«Հայկական երգ կատարելն անչափ պատասխանատու էր»․ Իննա Սայադյանը՝ ռուսական «Ձայնը» նախագծի, նախապես այլ մարզչի ընտրելու որոշման և X-Factor-ի իր մարզչի՝ Էրիկի կարծիքի մասին

Իննա Սայադյանը լսարանին հայտնի է «Շանթ» հեռուստաընկերության X Factor նախագծի չորրորդ եթերաշրջանից։ Էրիկ Կարապետյանի թիմում ընդգրկված աղջիկը նախագծում հասավ եզրափակիչ՝ զբաղեցնելով երկրորդ տեղը։ Հիմա 19-ամյա երգչուհին մասնակցում է ռուսական «Ձայնը» նախագծի 8-րդ եթերաշրջանին։ Իննայի ելույթը կույր լսումների փուլում համացանցում լայն տարածում գտավ և քննարկվեց։  Նախածի այդ փուլի համար երգչուհին ընտրել էր Կոմիտասի երաժշտությամբ և Րաֆֆու խոսքերով  «Ձայն տուր, ով ծովակ» ստեղծագործությունը, թեև վերնագիրը եթերում սխալ էր գրվել՝ «Սարերի հովին մեռնեմ»։  Ժյուրիի բոլոր անդամներն Իննայի ելույթի ընթացքում պտտվեցին, սակայն երգչուհին ընտեց Կոնստանտին Մելաձեին։

Tert.am Life-ն Իննայի հետ զրուցել է երգի, մարզչի ընտրության, X Factor նախագծի ազդեցության և եթերային վրիպակի պատճառի մասին։  

Երգչուհին ժպիտով խոսեց X Factor նախագծի մասին։ Ըստ Իննայի՝ ինքն այդ շրջանում է հստակ որոշում կայացրել, որ ցանկանում է առավել պրոֆեսիոնալ մակարդակով զբաղվել երաժշտությամբ․ «X Factor-ն ինձ համար իսկապես մեծ փորձ էր՝ ինչպես կյանքի, այնպես էլ մասնագիտական առումով։ Նախագծի ողջ ընթացքում ես շատ նոր բաներ սովորեցի և հասկացա, որ պետք է առավել լուրջ մակարդակով զբաղվեմ երաժշտությամբ, որովհետև մինչև այդ ես երգում էի միայն իմ հաճույքի համար: Այդ նախագծում եղան մրցութային առաջին լուրջ նկարահանումներս, ես առաջին անգամ հայտնվեցի էկրանին։ Նախագծի վերջնական արդյունքով ես զբաղեցրի երկրորդ տեղը և շատ ուրախ եմ, որ մասնակցել եմ նախագծի բոլոր նկարահանումներին»։

Երգչուհին նշեց, որ ինքն իրեն մրցութային երաժիշտ չի համարում, սակայն միշտ պատրաստ է սովորել․ «Մրցույթներն ինձ համար հնարավորություն են աշխատելու փորձառու և պրոֆեսիոնալ մարդկանց հետ, հայտնի դառնալու առավել մեծ լսարանի համար։ Ըստ իս՝ սա շատ կարևոր ու անհրաժեշտ է յուրաքանչյուր արտիստի կյանքում, այդ իսկ պատճառով կարելի է ուժերը փորձել մրցույթներում։ Հոգեբանական տեսանկյունից հնարավոր է ինձ անվանել մրցութային վոկալիստ, քանի որ միշտ պատրաստ եմ աշխատել, սովորել նոր բան, ես ինձ համարում եմ սթրեսակայուն։ Երաժշտական մրցութային նախագծի մասնակիցը պետք է լինի համառ, նպատակասլաց,  սթրեսակայուն, կարողանա աշխատել, հետազոտել նոր մի բան, ունակ լինի ուսումնասիրել և ընդունել նորը»։  

Երգչուհին ասաց, որ X Factor-ի իր մարզիչը՝ Էրիկն առաջիններից է եղել, որը գնահատել է իր կատարումը․ «Դեռ փորձերի ժամանակ ելույթիս տեսագրությունն ուղարկեցի Էրիկին, նա գնահատեց, ու ինձ հաջողություն մաղթեց նախագծի հետագա փուլերում»։

Ռուսական «Ձայնը» նախագծին մասնակցելը տարիների ընթացքում Իննայի համար վերածվել է փոքրիկ երազանքի։ Երգչուհին ժպիտով նշեց, որ ժյուրիի էմոցիոնալ արձագանքն իր համար անսպասելի է, բայց շատ ոգևորիչ է եղել. «Իմ թիմի հետ ջանացել ենք հնարավորինս շատ աշխատել երգի և ելույթիս վրա, որպեսզի ռուս լսարանին պատվով ներկայացնենք հայկական գեղեցիկ այդ ստեղծագործությունը։ Ժյուրիի, հանդիսատեսի և հեռուստադիտողների արձագանքն ինձ շատ ուրախացրեց։ Բեմում զգացողություն ունեի, որ այդ պահին երջանկությունից ներքուստ փայլում եմ, խորապես զգացված էի»։

Ժյուրիի և թիմերի ընտրության տեսանկյունից Իննան ունեցել է տարբերակներ և տատանվել է՝ ընտրել Մելաձեի՞ն, թե՝ Շնուրովին։ Իննայի խոսքով՝ մինչ կարտաբերեր Շնուրովի անունը, մտափոխվել է և որոշել գնալ Մելաձեի թիմ․ «Ընտրությունն արել եմ վերջին վայրկյանին, քանի որ Կոնստանտին Մելաձեի հրավերն իր թիմ ինձ շատ համոզիչ թվաց:) Արդեն փորձեր ունեցել ենք։ Ես ստանում եմ իսկապես գործնական խորհուրդներ մարզչիցս, ինչի համար ուղղակի երջանիկ եմ։ Նրա՝ ինձ տված ամենատպավորիչ խորհուրդն այն էր, որ պետք է երգել հոգով։ «Ձայնը» նախագծի ժյուրիի բոլոր անդամներն ինձ համար հանճարեղ են, ընտրությունն ինքնին բարդ էր»։

Անդրադառնալով երգի ընտրությանը՝ Իննան ասաց, որ շատ էր ցանկանում ռուս հանդիսատեսը,  հեռուստադիտողները լսեն դուդուկի հնչյուններն ու հայկական որևէ ստեղծագործություն։

«Ես  որոշում կայացրի կատարել հայկական երգ, ինչի համար շատ ուրախ եմ։ Դա իմ կողմից անչափ պատասխանատու քայլ էր, հարազատներս փորձում էին համոզել, որ այլ բան ընտրեմ, քանի որ նախկինում նման լսարանի համար ազգային երգ չեմ կատարել, սակայն հայկական գեղեցիկ երաժշտությունը ներկայացնելու միտքն ինձ հանգիստ չէր տալիս։ Բարեբախտաբար, երգելիս դժվարություններ չառաջացան։ Ամենից շատ ինձ հետաքրքրում էր այն, թե ինչպես դա կընդունեն իմ հայրենակիցները։ Անհանգիստ էի՝ ճի՞շտ եմ կատարում այդ գործը, արդյոք այն կհասնի մարդկանց հոգիներին»,-նշեց երգչուհին։

Իննայի խոսքով՝ այդ ելույթի կայացման համար իրեն շատ են օգնել պրոֆեսիոնալ մարդիկ․ «Անչափ շնորհակալ եմ հրաշալի երաժիշտ, դուդուկահար Նորայր Բարսեղյանին, ով ինձ խորհուրդ տվեց կատարել հենց այդ ստեղծագործությունը։  Առանց Նորայրի այս ելույթը չէր կայանա։ Այդ դուդկահարի հետ ծանոթության համար երախտապարտ եմ վոկալիստ Սոնա Կուրկջյանին և դուդուկահար Հարություն Խաչատրյանին: Վերջինս ինձ հետ ելույթ ունեցավ բեմում»,-ասաց երգչուհին ու հավելեց, որ հետագա փուլերի համար հանդիսատեսն իրենից կարող է սպասել հեքիաթային մի նոր բան։

Խոսելով եթերում վերնագրի հետ կապված սխալմունքի մասին՝ երգչուհին ասաց․ «Ես միանգամից նկատեցի վրիպակը և նույն պահին տեղեկացրի խմբագրին, դիմեցի նախագծի թիմին, որպեսզի հնարավորինս շուտ ուղղեն այդ կոպիտ սխալը։ «Առաջին ալիքն» այդ վրիպակն արել էր, որովհետև դեռ նախորդ տարի ես նախագծում պետք է ելույթ ունենայի հենց այդ ստեղծագործությամբ (2018 թվականին մասնակցության հայտ ուղարկել էի, սակայն հերթն ինձ չէր հասել, որովհետև բոլոր խմբերն արդեն լրացել էին, ինձ թողեցին հաջորդ տարվա համար)։ Այս տարի մասնակցության համար նկարահանումից ընդամենը 9 օր առաջ հանկարծակի որոշեցի փոխել ստեղծագործությունը՝ նախապես ընտրած «Սարերի հովին մեռնեմ» երգի փոխարեն վերցրեցի «Ձայն տուր, ով ծովակ» ստեղծագործությունը։ Այս պատճառով և հայերենի չիմացության հետևանքով նման անհարմար դրություն ստեղծվեց»։