22-ամյա կիպրոսաբնակ հայ տղայի իրական կյանքը՝ Դիանա Մալենկոյի, Սարգիս Գրիգորյանի, Անահիտ Կիրակոսյանի մասնակցությամբ «Վերադարձ» ֆիլմում

Հայ-կիպրական համատեղ արտադրության «Վերադարձ» ֆիլմի նկարահանումները Հայաստանում ավարտվել են, Կիպրոսում դեռ ընթացքի մեջ են։ Ֆիլմի հիմքում մասամբ իրական պատմություններ են, պատմում են կիպրոսաբնակ հայ երաժիշտ Յուրի Մելիքովի կյանքի դրվագները, զուգահեռ ներկայացնում Սիրիայում զարգացող դեպքերի մասին։

Tert.am Life-ը զրուցել է ինչպես ֆիլմի ռեժիսոր Արման Գևորգյանի, այնպես էլ այս օրերին Հայաստանում գտնվող գլխավոր հերոսի՝ Յուրի Մելիքովի հետ։ Վերջինս ֆիլմում խաղում է ինքն իրեն, այստեղ ներկայացված է հենց նրա պատմությունը: 22-ամյա Յուրին ծառայել է Կիպրոսի զինված ուժերում, եղել է առաջնագծում, մինչև զինվորական կյանքը նա հասցրել է հայտնվել հունական «Ձայնը» նախագծի եզրափակչում, ապա նույն նախագծի ռուսական տարբերակի կիսաեզրափակչում: Ֆիլմի գաղափարը Յուրիին է, վերջինս իր պատմությունը ներկայացրել է սցենարիստ Հարություն Ղուկասյանին, ով դրա հիման վրա գրել է սցենարն ու  դիմել է ռեժիսոր Արման Գևորգյանին։

«Բավականին երկար ենք աշխատել սցենարի վրա։ Ֆիլմում զարգանում է երկու պատմություն, առաջինը Յուրիի պատմությունն է երջանիկ, գեղեցիկ սիրո մասին։ Մյուս պատմությունը դրամա է Սիրիայից մի ընտանիքի մասին, որը դեպքերի բերումով մասնատվում է։ Այս երկու պատմությունը հատվում են մի կետում, թե ինչպես, չեմ բացահայտի»,- ասաց ռեժիսորը ու հավելեց, որ երկու պատմության հիմքում էլ կան իրական փաստեր, սակայն իրենք այդ ամենին տվել են գեղարվեստական լուծումներ: Ըստ ռեժիսորի՝ արդյունքում բավականին դրամատիկ պատմություն են ստացել։

Արմանի խոսքով՝ աշխատել են դերասանական պրոֆեսիոնալ կազմի հետ, գլխավոր դերերում Յուրի Մելիքովը, Սարգիս Գրիգորյանը, Դիանա Մալենկոն, Ալեքսանդր Խաչատրյանը, Անահիտ Կիրակոսյանն են. «Դերասաններին ընտրել ենք՝ ծանոթ լինելով իրենց մասնագիտական տվյալներին»։

Խոսելով գլխավոր հերոսի՝ Յուրիի մասին, ռեժիսորն ասաց․ «Յուրին բավականին հայտնի է Կիպրոսում, Ռուսաստանում, բայց, ցավոք, ոչ Հայաստանում։ Կարծում եմ՝ ֆիլմից հետո Հայաստանում էլ կիմանան իր մասին և այլ տեսանկյունից կնայեն իրեն՝ կընկալեն ոչ միայն որպես երգիչ, այլև որպես դերասան՝ արտիստ։ Յուրին շատ տաղանդավոր և բազմակողմանի զարգացած տղա է: Շատ հեշտ է աշխատել Յուրիի հետ, որովհետև փոքր տարիքից բեմում է եղել, կաշկանդվածություն չունի։ Շատ է օգնում նաև փաստը, որ իր կողքին պրոֆեսիոնալ դերասաններ են, որոնք իրեն օգնում են»։

Չնայած Յուրին ամբողջ կյանքում բնակվել է Կիպրոսում, շատ լավ տիրապետում է հայերենին։ 22-ամյա երիտասարդը Հայաստան վերադառնալու և այստեղ ապրելու ծրագրեր ունի, թեև զգուշանում է խոստումներ տալ՝ ասելով, որ ամեն բան ժամանակը ցույց կտա։  

«Կիպրոսն իմ տունն է, բայց Հայաստանը սիրտս է։ Ծառայել եմ Կիպրոսի բանակում՝ հենց սահմանին, ի միջի այլոց, ես միակ հայն էի այնտեղ՝ թուրքերի դեմ։ Միշտ մտածում էի հետաքրքիր բովանդակային տեսահոլովակ պատրաստել և ներկայացնել Հայաստանում, սակայն ավելի ուշ որոշեցի, որ դա կարող է ֆիլմ լինել»,- ասաց Յուրին։

Նրա խաղընկերուհին դերասանուհի Դիանա Մալենկոն է։ Նրանք ֆիլմում հանդես են գալիս որպես սիրահար զույգ։ Յուրին ասաց, որ խաղընկերուհին իրեն շատ է օգնում, չնայած ինքն էլ իր մասնագիտությամբ մոտ է դերասանական արվեստին։

«Ես դերասան չեմ, երաժիշտ եմ, բայց կարող եմ շատ լավ հասկանալ դերասանի պահվածքն ու աշխատանքը։ Ըստ իս՝ երգիչն ու դերասանը, գրեթե, նույն ոճով են աշխատում։ Մենք էլ երգի միջոցով ենք բառեր ասում, հաղորդագրություն ուղարկում լսարանին։ Մեր դեպքում, գուցե, ավելի դժվար է, որովհետև մենք բեմում մենակ ենք, բայց էմոցիաներն ամբողջությամբ պետք է մենակ տեղ հասցնենք։ Շատ արագ մտա դերի մեջ, որովհետև խաղալու անհրաժեշտություն չկար, պետք է լինեի այնպիսին, ինչպիսին կամ։ Սթրեսային իրավիճակ միայն առաջին օրն է եղել։ Նկարահանումների ընթացքում փորձում եմ հիշել ու վերապրել, որովհետև կան իրավիճակներ, որոնք, իսկապես, եղել են ինձ հետ։ Ֆիլմում աշխատում են պրոֆեսիոնալներ, ովքեր իրենց փորձով միշտ օգնում են ինձ, խորհուրդներ տալիս»,- ասաց Յուրին։

Նրա խոսքով՝ չնայած իր տարիքին՝ կյանքի բերումով հասցրել է շատ արագ մեծանալ: Ըստ երգչի՝ իր կյանքի պատմությունը լի է ինչպես ուրախությամբ, այնպես էլ տխուր դրվագներով։

«Փորձել ենք ստանալ պատմություն, որը ոչ շատ տխուր է, ոչ էլ կատակերգական։ Կյանքին մոտ մի բան է, իսկ կյանքում ամեն ինչ էլ կա՝ թե՛ հումոր, թե՛ տխրություն։  Կարծում եմ՝ մարդկանց դուր կգա։ Հիմա շատերն են վերադառնում հայրենիք, մեր ֆիլմի հերոսն այդպիսի մեկն է։ Փորձելու ենք մարդկանց սրտին դիպչել,- նշեց երգիչն ու շարունակեց,- Ես միանգամից եմ մեծացել՝ հասունացա կյանքի թելադրանքով։ Բավականին փոքր տարիքում մասնակցեցի հունական «Ձայնը» նախագծին, միանգամից հանդիպեցի մարդկանց թե՛ բարությանը և թե՛ չարությանն ու վատ մտածելակերպին։ Կարծում եմ՝ դիտողները չեն զգա իմ իրական տարիքը, որովհետև իմ մտածելակերպն ու պահվածքը շուտ են հասունացել։ Ես չեմ խաղում, ուղղակի ցույց եմ տալիս իրականությունը»։  

Յուրին հանդիսանում է նաև ֆիլմի կոմպոզիտորը։ Նա որոշել է հայ լսարանին ներկայանալ հայերեն կատարումներով։ «Նախկինում հայերեն երգել եմ, սակայն մայրենի լեզվով հեղինակային ստեղծագործություններ չեմ ունեցել։ Այս ֆիլմի համար ալբոմս ամբողջությամբ հայերեն է։  Հուսով եմ՝ մարդիկ կծանոթնան նաև իմ երգերին։ Ֆիլմի անունը «Վերադարձ» է, հուսամ՝ աշխարհի  բոլոր հայերն էլ կտեսնեն և կմտածեն հայրենիք վերադառնալու մասին։ Իհարկե, ես շատ եմ ուզում  Հայաստանում ապրել, սակայն չգիտեմ, թե հետագայում ինչ կլինի»,- եզրափակեց նա: