«Կյանքը հրաշալի է, որովհետև դուք կաք». Սոսո Պավլիաշվիլիի երևանյանը համերգը, կանանց արած խոստովանությունն ու կյանքը հաճույք դարձնելու բանաձևը

Սոսո Պավլիաշվիլին հայ երաժիշտներից կազմված Naverey երգչախմբի հետ եկել էր հայ հանդիսատեսին համոզելու, որ կյանքը, անկախ վայրիվերումներից, հաճույք է:

«Կյանքը հաճույք է» խորագրով համերգին Սոսո Պավլիաշվիլին երգեց ինչպես նոր, այնպես էլ արդեն հայտնի ստեղծագործություններ: Tert.am Life-ը ներկա է եղել Սոսո Պավլիաշվիլիի երևանյան համերգին, ֆիքսել հետաքրքիր դրվագները:

Բեմից նա մի քանի անգամ հարցրեց հանդիսատեսին՝ մի՞թե կյանքն իսկապես հաճույք չէ, ապա, խոսելով կյանքի ոչ նյութական հաճույքների մասին, կենացի նրբերանգներով ասաց. «Ծեր, ալեհեր այս վրացին ասում է, որ կյանքը՝ հաճույք է, քանի դեռ Աստված ապրում է քո սրտում, երբ ներսումդ ամեն ինչ հանգիստ է, բանական, նուրբ: Կյանքը հաճույք է, երբ երեխաներն ու ծնողներն աղոթում են մեկը մյուսի համար: Կյանքը հաճույք է, երբ դու քնում և արթնանում ես սիրելի մարդու հետ, նրա կողքին: Կյանքը հաճույք է, երբ դու լավ տրամադրություն ունես, կա մեկը, ում կարող ես զանգահարել և կիսվել նոր ստեղծագործություններով: Կյանքը հաճույք է, երբ բեմից տեսնում ես հրաշալի ժպիտներ, վառվող աչքեր, իսկ մեր սրտերը զարկում են ռիթմին համընթաց: Ուզում եմ, սա միշտ և բոլորի կյանքում այսպես լինի: Եվ ես ասում եմ, որ, այո՛, կյանքը հաճույք է»: 

Սոսո Պավլիաշվիլին երաժշտական ոչ մի ընդմիջում բաց չէր թողնում ոչ միայն հիշեցնելու համերգի խորագիրը, այլև մեծարելու կանանց գոյությունն ու նշանակությունը տղամարդկանց կյանքում: Երաժշտի խոսքով՝ ինքը կնամեծար է, քանի որ այլ կերպ, ուղղակի չի կարող. «Հրաշալի, անհավատալի, թանկագին, գեղեցիկ կանայք, դուք, երբեմն, կամակոր եք, սակայն այն ձեզ շատ է սազում: Առհասարակ, կյանքը հրաշալի է, որովհետև դուք եք ապրում այնտեղ: Երկիր մոլորակն է անասելի լավը, որովհետև դուք ժպտում եք: Տա Աստված, որ դուք ամեն առավոտ արթնանաք, նայեք երկինք ու ասեք, որ շնորհակալ եք այդչափ երջանիկ լինելու համար: Թող ձեր սիրելիները միշտ վերադառնան տուն՝ առողջ, սիրով, մի քիչ ավելի հարուստ, մի քիչ էլ՝ հարբած: Իսկ ինչո՞ւ հարբած, որովհետև մենք խմում ենք ձեր կենացը: Շնորհավորում եմ կանանց. չգիտեք ինչի առթիվ… Շնորհավորում եմ, որ մենք «երկնագույն» չենք»:

Համերգի ընթացքում տեխնիկական փոքրիկ խնդիրը երգչին առիթ տվեց կատակելու քաղաքական թեմայով: «Սա ընդամենը տեխնիկական խնդիր է՝ ահաբեկչություն չէ: Չնայած հիմա Կովկասում իրադրությունը լարված է, ամեն դեպքում, թող հիմար քաղաքական գործիչները գան ու գնան, մեզ հանգիստ թողնեն: Մենք կյանքը կվայելենք: Հաճախ են ասում, թե ամեն ինչում քաղաքական գործիչներն են մեղավոր, բայց, ո՛չ, կան նաև լավ գործիչներ»,- ասաց նա:

Ըստ կատարողի՝ իրենք Երևանում այս համերգով երաժշտական փոքրիկ պատմություն են կերտում՝ ոչ միայն ներկայացնելով մի շարք պրեմիերաներ, այլև համագործակցելով հայ տղաներից կազմված երգչախմբի հետ: «Մի քանի օր առաջ զրուցում էի սանիկիս՝ Արթուր Ջանիբեկյանի հետ: Մեր խոսակցության ընթացքում ասացի՝ հնարավոր է մենք այս համերգով պատմություն կերտենք, երաժշտության պատմություն: Իհարկե, հրաշալի է, որ ես այս լավ երգչախմբի հետ այսօր այս բեմին եմ, շնորհակալ եմ Գարիկ Մարտիրոսյանին, ում շնորհիվ ծանոթացել եմ շրթհարմոնահար Արտակի հետ: «Մեցցո փրոդաքշընին» ևս շնորհակալ եմ, որ համերգը կյանքի է կոչել: Միշտ տղաներին ասում եմ՝ իրենց հետ մեկ բեմում ես ամենաթույլ օղակն եմ: Իսկապես, լուրջ եմ ասում»,-նշեց Սոսո Պավլիաշվիլին: 

Սոսո Պավլիաշվիլին և շրթհարմոնահար Արտակ Ներսիսյանը ծանոթացել են ամիսներ առաջ: Արտակը պատմեց, որ նախկինում իրենք վրացի երաժշտի հետ հանդիպել էին սակայն, որպես այդպիսին, ծանոթ չէին:

«Գարիկ Մարտիրոսյանն ինձ հրավիրել էր իր տարեդարձին և այդ օրը նվագելու ժամանակ Լեոնիդ Ագուտինն Ինստագրամում «սթորի» էր արել: Այդ տեսանյութից հետո Սոսոն կապվեց ինձ հետ և առաջարկեց միասին երգ ձայնագրել: Արդեն Կրեմլում այդ երգով ելույթ ունենալուց հետո սկսեցինք համագործակցել: Նա ինձ վստահեց, որպեսզի ես Հայաստանում հավաքեմ լավ երաժիշտների, ստեղծենք խումբ ու համագործակցությունն ավելի լայնամասշտաբ լինի: Շատ լավ մարդ է, շատ լուրջ երաժիշտ: Մինչ իր հետ համագործակցելը, ինքս էլ չէի պատկերացնում դա: Չնայած շատ պահանջկոտ լինելուն՝ նա փորձերին գալիս է միայն հաճույք ստանալու»,- եզրափակեց Արտակը:

Լուսանկարները՝ Էլեն Գասպարյանի