«Տրամադրված եմ դրական և ինքնավստահ». Ռուսաստանի «Ձայնը․ երեխաներ» նախագծի ֆինալիստ Ռոբերտ Բագրատյանը ուժերը կփորձի «Դեպի մանկական Եվրատեսիլ»-ում

Սեպտեմբերի 15-ին Հանրային հեռուստաընկերության ուղիղ եթերում կկայան «Դեպի մանկական Եվրատեսիլ» մրցույթը, որի ժամանակ հայտնի կդառնա, թե ով է Հայաստանը ներկայացնելու «Մանկական Եվրատեսիլ 2019»-ին։

Նախնական հայտերի արդյունքում արդեն ձևավորվել է մասնակիցների տասնյակը, որոնք կպայքարեն մրցույթին Հայաստանը ներկայացնելու համար: Նրանք են՝ Անիշոկը, Անի Աթայանը, Անահիտ Առաքելյանը,  Ռոզա Էլոյանը, Էմիլի Հովհաննիսյանը, Անժելա Ալբերտյանը, Նարեկ Մարկոսյանը, նախորդ տարի «Դեպի մանկական Եվրատեսիլում» 2-րդ տեղը զբաղեցրած Վարդան Մարգարյանը, «Մանկական Նոր Ալիք 2019»-ի հայաստանյան պատվիրակ Կարինա Իգնատյանը և Ռուսաստանի «Ձայնը․ երեխաներ» նախագծի ֆինալիստ Ռոբերտ Բագրատյանը։

Tert.am Life-ը 13-ամյա Ռոբերտի հետ զրուցել է ինչպես «Դեպի մանկական Եվրատեսիլ»-ին իր մասնակցության, այնպես էլ «Ձայնը․ երեխաներ» նախագծից հետո իր զբաղմունքների և առաջարկների մասին։

Ռոբերտի խոսքով՝ Ռուսաստանի «Ձայնը․ երեխաներ» նախագծից հետո իրեն շատերն են ճանաչել, այդ թվում՝  ձեռք է բերել հայ երկրպագուներ․ «Նախագծի ընթացքում շատ հայեր են ինձ ցուցաբերել իրենց աջակցությունը՝ նաև ասում էին, որ այս տարի ես ներկայացնեմ մեր երկիրը «Մանկական Եվրատեսիլ»-ում: Որոշեցի մասնակցել «Դեպի մանկական Եվրատեսիլ» նախագծին»։

Ռոբերտը նախագծին ներկայանալու է իր Captain Friendship երգով: «Իմ երգն ընկերության մասին է, կոչ է անում, որ բոլորն իրար հետ ընկերական լինեն և ապրեն համերաշխության մեջ։ Հուսով եմ, որ իմ ներկայացրած երգը դուր կգա լսարանին։ Իրականում, սպասում եմ ջերմ հանդիսատեսի, որն ինձ կսատարի, այդպես ես կարողանում եմ էներգիա ստանալ»,- ասաց պատանի երգիչը:

Ռոբերտը նշեց, որ բախագծին տրամադրված է դրական և ինքնավստահ․ «Ցանկությունս մեծ է  նոյեմբերի 24-ին Լեհաստանում կայանալիք «Մանկական Եվրատեսիլ»-ին ներկայացնել իմ երկիրը։ Հուսամ՝ ամեն ինչ լավ կստացվի»։

Պատանի կատարողը բնակվում է Ռուսաստանում, սակայն վերջին մի օրերին Երևանում է՝ պատրաստվում է նախագծին։ Իր խոսքով՝ այս օրերի ընթացքում արդեն հասցրել է ընկերանալ նախագծի մյուս մասնակիցների հետ։

«Բոլոր մասնակիցները շատ դրական ու ընկերական են: Հուսով եմ՝ նախագծի ավարտից հետո էլ կկարողանանք պահպանել կապը»,- նշեց Ռոբերտը։

Ռոբերտը նշեց, որ ռուսական «Ձայնը․ երեխաներ» նախագծից հետո շատ առաջարկներ է ստացել, որոնցից մի քանիսն ընդունել է, մի քանիսից ստիպված է եղել հրաժարվել, քանի որ ժամանակի խնդիր է ունեցել․ «Գրաֆիկս թույլ չէր տալիս որոշ առաջարկներ ընդունել, սակայն հիմնականում փորձում եմ միշտ և ամենուրեք հասցնել։ «Ձայնը» նախագծից շատ բան եմ սովորել։ Սովորել եմ հեռուստաէկրանից այն կողմ ճիշտ  աշխատել՝ ինչ պահվածք ունենալ բեմին, ինչպես երգել: Ինչպես նախագծում իմ մարզիչը՝ Սվետլանա Սերգեևնա Լոբոդան է ասում, պետք է սիրես և հարգես քո հանդիսատեսին»։

«Ձայնը» նախագծից հետո Ռոբերտը հասցրել է հանգստին էլ  ժամանակ տրամադրել, իսկ հիմա վերադարձել է աշխատանքային բուռն ընթացքի: Արդեն մեկնարկել է նաև ուսումնական տարին:  Ըստ Ռոբերտի՝ գերհագեցած գրաֆիկը փոքր-ինչ խոչընդոտում է դասերին, սակայն ինքն այս առումով ևս դրական է տրամադրված․ «Հույս ունեմ՝ լրացուցիչ պարապմունքների միջոցով կկարողանամ հասնել համադասարանցիներիս։ Իհարկե, իմ ուսուցիչները բոլորն էլ ըմբռնումով են մոտենում բացակայություններիս»։

Ռոբերտից հետաքրքրվեցինք, թե ինչպես է պատրաստվում ծախսել «Ձայնը․ երեխաներ» նախագծի մրցանակի՝ իր միլիոնը․ «Անկեղծ ասած, մրցանակային գումարը դեռ չենք ստացել: Երբ  ստանանք, ստեղծելու եմ իմ սեփական ստուդիան, դա իմ երազանքն է»։