«Ես իմ սխալն էլ ունեմ, պետք է մանրամասն ուսումնասիրեի թեման»․ Գոռ Սուջյանը՝ աղմկահարույց ներկայացման դրամաշնորհին կողմ քվեարկելու մասին

ԿԳՄՍ նախարար Արայիկ Հարությունյանն «Ազատություն» ռադիոկայանի եթերում անդրադարձել է Երևանի մետրոպոլիտենի՝ Հանրապետության հրապարակի կայարանում տեղի ունեցած «ՀուԶանք ու Զանգ» բեմականացմանը 2,7 միլիոն դրամ դրամաշնորհ հատկացնելուն և նշել, որ կան մասնագետներ, որոնք ոլորտը լավ գիտեն։ Անդրադառնալով հանձնախմբին և կոնկերտ այդ ներկայացմանը դրական եզրակացություն տված մասնագետներին՝ նախարարը նշել է նաև երգիչ Գոռ Սուջյանի անունը, որը կողմ է քվերակել այդ եզրակացությանը։

Երգիչն այս առիթով գրառում է արել՝ նշելով, որ ինքը նմանբեմականացման հավանություն չի տվել։ «Ինձ հրավիրել են որպես երիտասարդ երաժշտի՝ իմ կարծիքը հայտնելու այս կամ այն մշակութային ծրագրի մասին, բայց ոչ որպես մասնագետ, քանի որ մասնագետն այն անձն է, ով խորապես տեղեկացված է ծրագրերից։ Անձամբ ես տեղեկացված եմ եղել ծրագրերից շատ մակերեսորեն և, եթե չեմ սխալվում, տվյալ ներկայացումը նշվել էր որպես «1920-ականների հայ հեղինակների ընթերցանության օր»: Ամեն դեպքում, ես հավատացյալ քրիստոնյա եմ և եթե ինչ որ մի բան տեսնեի, որը դեմ է քրիստոնեական արժեհամակարգին, հավանություն չէի տա»։

Tert.am Life-ը կապ հաստատեց երգչի հետ ավելի մանրամասն խոսելու թեմայի մասին: Մեր նկատառմանը, որ ինքը, ամեն դեպքում, եղել է հանձնախմբում և ստացվում է, որ կողմ է քվեարկել մի ծրագրի, որի մասին ինֆորմացված չի եղել, արդյոք սա իր բացթողումը չէ, երգիչն արձագանքեց․ «Ես ընդգրկված եմ եղել հանձնաժողովում՝ չնայած ավելի ուշ հրաժարվել էի, որովհետև ժամանակ չունեի, իսկ դրամաշնորհների ներկայացված ծրագրերը շատ ծավալուն էին։ Հանձնաժողովն այդ ծրագրերը կարդում է և տալիս հավանություն կամ ոչ։  Ես ասացի, որ ժամանակ չունեմ, ուզում եմ հրաժարվել, սակայն արդեն ուշ էր։ Արա Խզմալյանն ինձ խնդրեց, որ ես գնամ, իրենք համառոտ կներկայացնեն այն բոլոր ծրագրերը, որոնք արդեն ընտրել են, ես հակիրճ կհասկանամ՝ ինձ դա դո՞ւր գալիս է, թե՞ ոչ։ Հիմա ինքս էլ հասկանում եմ, որ սխալ եմ արել, որ գնացել եմ։ Ես իմ սխալն էլ ունեմ, որովհետև պետք է մանրամասն ուսումնասիրեի, բայց չէի կանխատեսում, որ նման արձագանք կարող էր լինել։ Ինքս ընդամենը կարծիք ասողի դերում եմ եղել, ով մակերեսային ինչ-որ բան է լսել»,- ասաց երգիչը։

Գոռի խոսքով՝ ինքը ծրագրի մասին հակիրճ ինֆորմացիա է ստացել՝ որպես ասմունքի երեկո․
«Ինձ ծրագիրը ներկայացվել է որպես «1920-ականների ասմունքի ընթերցանության երեկո», բայց թե ինչ ձևով են դա ներկայացնելու, տեղյակ չեմ եղել։  Քվեարկել եմ կողմ՝ մտածելով, որ դա ասմունքի երեկո է, մենք էլ բազմիցս քարոզում ենք մեր գրողներին, գեղեցիկ չէր լինի, որ նախագիծը մերժեի։ Ներկայացված միջոցառումների շարքում մի շարք ծրագրեր էին, այդ թվում՝ նվիրված Ռոբերտ Ամիրխանյանին»։

Ըստ երգչի՝ ինքը տեղյակ չի եղել, թե որ նախագծին որքան գումար է հատկացվում․ «Գումարային հարցերի, չափերի մասին տեղեկություն ևս չեմ ունեցել։ Միշտ խուսափել եմ մասնագիտական կարծիք հայտնել կամ որևէ նախագծում ժյուրի լինել, որովհետև ինձ մասնագետ չեմ համարում, որը կարծիքներ է արտահայտում ուրիշների մասին: Այս ինֆորմացիան ցանկացա մանրամասնել, որպեսզի մարդիկ չկարծեն, թե աջակցել եմ դրան։ Առհասարակ, ինքս նման ծրագրով մեկ անգամ եմ դիմել նախարարություն՝ դեռ նախորդ կառավարության ժամանակ, ինչից հետո որոշել եմ այլևս չդիմել պետական մարմնի, քանի որ իմ ծրագիրն աչքաթող արվեց։ Այսինքն՝ ես անգամ իմ ծրագրերի համար չեմ դիմում։ Չնայած միշտ խուսափել եմ նման բաներից, սա ինձ համար մեծ դաս եղավ, որպեսզի  այլևս չլինեմ նման հանձնախմբերում»։  

Գոռից հետաքրքրվեցինք՝ տեսե՞լ է աղմուկ հանած բեմականացումը, ի՞նչ կարծիք ունի դրա մասին․ «Ես այդ բեմականացումից տեսել եմ շատ կարճ դրվագ, որտեղ աղմուկ էր, չեմ կարող տեսակետ հայտնել։ Ես որևէ բան չեմ կարող հիմա ասել՝ ո՛չ դեմ, ո՛չ կողմ, որովհետև ուղղակի չեմ հասկացել»։