Քաղաքապետի և Մկոյի կերպարի՝ Մամիկոնի ծանոթության մասին հումորը, Աշոտ Շարմազանովիչի արկածներն ու «SaveՄիլիոն»-ի պրեմիերայի մյուս հետաքրքիր դրվագները

Քաղաքականությունը, հումորն ու օրենքը շրջանցած օլիգարխը կրկին հանդիպեցին մեկ բեմում՝ այս անգամ «SaveՄիլիոն» ներկայացման շրջանակում: Երկու գործողությամբ իրավիճակային այս կատակերգությունը պատմում է մարզպետ Աշոտ Շարմազանովիչի ու նրա օգնականի՝ Մամիկոնի հետհեղափախական արկածների մասին:

Tert.am Life-ը ներկա է եղել՝ դերասաններ Մկրտիչ Արզումանյանի, Լևոն Հարությունյանի, Էվա Խաչատրյանի, Վիկտորյա Սահակյանի ու Սերգեյ Գրիգորյանի մասնակցությամբ «SaveՄիլիոն» ներկայացման պրեմիերային: Ներկայացման ռեժիսորը Նորա Գրիգորյանն է, սցենարիստը՝ Արմեն Վարդանյանը, պրոդյուսերը՝ Արման Միտոյանն է:

Այն, որ վերջին շրջանում քաղաքականությունը բեմից չի իջնում, փաստ է: Գրեթե նույն բովանդակությունն ու սյուժետային նրբերանգներն ուներ ավելի վաղ «Բոհեմ» թատրոնում բեմադրված «Բումերանգ» ներկայացումը, որտեղ ևս պատմությունը նախկին օլիգարխի մասին էր, որը ստիպված էր թաքնվել օրենքի հետ խնդիրների պատճառով ու օրենքը շրջանցելու նոր ուղիներ փնտրել խնդիրները լուծելու համար: Նշենք, որ երկու ներկայացման սցենարի հեղինակն էլ Արմեն Վարդանյանն է, իսկ օլիգարխի դերակատարը՝ Լևոն Հարությունյանը:

Արմեն Վարդանյանից հետաքրքրվեցինք՝ արդյոք թեման շատ չի արծարծվում նույն ձևաչափով: Սցենարիստը վստահ է՝ արդի խնդիրներն անհամեմատ ավելի շատ կարող են հետաքրքրել հանդիսատեսին. «Թատրոնն ի՞նչ է, կյանքից մի հատված, պատմություն: Այսօր մեր իրականությունը սա է, այնպես չէ, որ հաճելի է նման թեմաներ բարձրացնելը: Ես շատ եմ ցանկանում, որ թեման լինի արդիական ու պատմի հենց մեր օրերի մասին: Կարող է լինել թեկուզ սիրո պատմություն, բայց իրատեսական ու ներկայից՝ այս իրականությունից վերցրած: Իհարկե, դասականն էլ պետք է լինի, բայց, մարդը պիտի գա ներկայացման և տեսնի այսօրվա իրականությունը, լսի արդի արտահայտություններ, ճանաչի այսօրվա հերոսին: Լավ կլինի, եթե իմ գործընկերները, որոնք ստեղծագործում են հումորային ժանրից դուրս, նույնպես անդրադառնան այսպիսի պատմությունների, խոսեն մեր օրերի մասին»:

Տեսարաններից մեկում օլիգարխ Աշոտ Շարմազանովիչը Մամիկոնին՝ Մկրտիչ Արզումանյանի մարմնավորած կերպարին, ասում է, որ նա մեր քաղաքապետին լավ է ճանաչում: Հանդիսատեսն այս հումորին բավականին բուռն արձագանքեց:
Հարցին, թե որքանո՞վ է սցենարիստին օգնում հանգամանքը, որ իր նախկին գործընկերներից մի քանիսն արդեն պաշտոնյա են, Արմենը կատակեց, թե նոր Հայաստանում այդ ծանոթությունները դժվար օգնեն իրեն: Ներկայացման տևողությունը մոտ երկու ժամ էր: Խոսելով դինամիկության մասին՝ Արմենը նշեց, որ սա առաջնախաղն էր, իսկ պրեմիերան հետագա ներկայացումներին զիջում է դինամիկությամբ:

Ներկայացման ավարտից հետո Մկոն ևս խոսեց առաջնախաղի բարդությունների մասին. «Առաջին խաղի ժամանակ լարվածությունը բոլորիս մոտ էլ շատ էր, բայց կարծում եմ՝ այսօր նյութ ավելի լավ հասկացանք, մեզնով արեցինք: Ըստ իս՝ հաջորդն ավելի հետաքրքիր կլինի մեզ համար էլ, հանդիսատեսի համար էլ, լարվածությունն էլ քիչ կլինի: Թեև լարվածություն լինում է ցանկացած պարագայում, անգամ, եթե քառասուներորդ ներկայացումն եմ խաղում: Ես չեմ դժգոհում, որ այդ հատկությունն ունեմ, որովհետև դա օգնում է անընդհատ լավացնել որակը, նորություններ մտածել»:

Լուսանկարները՝ Էլեն Գասպարյանի