Իրինա Այվազյանի 24-ամյակի անակնկալները, ընկերների կազմակերպած խնջույքն ու սպասված նվերը

16:13 • 27.09.19

Շոուբիզնես

«Էլենի օրագիրը 2» հեռուստասերիալից հայտնի դարձած դերասանուհի Իրինա Այվազյանը դարձել է 24 տարեկան։ Դերասանուհու խոսքով՝ չնայած օրը նշելու ցանկություն չի ունեցել, ընկերներն իր փոխարեն ամեն ինչ արել են։

Tert.am Life-ն Իրինայի հետ զրուցել է տարեդարձի, մեծանալուց վախենալու, ցանկալի նվերների և ընկերների պատրաստած անակնկալի մասին։

«Անկեղծ ասած, տարեդարձիս նախորդ օրը տրամադրություն չունեի։ Ընկերներիս հետ սրճում էինք, համոզում էին, որ տարեդարձիս օրը մի տեղ գնանք, սրճենք, տորթիկ ուտենք, ուրախանանք, բայց ասացի, որ նման միտք չունեմ։ Երեկոյան գնացի տուն, գիշերազգեստս հագա, պառկեցի քնելու, բայց կեսգիշերից սկսվեցին անակնկալները։ Դռան զանգը տվեցին, դուռը բացելուն պես ընկերներս շատ բարձր երաժտություն միացրած մտան տուն։ Երկու տորթ էին բերել՝ մեկն ուտելու համար էր, մյուսը՝ հատուկ դեմքիս խփելու: Ուրախացանք, պարեցինք ու իրենք գնացին»,- պատմեց դերասանուհին ու հավելեց, որ անակնկալներն այդքանով չեն ավարտվել։ Ըստ նրա՝ ամեն ինչ է՛լ ավելի հետաքրքիր է դարձել տարեդարձի առավոտյան ու շարունակվել մինչև հաջորդ օրը։

«Տարեդարձիս օրը ընկերներս հերթով զանգում ու ամեն մեկը մի բան էր խնդրում, այնպես, որ մյուսի ասածը չկարողանամ անել։ Ընկերներիցս մեկն էլ ասել էր, որ քաղաքից գնամ դուրս գտնվող իրենց ամառանոց, որոշեցի, որ առաջինը հենց այնտեղ կգնամ։ Երբ հասա, տեսա, որ նրանք նախապես հավաքվել էին, գեղեցիկ զարդարել ամեն ինչ, խմիչքներ գնել, բարձր երաժշտությամբ դիմավորեցին ինձ: Ամեն ինչ շատ լավ էին կազմակերպել։ Այնտեղ ոչ մի տեսակ կապ չկար՝ ոչ կարողանում էի զանգել, ոչ էլ համացանցից օգտվել՝ կարճ ասած ամեն ինչից կտրված լավ ժամանակ ենք անցկացրել»,- ասաց Իրինան։

Դերասանուհին նշեց, որ դեռ չի կողմնորոշվում՝ սիրո՞ւմ է իր տարեդարձի օրը, թե՞ ոչ․ «Այդ օրը միշտ զգացմունքներս խառնվում են իրար։ Չեմ հասկանում ուրա՞խ եմ, որ ծնվել եմ, թե՞ տխուր, որ մեծանում եմ»։

Չնայած Իրինան իր ցանկությունների ցուցակի մասին խոսել չցանկացավ, սիրով նշեց ցանկալի նվերների մասին․ «Շա՜տ եմ սիրում նվերներ ստանալ ինձ կարող է ուրախացնել ցանկացած նվեր, բայց ինձ ճանաչողները գիտեն, որ ամենից շատ սիրում եմ նվեր ստանալ սպորտային կոշիկներ և օծանելիք»։

Խոսելով ամենահիշարժան տարեդարձի մասին՝ Իրինան ասաց, որ մեկ անգամ առիթ է ունեցել ծնունդն օդանավում նշել։ դա էլ ամենահետաքրիրն էր:

Դերասանուհին իր տարիքի հետ կապված վախեր ու անհանգտություններ չունի, չնայած փոքր տարիքում մեծ լինելու հետ կապված իր չափանիշները բոլորովին այլ են եղել․ «Երբ փոքր էի, մտածում էի, թե 17 տարեկանն ամենահասուն տարիքն է, դրանից այն կողմ արդեն մեծ է համարվում։ Դե հիմա կարելի է պատկերացնել, թե տարիքս ինձ որքանով է վախեցնում:) Իսկ եթե լուրջ, տարիքիս մեջ ոչ մի վախենալու բան չկա»։