««Մանկական Եվրատեսիլ» կգնա նա, ում կժպտա հաջողությունը»․ «Նոր Ալիք 2019»-ում Հայաստանի պատվիրակ Կարինա Իգնատյանը ուժերը կփորձի «Դեպի մանկական Եվրատեսիլ»-ում

Սեպտեմբերի 15-ին Հանրային հեռուստաընկերության ուղիղ եթերում տեղի կունենա «Դեպի մանկական Եվրատեսիլ» մրցույթը, որի ժամանակ հայտնի կդառնա «Մանկական Եվրատեսիլ 2019»-ում Հայաստանի պատվիրակի անունը։  

Արդեն ձևավորված մասնակիցների տասնյակում է մանկական «Նոր Ալիք 2019»-ում Հայաստանը ներկայացրած Կարինա Իգնատյանը։ Tert.am Life-ը զրուցել է պատանի երգչուհու հետ։ Վերջինս նշեց, որ դրական տրամադրվածությամբ է մասնակցում։

«Շատ ուրախ, դրական տրամադրվածություն ունեմ։ Ինձ համար ամեն ինչ տոն է, անգամ, կազմակերպչական հատվածը։ «Նոր Ալիք»-ում իմ ելույթի ժամանակ տեխնիկական խնդիր եղավ, բոլորը տխրել էին, բայց ինձ համար կարևոր էր մթնոլորտը, ընկերներս, որոնց այնտեղ ձեռք բերեցի։ Ինձ համար շատ կարևոր է ընկերական միջավայր ստեղծելը։ Հիմա էլ կարևորում եմ այն, որ լավ կատարեմ երգս և ունենամ գեղեցիկ, տպավորիչ համար»,- ասաց պատանի երգչուհին։

Կարինան ապրում է Կալուգայում, դեռ նախորդ տարի նրա վոկալի ուսուցչուհին՝ Լիլի Գրիգորյանը, երգ էր գրել Կարինայի համար, որպեսզի մասնակցի «Դեպի մանկական Եվրատեսիլ»-ին։ Happy Birthday ստեղծագործության հայտը պատանի երգչուհու համար անակնկալ ուղարկել էին նախագիծ, Հանրային հեռուստաընկերությունը հաստատել էր մասնակցությունը, սակայն Կարինան դասերի պատճառով չէր կարողացել ժամանել Հայաստան։

Այս տարի երգչուհուն հաջողվել է համաձայնության գալ բացակայությունների համար, նա Հայաստանում է ու պատրաստվում է նախագծին: «Երգս կոչվում է Colours Of Your Dream, բառերը հեղինակել են Ավետ Բարսեղյանը, Մարգարիտա Դորոշևիչը, երաժտության հեղինակը ռուս կոմպոզիտոր Դեմչուկ Տարասն է։ Երգը գրեթե բոլորին դուր է եկել, պարբերաբար, լավ արձագանքներ ենք ստանում, մարդիկ  ակտիվորեն տարածում են, սոցցանցերում ինձ նշում են: Հետաքրքիր է, որ արձագանքներ եմ ստանում թե՛ Հայաստանում, թե՛ Հայաստանից դուրս։ Մեզ շատ է ուրախացնում, որ երգն իսկապես դուր է եկել մարդկանց»,- ասաց նա:

Այս պահին «Դեպի Եվրատեսիլ» նախագծի Youtube-յան էջում Կարինայի երգի դիտումները մոտենում են 30․000-ին: Դա ամենաբարձր ցուցանիշն է, հաջորդ տեղում Ռոբերտ Բագրատյանի երգն է՝ մոտ 24․000 դիտումով։ «Իհարկե բոլորս էլ ուրախանում ենք, որ իմ երգն ամենաշատ դիտումներն ունի, հաճախ տեսնում ենք, որ կիսվում են, բայց դա  ափանիշ չէ։ Ամեն ինչ պարզ է լինում հենց վերջնական քվեարկության օրը: Մրցույթն անկանխատեսելի է, ես մտածում եմ, որ սա ուղղակի երաժշտական տոն է»,- ասաց երգչուհին։

Կարինան վստահ է, որ «Եվրատեսիլ» կգնա նա, ում կժպտա հաջողությունը։ Երգչուհին նշեց, որ բոլորն էլ լավն են և արժանի հաղթանակի։

 Կարինան ներգրավված է նաև «Ապրիր խաղաղ» երաժշտական նախագծում,  նախագծի շրջանակում նրա հետ  աշխատում են նախագծի հեղինակ Լիլի Գրիգորյանը և գեղարվեստական ղեկավար Լիլիթ Բադալյանը։ Լիլի Գրիգորյանը ցանկացավ անդրադառնալ նաև մանկական «Նոր Ալիք 2019»-ին Կարինայի մասնակցությանը:

«Ցավոք, Հայաստանում մանկական «Նոր Ալիք»-ը չի հեռարձակվում, դրա պատճառով նաև չի լուսաբանվում։ Կարինան այնտեղ զբաղեցրել է 4-րդ հորիզոնականը, սակայն մրցութային առաջին օրվա ելույթի ժամանակ եղել է տեխնիկական խնդիր՝ իր ականջակալը չէր միացել, ինքն իրեն չլսելու պատճառով վատ էր երգել, ցածր միավորներ հավաքել, երկրորդ օրն արդեն միավորները բավականին բարձր էին, ավելին՝ Կարինան արժանացավ հատուկ մրցանակի և ստացել է բեմական հագուստների հավաքածու Ա․ Կոսիգինի անվան ռուսական պետական համալսարանի կողմից։ Մանկական «Նոր Ալիք»-ից հետո իրեն հրավիրել էինմասնակցել մեծերի «Նոր Ալիք»-ին՝ որպես հյուր, սակայն մեզ մոտ ակտիվ նախապատրաստական շրջան էր «Դեպի մանկական Եվրատեսիլ»-ի համար և Կարինան չկարողացավ մասնակցել»։