«Վիտամինցի» Վանն ու Էմմա Հակոբյանն ամուսնացել են․ Էմմայի տարբերվող հարսի կերպարն ու օրվա հետաքրքիր պահերը

Պարզ հարսի զգեստ, փոքրիկ, բայց մտերմիկ ու ուրախ խնջույք և շատ սեր․ այսպես էին պատկերացնում, այսպես էլ իրենց հարսանիքն անցկացրեցին «Վիտամինցի» Վանն ու հաղորդավարուհի Էմմա Հակոբյանը: 4 տարի ընկերություն անելուց հետո նրանք պարզապես որոշել են միասին ապրել, իսկ եկեղեցի կգնան, երբ բալիկներ ունենան:

Էմման Tert.am Life-ին է տրամադրել օրվա լուսանկարներն ու պատմել մանրամասները:

«Ես և Վանը միասին ենք արդեն 4 տարի: Գարնանը նշանվելուց ի վեր, գրեթե, ամեն օր խոսում էինք ամուսնության մասին: Երևի, հենց դա էր պատճառը, որ որոշեցինք չձգձգել, երկար չպատրաստվել և պարզապես միասին լինել: Հասկացանք, որ ժամանակը եկել է, ցանկանում ենք միասին ապրել, առավել ևս, որ օրվա մեծ մասը միասին ենք անցկացնում: Մեծ հարսանիքին երկուսս էլ դեմ էինք, այդ իսկ պատճառով որոշեցինք նման փոքրիկ միջոցառում կազմակերպել: Հարսանեկան ծիսակատարություններ ևս չեն եղել, պարզապես փոքրիկ հավաքույթ ենք արել»,- պատմեց Էմման ու հավելեց, որ միջոցառմանը ներկա է եղել մոտ 30 հոգի՝ միայն բարեկամներ ու շատ քիչ ընկերներ:

Զույգն ամուսնությունը գրանցել է զագսում, իսկ պսակադրության արարողություն չի ունեցել․  «Զագս գնացինք 10 օր շուտ, գրանցվեցինք և 10 օրը լրանալուն պես ստացանք վկայականն ու անձնագրի կնիքը: Եկեղեցի որոշել ենք մտնել երեխաների հետ: Իմ ծնողները ևս պսակադրվել են իմ ու եղբորս մկրտության օրը, այդ օրն իմ հուշերում այնքան է տպավորվել, այդ ամենի մեջ գեղեցիկ խորհուրդ կար: Այդ իսկ պատճառով մենք էլ որոշեցինք, որ տոնի այդ մասին մեր երեխաները ևս պետք է ներկա լինեն»:

Հարսի զգեստն ընտրելիս էլ Էմման առաջնորդվել է պարզության սկզբունքով: Առանց երկար փնտրտուքների՝ 1 օրում մայրիկի հետ ընտրել է զգեստը՝ համադրելով ցածրակրունկ կոշիկների հետ և ստանալով հայկական իրականության համար անսովոր կերպար․ «Նախընտրեցի կրել ամառային թեթև, ժանյակե զգեստ, ցածրակրունկ կոշիկներ, իսկ վարսերս զարդարեցի թարմ ծաղիկներով»:

Հաղորդավարուհին չի կրել նաև հարսի քող, սակայն քույրիկը թույլ չի տվել, որ դա այդպես մնա: «Քանի-որ ցանկանում էի լուքս մինիմալիստական լիներ, չէի կրում նաև հարսի քող: Սակայն երեկոյի ընթացքում անսպասելի միացավ «Հարսանեկան մարշը», քույրիկս հանդիսավոր ինձ մոտեցրեց հարսանեկան քողն ու ամրացրեց վարսերիս: Այնքան անսպասելի էր, Վանի հետ երկար ծիծաղում էինք»,- պատմեց նա՝ անդրադառնալով օրվա անակնկալներն:

Երեկոյի ամենահետաքրքիր պահն Էմմայի համար եղել է ծաղկեփունջը նետելը, որն, իրականում, չուներ:  «Երբ ամենն ավարտվեց, դուրս գալուց ընկերուհիս՝ Մադոննան, պահանջեց, որ, անպայման, ծաղկեփունջ նետեմ: Բոլորը շարվեցին, սեղանից վերցրեցի զարդարանքի ծաղիկներն ու նետեցի այն: Ծաղկեփունջն ընկավ ուղիղ Մադոննայի ձեռքերի մեջ»,- ժպիտով պատմեց Էմման:

Մեղրամսի կմեկնե՞ն, թե՞ ոչ,  Վանն ու Էմման դեռ չգիտեն, դա կախված է ծանրաբեռնվածությունից, քանի որ երկուսն էլ աշխատում են: