«Իմ կյանքում շատ դժվարություններ են եղել և ես ինձ համարում եմ պայքարող կին»․ «Մոր խոստումից» Օֆելյա Զաքարյանը՝ նոր ֆոտոշարքի և մյուս մասնագիտության մասին

Օֆելյա Զաքարյանը հեռուստադիտողներին ներկայանում  է «Մոր խոստումը» հեռուստասերիալում՝ մարմնավորելով գլխավոր հերոսուհու՝ Աննայի կերպարը։  Դերասանուհին իր նոր ֆոտոշարքը տրամադրել է Tert.am Life-ին և մեզ հետ զրուցել ֆոտոշարքի, ոճի, չշպարվելու և իր առաջին մասնագիտության մասին։

Դերասանուհին ասաց՝ բավականին երկար ժամանակ ցանկություն է ունեցել ներկայանալ ֆոտոշարքով, սակայն զբաղվածության հետևանքով չի կարողացել։  

«Առաջարկ ստացա մեր հեռուստասերիալի դերասանուհիներից մեկից, որը նաև լուսանկարչությամբ է զբաղվում՝ Լուսինե Թորոսյանից։ Ինքն ասաց, որ սև ու սպիտակ լուսանկարների շարք է անում և առաջարկեց նաև ինձ լուսանկարել։ Պարբերաբար տարբեր ֆոտոսեսիաների առաջարկներ ստացել եմ, սակայն մերժում էի՝  նախ չէր ստացվում, հետո ժամանակս չէր ներում։ Նկարահանումն արել ենք մանկական երկաթուղու հատվածում։ Այնտեղ շատ հետաքրքիր պահեր են եղել, որովհետև կա փոքրիկ լողավազան, որտեղ մարդիկ լողում են, ինքս այդ եղանակին, երկարաճիթ բարձրակրունքներով մտել էի ջուրը և հանուն լուսանկրների, լավ կադրի բավականին թրջվեցի։ Մարդիկ զարմացած նայում էին՝ շատ զվարճալի էր։ Անհամբեր սպասում էի ֆոտոշարքին, որը բավականին լայն արձագանք գտավ»,- ասաց դերասանուհին։

Օֆելյան նշեց՝ հագուստը, ոճն ու տրամադրությունն ինքն է ընտրել և հենց տեղում հնարավորնս արագ զգեստափոխվել է հաջորդ կերպարի համար․ «Պայքարող և ուժեղ կնոջ կերպարով եմ։ Բնությանը համահունչ լուսանկարներն են, որովհետև, կարծում եմ, առհասարակ մարդիկ պետք է բնության հետ ներդաշնակ լինեն։ Ինքս ավելորդություններ, ավելի բաց կերպարներ չեմ սիրում, որովհետև, ըստ իս, կարևորն ասելիքն է։ Հնարավոր է շատ փակ կերպարով մարդն այնքան ասելիք տեղ հասցնի։ Առհասարակ ասելիքը մերկության մեջ չէ։ Առաջարկ ունեցել եմ, որպեսզի հագուստի տեսանկյունից բաց լուսանկարներ ստանանք, սակայն չեմ համաձայնել։ Չնայած կարծում եմ, որ խնդիրը բացի ու փակի մեջ չէ՝ խնդիրն ասելիքի մեջ է։ Իմ կյանքում շատ դժվարություններ են եղել և ես ինձ համարում եմ պայքարող կին։ Դժվարությունները փորձել եմ հաղթահարել և, կարծում եմ, որ ստացվել է»։

Դերասանուհին ասաց՝ երիտասարդ երևալու խնդիր երբեք չի ունեցել և անգամ էկրանին հենդես է գալիս տարիքով կնոջ կերպարով․ «Ուրիշ դերասանուհիներ լինեին գուցե նեղվեին, որ  էկրանին անընդհատ նման կերպարով են, բայց ես նման խնդիր չունեմ, որ ասեմ՝ վայ իմ տեսքը և այլն։ Նախապատվությունս առհասարակ տալիս եմ խաղի որակին․ բնավորությամբ շատ կերպարներ կան, որոնք իրենց դերի մեջ շատ լավն են, բայց խորանալով նկատում ես, որ գեղեցիկ չեն։ Անկախ ամեն ինչից, իհարկե պետք է խնամված լինել։ Ամեն տարիքում էլ մարդը հենց իր տարիքի մեջ է գեղեցիկ»։  

Դերասանուհին ժպիտով ասաց՝ միշտ էլ շատ քիչ է շպարվել։

«Դասական արտաքին ունեմ ու ամենաքիչ շպարն էլ կարող է հետաքրքիր ընգծել։ Անգամ ֆիլմի հետ կապված ինքս եմ առաջարկել, որ դիմահարդարում չլինի, քանի որ տառապած կնոջ կերպար է։ Իրականում, հազվադեպ եմ շպարվում, չնայած սիրում եմ նաև դա։ Առհասարակ կարծում եմ, որ ամեն ինչ չափի մեջ է գեղեցիկ»,- նշեց Օֆելյան։

Հավելենք, որ դերասանուհին զբաղվում է նաև գեղանկարչությամբ և ավարտել է Գեղարվեստի ակադեմիան։ Ֆետոշարքում առկա նկարները հենց նրա վրձնին են պատկանում։

«Չայած ժամանակի սղությանն, ամեն դեպքում, ժամանակ եմ գտնում և լիցքաթափվելու համար նկարում եմ, հագեցնում ստեղծագործական  քաղցս, էմոցիաներս եմ դատարկում։ Փոքրիկիս ծնվելուց հետո ժամական չէի ունենում և  մոտ երեք տարի վրձինը ձեռքս չէի վերցրել։ Երեք տարի անց դա առաջին նկարն էր, որը սոցցանցում հրապարակելուց անմիջապես հետո, գտավ իր տիրոջն ու վաճառվեց։ Բավականին բարդ էր, որովհետև ընդմիջումից հետո իմ արած առաջին գործն էր։ Նախկինում ունեցել եմ և՛ անհատական ցուցահանդեսներ, և՛ խմբակային»,- ասաց դերասանուհին։

Լուսանկարները՝ Լուսինե Թորոսյանի (Լուսավորիկ)