Օլյա Հակոբյանի տարբերվող ֆոտոշարքը, մարզումներն ու ոճային փոփոխությունը նոր դերի համար

Դերասանուհի Օլյա Հակոբյանը «Անավարտ երազ» նախագծում ներկայանում է ոճային փոփոխությամբ: Այս փուլում նա նաև նոր ֆոտոշարք ունի, որտեղ ևս ներկայանում է նորովի։ Նոր լուսանկարները դերասանուհին տրամադրել է Tert.am Life-ին ու պատմել ինչպես նոր ֆոտոշարքի թեմայի ընտրության, այնպես էլ «Անավարտ երազ»-ում իր դերակատարման և նորովի ներկայանալու կարևորության մասին։

Օլյան այժմ ակտիվ մարզվում է, հետևում իր կառուցվածքին։ Հենց դա էլ դարձել է ֆոտոշարքի թեման։

«Ես 2 սիրելի մարզիչ ունեմ՝ 2 եղբայր են՝ Դանիելը և Ջուլիանը, ովքեր մարզասրահում ինձ օգնում են կատարելագործել մարմինս։ Ֆոտոշարքի գաղափարն առաջարկեց Դանը, իսկ հեղինակը լուսանկարիչ Սերժ Դավիդօֆն է։ Լուսանկարներն ինձ դուր են գալիս․ արտերկրում նմանատիպ ֆոտոշարքերի շատ կարող ես հանդիպել, Հայաստանում դեռ չէի տեսել։ Մի խոսքով՝ ինձ ոգևորեց թե՛ միտքը, թե՛ արդյունքը»,- ասաց նա։

Անդրադառնալով հեռուստատեսային նոր կերպարին՝ դերասանուհին նկատեց, որ առաջարկն ընդունելիս առաջնահերթ կարևորում է սցենարն ու ստեղծագործական թիմը: «Ինձ համար շատ կարևոր է, թե ովքեր կլինեն նկարահանող խմբում։ Առաջին անգամ էի աշխատում Արամ Շահբազյանի հետ։ Մեղմ ասած, շատ տպավորված եմ նախ՝ իր տեսակով՝ նա եզակի երևույթ է մեր ասպարեզում․ բացի այն, որ պրոֆեսիոնալ է, նաև լավ իմաստով տարօրինակ մարդ է։ Սիրեցի թե՛ նրան, թե՛ երկրորդ ռեժիսորին՝ Արթուր Սարիբեկյանին։ Շատ հաճելի համագործակցություն էր»,-ասաց Օլյան:

Իր հերոսուհուն դերասանուհին բնորոշում է որպես գործնական աղջիկ: Նա հանդիսանում է իրար դեմ հակամարտող կուսակցություններից մեկի նախագահի օգնականը։ «Իմ մարմնավորած կերպարը բացասական չէ, ավելի գործնական աղջիկ է, որն ամեն կերպ օգնում է իր ղեկավարին, կարգավորում նրա աշխատանքային հարցերը, նաև հարաբերությունների մեջ է վերջինիս հետ,- ասաց նա ու հավելեց, որ իր հիմնական խաղընկերը Սևակ Սանթրոսյանն է, որի հետ ևս առաջին անգամ էր աշխատում: -Շատ հաճելի խաղընկեր է և նկարահանումներն անցել են նորմալ մթնոլորտում»:

Դերասանուհին բազմասերիանոց ֆիլմում ներկայանալու փորձ ունեցել է «Միլիոնը թակարդում», «Վերջին գործարք» նախագծերի շրջանակում: Նրա խոսքով՝ այս ձևաչափն ունի և՛ դրական, և՛ բացասական կողմեր:

«Վատն այն է, որ մինչև տվյալ հեռուստասերիալը հեռուստադիտողի մեծ բանակ է հավաքում, ավարտվում է, մյուս կողմից էլ լավ է այն մարդկանց համար, որոնք երկարատև սերիալների սիրահար չեն: Դերասանական առումով էլ, միանշանակ, կարճ հեռուստասերիալը լավ է այն իմաստով, որ դու գիտես ավարտն ու ի սկզբանե կարողանում ես կառուցել կերպարդ, թեև ես նման խնդիր չունեմ: Երկարատև սերիալների դեպքում էլ նույն կերպ աշխատում եմ, գտնում եմ իմ կերպարային գիծը»,-ասաց նա:

Դերասանուհին նկատեց, որ մասնագիտական առումով ամեն բան անում է չկրկնվելու համար: «Եթե նույնիսկ կերպարների միջև տարբերությունը մեծ չէ, դերասանի խնդիրն է կարողանալ փոփոխել այն, նորովի մատուցել այն, ոչ թե խաղալ այնպես, ինչպես հեռուստադիտողն իրեն արդեն տեսել է: Այդ տեսանկյունից պետք է հնարավորինս ուշադիր լինել,-ասաց նա և ընդգծեց, որ յուրաքանչյուր նոր ֆիլմում նկարահանվելիս փորձում է ոճային նոր լուծումներով հանդես գալ,- Այս նախագծի համար արտաքին փոփոխություն արեցի՝ վարսերիս համար ավելի բաց երանգ ընտրեցի: Աշխատում էի նաև հագուստի առումով նոր ոճով հանդես գալ: Իհարկե, կերպարը նույնպես որոշակի «կանոններ» է թելադրում։ Բնականաբար, այդ փոփոխությունները համաձայնեցնում եմ նաև ռեժիսորի հետ»,-եզրափակեց նա: