«Որքան պարզ ես լինում, այնքան մարդիկ քեզ սիրում են»․ Եվա Զոհրաբյանը՝ էմոցիոնալ ֆոտոշարքի ու քիչ դիմահարդարվելու մասին

Դերասանուհի Եվա Զոհրաբյանն Ինստագրամի իր հետևորդներին  դիմանկարների շարք և հոլովակ  է ներկայացրել, որոնց հիմքում իր էմոցիոնալ դաշտն է։ Tert.am Life-ի հետ զրույցում դերասանուհին ասաց ֆոտոշարքը հանպատրաստից է ստացվել։

«Այս լուսանկարների հետ կապված ամեն ինչ պատահականության սկզբունքով է եղել: Կարծում եմ՝ այն, ինչին նախապես չես պատրաստվում, ավելի հաջող, բնական և անկեղծ է ստացվում։ Ըստ իս՝ նախատրամադրվածության դեպքում, ինչ-որ կեղծ բան է լինում»,-ասաց դերասանուհին։ Ըստ Եվայի՝ լուսանկարների այս շարքը բավականին անկեղծ և հետաքրքիր է ստացվել։

«Ժամանակի ընթացքում մարդու մեջ բազմաթիվ էմոցիաներ են կուտակվում, որոնք երբեմն արտահայտում է, երբեմն՝ ոչ, լինում են դեպքեր, երբ մարդը ծիծաղում է, բայց իրականում ուզում է լաց լինել։ Այդ կուտակված էմոցիաները մարդիկ տարբեր ժամանակահատվածներում տարբեր կերպ են արտահայտում։ Լուսանկարների շարքում ևս դա կա՝ դիմախաղի տեսքով։ Դերասանի մեջ այդ էմոցիաները կուտակված են ու ամեն պահի ինքը դա կարող է արտահայտել։ Ամեն մեկը չի կարողանում դա ցույց տալ, իսկ դերասանների մոտ ստացվում է»,-ասաց նա։

Եվան նշեց, որ ինքը պարզության և անմիջականության կողմնակից է՝ հատկապես, երբ անում է մի բան, որի հիմքում էմոցիաներն են․ «Լուսանկարներում դիմահարդարված եմ: Եթե նախապես իմանայի, որ նման բան եմ ստանալու, գուցե, ընդհանրապես չդիմահարդարվեի։ Շպարվել, գրիմով ներկայանալ չեմ սիրում՝ հատկապես, երբ շեշտն էմոցիոնալ դաշտի վրա է։ Նման դեպքերում նկատելի է թե՛ անկեղծությունն ու անմիջականությունը, թե՛ դրանց բացակայությունը։ Որքան պարզ ես լինում, այնքան քեզ սիրում են, որքան ձգտում ես տարբերվել, այնքան հեռանում ես մարդկանցից»։

Լուսանկարներից մեկում Եվան դերասանուհի Մարիամ Ալեքսանյանի հետ է, ով «Դեպի ճամբար» նախագծում նրա խաղընկերուհին էր. «Մարիամի հետ լուսանկարն էլի հանպատրաստից ստացվեց: Լուսանկարիչ Դավիթը, ով Գոշի եղբայրն է, վաղուց էր ասում, որ ուզում է իմ ու Մարիամի մասնակցությամբ ֆոտոշարք անել, բայց ոչ մի կերպ չէր հարմարվում։ Երբ հանդիպեցինք, կարճ ժամանկահատվածում ստանցանք նման հետաքրքիր արդյունք»։

Հարցին, թե ինքն ու Մարիամը նկարահանման հրապարակից դուրս ինչ հարաբերություններ ունեն, դերասանուհին պատասխանեց․ «Շատ լավ, իրեն գիտեմ դեռ Թատերական ինստիտուտից, «Դեպի ճամբար» հեռուստանախագծից հետո մեր շփումն ավելի լավը դարձավ»։ 

Լուսանկարները՝ Dav Acobs-ի