Գարիկ-Սոնայի «հավերժական կռիվը», ծերանալն ու տեսահոլովակի նկարահանման զավեշտալի պահերը

Սոնան ու Գարիկը ծերացան, սակայն նրանց «կռիվն» ուշանալու թեմայով չլուծվեց. մինչ Գարիկը տեսանյութերով պատմում է ուշացող Սոնայի մասին, Սոնան բոլորին փորձում է պատմել, որ այս ամենն անարդար է դառնում, օրինակ, երեկ ինքն է սպասել Գարիկին: Սոնան Գարիկին սպասում էր, որպեսզի լսարանին ներկայացնեն իրենց նոր՝ «Համայակ» տեսահոլովակն ու համերգ ունենան երկրպագուների համար:

Tert.am Life-ը ներկա է եղել տեսահոլովակի շնորհանդեսին և ներկայացնում է հետաքրքիր դրվագներն ու տեսահոլովակի նկարահանման զավեշտալի մանրամասները:

Տեսահոլովակում խմբի անդամները Գարիկի գաղափարով ծերացել են: Պարզվում է՝ Սոնան միշտ ասում է, որ ծերանում է Գարիկի ձեռքին, վերջինս որոշել է ցույց տալ, թե ինչպես դա կարող է լինել:) Ընդ որում՝ նրանք ծերացել են ոչ թե մի կեղծամով, այլ մանրակրկիտ արված գրիմով, որը յուրաքանչյուրի դեպքում տևել է երեքուկես-չորս ժամ՝ չհաշված մինչև այդ իրենց դեմքի սիլկոնային օրինակները վերցնելն ու յուրաքանչյուրի դեմքին համապատասխան կնճիռներ ստանալը:

«Գաղափարը ռիսկային էր. հասկանում էինք, եթե որոշել էինք կերպարանափոխվել, դա պետք է լինի այնքան բնական, որ ձուլվենք տարեցների հետ: Հայաստանում այդ փորձը շատ չի կիրառվում, թվում էր՝ անհնար է գտնել մասնագետների, սակայն պարզվեց, որ կան Դիանա, Ադանե և Սալբի Աղաջանյաններ անունով տաղանդավոր քույրիկներ, որոնք մեզ վրա բառիս բուն իմաստով ստացան նոր մաշկ: Ֆիզիկապես էլ դա բավականին բարդ էր, մեր մաշկը բացարձակ չէր շնչում, ամեն անգամ, երբ ուզում էինք մեր դեմքը քորել, հիշում էինք, որ դա մեր դեմքը չէ, ընդ որում բավականին թանկարժեք դեմք է:) Այդ բոլոր անհարմարությունները հաճելի էին դառնում, երբ հիշում էինք, ինչ արդյունքի համար ենք կրում այդ ամենը»,- ասաց Գարիկը, Սոնան էլ հավելեց, որ արդեն անհետաքրքիր է իրենց ծերանալը, գիտեն՝ ինչպիսին են լինելու:)

«Իրականում, շատ բարդ էր նկարահանվել. տեսնելով մեզ հայելու մեջ, նայելով իրար՝ այնքան էինք ծիծաղում, որ հազիվ էինք լրջանում ու սկսում նկարահանվել: Շատ հետաքրքիր տեսահոլովակ է»,- ասաց Սոնան:

Նկարահանման հրապարակում խմբի անդամները համախմբել էին տարեց մարդկանց: Վերջիններիս մի լավ պարացրել են, իրենք էլ մեծ էներգիա ու բավականություն ստացել նկարահանման ընթացքից: Մեկը մյուսին հերթ չտալով Սոնան ու Գարիկը պատմեցին նրանց էնտուզիազմի, ոգևորության ու առույգության մասին:

«Ֆանտաստիկ կազմ էր հավաքվել: Եթե մենք երեկոյան 6-ի կողմերն արդեն հոգնել էինք, այդ մարդիկ գիշերը 12-ն էր, դեռ պարում էին: Տպավորություն էր՝ ոչ թե մեզ էին ֆեյք ծերացրել, այլ իրենց: Այդ հարցում մեզ շատ օգնեց պրոֆեսիոնալ ու հավեսով Սոնա Եսայանը: Մեծ ռիսկ էր տարեց մարդկանց պարացնելը, բայց նա  առավոտից այնպիսի պարային տրամադրություն ներշնչեց մեր տատիկ-պապիկներին, որ վերջում նրանք չէին էլ ուզում գնալ,- պատմեց Գարիկը ու հավելեց, որ տեսահոլովակի ռեժիսորն Արման Սարգսյանն է: -Իր հետ հեշտ շատ հեշտ է ծիծաղելի աշխատանք ստանալը, քանի որ մասնագիտացած է հումորային սքեթչեր, նախագծեր նկարահանելու գործում: Գաղափարն ավելի զարգացրեց ու լավը դարձրեց»:

Եթե գործունեության սկզբում Գարիկն ու Սոնան միայն երգեր էին թողարկում, ավելի ուշ սկսեցին ուշադրություն դարձնել նաև տեսահոլովակներին: Հիմա հասկացել են՝ որքան էլ երգը սիրված լինի, այն շատ ավելի հաստատուն է լինում, երբ տեսահոլովակ ունի. «Երբ տեսահոլովակ չկա, կարծես, երգը հաստատված չլինի երգարվեստում: Վերջերս դա հասկացանք ու կփորձենք քիչ-քիչ տեսահոլովակով ներկայացնել այն երգերը, որոնք ընդգծված են մեր ծրագրում: Օրինակ՝ «Մայրո» երգը 2 տարի առաջ ենք նվագել, սակայն  մինչև այսօր մեր լսարանը պահանջում է այս երգի տեսահոլովակը: Հուսով եմ՝ այն կունենա տեսահոլովակ: Որոշել ենք տարբեր ոճերի երգերի հիման վրա տեսահոլովակներ ունենալ: Այս անգամ ընտրեցինք «Համայակը», քանի որ այն մեր ռեպերտուարի  միակ էլեկտրո երգն է, բացի այդ, տեսահոլովակի գաղափարին շատ համապատասխան էր»:

Առաջիկայում Գարիկն ու Սոնան կթարմացնեն նաև իրենց երգացանկը. մի քանի նոր երգ, գրեթե, պատրաստ են: Խոստանում են՝ Նոր տարին կդիմավորեն համալրված ու ավելի գունավոր երգացանկով:

«Գրեթե 80 տոկոսով պատրաստ մի քանի երգ ունենք: Գարիկն արել է գործիքավորումները, ես նախնական երգել եմ դրանք: Այս պահին կարևորեցինք տեսահոլովակ նկարահանելը, այդ իսկ պատճառով երգերը մի քիչ ուշացան, սակայն շուտով նոր երգեր կներկայացնենք: Այնքան ենք տրամադրված երգացանկի համալրմանը, որ սկսել ենք ու շուտով կավարտենք ձայնագրման ստուդիայի վերանորոգումը»,- ասաց Սոնան, Գարիկն էլ խոստացավ ավելի շատ ժամանակ տրամադրել երաժշտությանը, քանի որ «Լավ երեկոյի» այս եթերաշրջանն էլ ավարտվել է: