«Բազում կերպարներ եմ կերտել, բայց մարդիկ չգիտեն՝ իրականում ինչպիսին եմ ես»․ Վաչե Թովմասյանը՝ նոր ձևաչափում իր իրական կերպարը ներկայացնելու մասին

Հումորիստ Վաչե Թովմասյանը շուտով հանդես է գալու իր համար նոր՝ «սթենդ ափ» ձևաչափով։ Դերասանի խոսքով՝  նման ցանկություն վաղուց է ունեցել, սակայն միայն վերջերս է որոշել իրագործել այն: Tert.am Life-ի հետ զրույցում Վաչեն պատմեց նախագծի առաջին մանրամասները։

«Ժամանակի սղության պատճառով չէի կարողանում կենտրոնանալ «սթենդ ափ»-ի վրա, անընդհատ զբաղվածություն ունեի հեռուստատեսային տարբեր նախագծերում։  Տարիներ շարունակ եղել են մտքեր, որոնք առանձնացրել եմ։ Այս ընթացքում հավաքված մտքերով ամիսներ շարունակ աշխատում եմ սցենարի վրա։ «Սթենդ ափ»-ը հիմնված կլինի անկեղծ պատմությունների վրա: Կատմեմ դեպքեր, որոնք անձամբ իմ կամ ընկերներիս հետ են պատահել»,- ասաց Վաչեն։

Նա նշեց, որ պահելու է «սթենդ ափ»-ի դասական  ձևաչափը. «Հաճախ ասում են «սթենդ ափ», բայց ներկայացում է լինում՝ շոուի էլեմենտներով, երաժշտական համարներով։ Այն, ինչ ես եմ ներկայացնելու, չի լինելու առանձին համարներով, լինելու է ընկերներիս ինչ-որ բան պատմելու ձևաչափ։ 16+, թե՞ 18+, դեռ չեմ որոշել, բայց առնվազն 16+ է լինելու, որպեսզի ազատ շփվելու հնարավորություն ունենանք։  Սցենարը բավականին հետաքրքիր է, ինչը շատ կարևոր է, որովհետև  նյութի մի հատված կարող է այնքան էլ ծիծաղելի չլինել, սակայն ինֆորմացիոն առումով հետաքրքիր ու ասելիքով լինի։ Չեմ ուզում փակագծերը բացել, բայց ընկերներիս էլ են ներգրավված լինելու, այդ թվում՝ Ռաֆայել Երանոսյանը»։

Դերասանի խոսքով՝ վերջին անգամ ակումբային ելույթով բեմում եղել է «Վիտամին» ակումբի շրջանակում։ Տարիների դադարը պատճառ է դարձել, որպեսզի «սթենդ ափ»-ից առաջ փորձի հաղթահարել հուզմունքն ու անհանգստությունը:

«Մի գաղտնիք բացեմ, երբ սցենարի մի մասը պատրաստ էր, Ռաֆոյին խնդրեցի իր ներկայացումից առաջ դուրս գալ բեմ և փորձել նյութը։ Օրինակ՝ հայտնի դերասան, կատակերգու Էդի Մյորֆին վերջերս հայտարարել է, որ վերադառնում է «սթենդ ափ» ժանր, իր համար ամենաանցանկալին այն պահն է, որ պետք է պտտվի հումորային ակումբներով և փորձի իր նյութը։ Ամբողջ աշխարհում ընդունված երևույթ է մինչև մեծ ելույթը կտոր-կտոր սցենարը փորձելը։ Սա թույլ է տալիս հասկանալ, թե ինչ ավելացումների կարիք կա: Որքան էլ փորձն ու հոտառությունը լինեն, միևնույն է, բեմի փորձը պետք է,- ասաց դերասանն ու հավելեց,- հիմա արդեն զգում եմ, որ պատրաստ եմ  հիմնական ելույթին։ Սա կլինի «սթենդ ափ» երեկո՝ ակումբային ձևաչափով։ Ընտրեցի ակումբ, որպեսզի ավելի անմիջական մթնոլորտ լինի, մարդիկ խմիչք վերցնեն և վայելեն երեկոն»։

Խոսելով բովանդակության մասին՝ հումորիստն ասաց, որ պատմելու է իր ու իր ընկերների հետ պատահած դեպքերի մաիսն․ «Տղաները հիմնականում խոսում են ընդհանրական թեմաներից, որտեղ մարդիկ իրենց կարող են տեսնել՝ օրինակ հայերն իրենց ինչպես են պահում այս կամ այն վայրում։ Խոսում են համընդհանուր բաների մասին, որոնք բոլորին ծանոթ են, բոլորի համար ծիծաղելի, սակայն ինձ մոտ գերակշռելու են ինձ հետ եղած պատմությունները՝ ես ու Արամ MP3-ն մի անգամ Փարիզում մոլորվել էինք, Քաջարանում ելույթից հետո «Վիտամին» ակումբի ողջ կազմին տարել էին գիշերային ակումբ և այլն։ Պատմություններ, որոնց ծանոթ կարող են լինել միայն ինձ մոտ մարդիկ»։

Շարունակելով թեման՝ Վաչեն նշեց, որ բացառել է քաղաքական թեմաները, քանի որ այնտեղ բացասականը շատ է․ «Դա ինձ դուր չի գալիս։ Ասեմ ավելին, մոտ ութ ամիս է, չեմ հետևում որևէ լրատվական կայքի, բացասականն այնքան շատ էր, որ խանգարում էր ինձ անել գործս, որն ուրախության հետ է կապված։ Լրահոսին հետևելով, երբեմն, մտածում էի, որ ամեն ինչ այնքան վատ է, իսկ ես ինչով եմ զբաղվում։ Ուզում եմ մարդիկ գան իմ «սթենդ ափ»-ին ու մոռանան այդ ամենի մասին։ Քաղաքականությամբ ծիծաղեցնելը հեշտ է, հատկապես, որ ունեմ նմանակելու կարողություն դեռ «Ուրախների և հնարամիտների» ակումբից։ Կենցաղային թեմաներ էլ կլինեն, բայց ամեն ինչ իմ տեսանկյունից կներկայացնեմ»։

Դերասանը նկատեց, որ էկրանին միշտ եղել է տարբեր կերպարներով, սակայն այս անգամ բեմում և հանդիսատեսի հետ շփման ժամանակ լինելու է որպես Վաչե․ «Ես բազում կերպարներ եմ կերտել, թե իրականում ինչպիսին եմ, ինչ եմ մտածում, որոնք են ինձ հուզող հարցերը, մարդիկ չգիտեն, հումորի տեսքով երբեք չեմ ներկայացրել։ Սա ինձ համար մի նոր բան է, համոզված եմ, որ շատերին հետաքրքիր կլինի և դուր կգա»։