«Խումբը որևէ հոնորար չի վերցրել, այս անգամ էլ գումար չի վերցնելու ելույթի համար»․ SOAD-ը հայտարարություն է տարածել երևանյան համերգի մասին

14:29 • 24.10.19

Շոուբիզնես

System of a Down ռոք խումբը 2020 թվականի հունիսին համերգ կունենա Հայաստանում: Հոկտեմբերի 9-ին այս մասին հայտարարել էր խմբի մենակատար Սերժ Թանկյանը: Խմբի անդամներն այսօր ստիպված են եղել հանդես գալ պաշտոնական հայտարարությամբ, քանի ոչ նրանց դուր չի եկել հանգամանքը, որ իրենց անունը շահարկում են քաղաքական նկատառումներով։

Խմբի տարածած հայտարարության մեջ, մասնավորապես, ասվում է․ «Ցավալի է, երբ աշխարհում քաղաքականացնում են, գրեթե, ամեն ինչ, երբ, քաղաքական նկատառումներից ելնելով, կեղծ լուրեր տարածելու միջոցով վարկաբեկվում են արտիստների ազնիվ մղումները։ Վերջերս իմացանք, որ հայկական մի քանի լրատվամիջոց տեղեկություն են տարածել, թե մենք շահույթ ենք ստացել 2015 թվականին Հանրապետության հրապարակում Հայոց ցեղասպանության 100-րդ տարելիցին նվիրված համերգից։ Ոչինչ ճշմարտությունից այնքան հեռու չէ, որքան դա։ 2015 թվականին Հայաստանի կառավարությունը խմբին հրավիրել է և հովանավորել՝ վճարելով բոլոր ծախսերը, այդ թվում՝ բեմի տեղադրումը, պրոդյուսեին, անձնակազմի մեկնումը, կացության ծախսերը։ Խմբի անդամներից ու պրոֆեսիոնալ ողջ անձնակազմից որևէ մեկը ոչ մի լումա չի աշխատել այդ շոուից»։

Հայտարարության մեջ նշված է նաև, որ ամռանը սպասվող համերգը ևս շահույթ չի հետապնդում․ «Մենք սիրով ենք ընդունել ներկայիս կառավարության առաջարկը, որպեսզի գալիք ամռանը ելույթ ունենանք Երևանում (ամսաթիվը շուտով կհայտարարենք): Այս դեպքում ևս խումբը որևէ հոնորար չի վերցնելու ելույթի համար։ Մեզ համար ցավալի է, որ կարիք եղավ նման հայտարարություն տարածել։ Մենք տհաճությամբ ենք վերաբերվում այն փաստին, որ խմբի անունը շահարկվում է քաղաքական նկատառումներով»։

Հիշեցնենք, որ աշխարհահռչակ System of a down ռոք խումբը Երևանի Հանրապետության Հրապարակում անվճար համերգով հանդես է եկել 2015թ. ապրիլի 23-ին՝ Հայոց ցեղասպանության իրազեկմանը նվիրված «Արթնացրեք հոգիները» (Wake Up the Souls) խորագրով: Համերգի ընթացքում խումբը կատարել է յուրահատուկ ստեղծագործություններ: