտնի ծափերի՝ «դմփ-դմփ-հու»-երի ժամանակ սխալ տեղ էին ծափ տալիս, բայց դա էլ ինձ դուր եկավ, որովհետև ներկայացումն ինտերակտիվ է և հանդիսատեսի մասնակցությունը յուրահատուկ «դրայվ» է ապահովում»,- ասաց ռեժիսորը՝ ավելացնելով, որ դերասանների խաղի մասին խոսելն ավելորդ է համարում, քանի որ նրանց խաղից անչափ գոհ է:

Լուսանկարները՝ Էլեն Գասպարյանի