«Ազնիվ գողերի» պրեմիերան, հայտնի հյուրերն ու հետաքրքիր դրվագները

«Ազնիվ գողերը» կատակերգության պոստերից հանդիսատեսն առաջինը հիշում է մանկական դիմակներով «գողերին», իսկ դերասանները՝ իրենց «բնական դիմակները», որոնք ձեռք էին բերել ռեժիսոր Գոռ Կիրակոսյանի պատկերացրած կերպարանափոխությունների շնորհիվ:

Արամ MP3-ն նկարահանումների համար սափրվել էր և հիշում է, որ իր համար բավականին անհարմար էր ներկայանալ այս կերպարով, Դավիթ Թովմասյանը՝ «մեքսիկի բեղերով» էր, ինչպես բնորոշեց ռեժիսոր Գոռ Կիրակոսյանը, Մեգգի Գրիգորյանը ստիպված էր հրաժարվել երկար շեկ վարսերից՝ դառնալով կիսասափրած և կարմիր մազերով աղջիկ: Դերասաններից յուրաքանչյուրն անհարմարությունների շարք ունի կապված արտաքին փոփոխությունների հետ:

«Ազնիվ գողերն» արդեն մեծ էկրանին է։ Tert.am Life-ը ներկա է եղել ֆիլմի պրեմիերային ու ներկայացնում է հետաքրքիր դրվագներն ու մանրամասները:

Կերպարանափոխության չեն ենթարկվել դերասաններ Ռաֆայել Երանոսյանն ու Լևոն Տեր-Պետրոսյանը: Ռաֆայելին, սակայն, բաժին էր հասել մեկ այլ խնդիր՝ վարել սովետական մեխանիկական մեքենա, որը նկարահանումների ընթացքում հասցրել է նույնիսկ խափանվել ու վառվել:

«Երբ սցենարը կարդացի, Գոռը չէր ասել, թե որ դերն է նախատեսել ինձ համար, սակայն ես միանգամից ինձ պատկերացրի Արտակի դերում: Հետո Գոռը զանգեց, ասաց՝ մնաց մի հարց, դու կարողանո՞ւմ ես մեխանիկական մեքենա վարել: Ասացի՝ իհարկե, բայց ավելի լավ էր չասեի, որովհետև էդ մեքենան ամենադժվար պրոցեսն էր, որ իմ կյանքում կարող էր լինել: 74 թվականից այս կողմ այդ մեքենայի մեջ ոչինչ չէր աշխատում: Առաջին նկարահանման օրը հեղափոխության օրերին փակ փողոցներով հասել էինք նկարահանման, ամեն ինչ պատրաստ էր, Գոռն ասաց՝ «ռեք» ու մեքենան «պաժառ» ընկավ: Գոռը զանգել, ասում էր՝ արա՛, քշի, ասում եմ՝ Գոռ, ավտոն վառվում ա»,- ծիծաղելով պատմեց դերասանը: Պրեմիերայի օրը մեքենան Մոսկվա կինոթատրոնի դիմացն էր: Ռաֆոն, մոռանալով բոլոր անհարմարությունները, լուսանկարվեց դրա հետ:

Դերասան Լևոն Տեր-Պետրոսյանը նկատեց, որ երկար տարիներ է, ինչ «Դեմք շոու»-ի շրջանակում աշխատում են Գոռի հետ, նրա ֆիլմերում դերեր ունեցել է, սակայն առաջին անգամ էր ստանում կենտրոնական կերպար ու մեծ էր պատասխանատվությունը, որպեսզի արդարացնի իրեն:

«Վարդանի կերպարը սկզբում չէի հավանում, որովհետև ամենալուրջն է, պասիվը, սակայն մի օր Գոռն ինձ ասաց՝ քեզ տալիս եմ ամենահետաքրքիր կերպարը, որովհետև պետք է կարողանաս ամբողջ ֆիլմը խաղալ որպես իրենց ընկեր, բայց վերջում ճիշտ անակնկալ անել: Պետք է դա այնպես անես, որ հանդիսատեսի համար էլ անակնակալ լինի»,- ասաց Լևոնն ու ստացավ ֆիլմի առաջին հանդիսատեսի ոգևորիչ գնահատականը՝ ստացվել է:

Դերասանը նաև նկատեց, որ ընկերների հետ աշխատանքը շատ ավելի հեշտ է ստացվում, քանի որ իրարից չեն նեղանում: Ընկերների հետ աշխատանքը, թերևս, ամենաբարդը Գոռին է տրվել․ նկարահանման հրապարակում լռություն հաստատելն ամենաբարդն է եղել, հատկապես, երբ տաղավարում Ռաֆոն է եղել: Պարզվում է՝ նա ամենաշատախոսն է, բայց ունի իր արդարացումը, եթե չխոսի, կքնի:

Նկարահանումներն իրականացել են նախորդ տարի՝ հեղափոխության օրերին: Անձնակազմը մի շարք խնդիրներ է ունեցել՝ տեղից տեղ տեղափոխվելուց մինչև կենտրոնական վայրերում նկարահանումները, որոնք անցել են ցուցարարների կոչերի հնչյունների ներքո:

Այսօրվա իրականության համար հետաքրքիր զուգադիպությամբ Արամ MP3-ի հերոսը «Սանիտեք»-ի աշխատակից է, որի համար հոբբի է քաղաքը մաքուր պահելը: Ստեղծագործական թիմը փաստում է՝ նկարահանումները տեղի են ունեցել դեռ նախորդ տարի:

«Մենք նախորդ տարին ենք նկարահանել ֆիլմը, սցենարը գրել ենք դրանից ևս մեկ տարի առաջ»,- ասաց Գոռը:

Արամն էլ մտաբերեց «Առաջին դեմք» ֆիլմը, որի պրեմիերայից հետո երկրում տեղի ունեցած փոփոխությունները շատերը զուգահեռում էին ֆիլմի հետ․ «Երբ նկարահանվեցի «Առաջին դեմք»-ում, հետո եղան այս իրադարձությունները, ինձ մարդիկ լուրջ դեմքով հարցնում էին՝ Դո՞ւք եք այս ամենը նախագծել։ Ֆիլմում հանքի մասին էր խոսվում, վերջին իրադարձություններից հետո մտածում էի գնալ»:

Ֆիլմի ավարտը ենթադրում է շարունակություն, սակայն այն երկրորդ մաս կունենա՞, թե՞ ոչ , կախված է հանդիսատեսի արձագանքից: Գոռը հայտնեց, որ մտածում են նաև ֆիլմը ռուսական և ամերիկյան ընկերություններին վաճառելու մասին: Ֆիլմի ռուսերեն և անգլերեն սուբտիտրերով տարբերակն արդեն պատրաստ է:

Լուսանկարները՝ Էլեն Գասպարյանի