«Իմ մեջ արթնացավ մազոխիստը, ու ես ամուսնացա․․․»․ Վաչե Թովմասյանի սթենդափի պրեմիերան, ինտիմ անկեղծությունն ու հայտնի հյուրերը

Վաչե Թովմասյանի անունը լսելիս շատերս առաջինը հիշում ենք «Վիտամին» ակումբը, որտեղից հումորիստը հայտնի դարձավ: Հենց այս նախագծի ձևաչափով էլ դերասան Ռաֆայել Երանոսյանն ազդարարեց Վաչեի սթենդափի բացումը, ապա բեմ բարձրացան Մհերն ու Բոնին՝  «ԿօօԿօօՌօօզ»-ի ձևաչափով, հաջորդիվ Ռաֆայել Երանոսյանը հատված ներկայացրեց իր «tRaffik» սթենդափից, ինչից հետո միայն հումորիստ, պրոդյուսեր Վաչե Թովմասյանը ներկայացրեց իր առաջին սթենդափը՝ «Դե հիմա էդ ա» խորագրով։

Սթենդափում ներկայացված էին կյանքից վերցրած պատմություններ, իրական դեպքեր և երևույթներ, որոնք Վաչեին նյարդայինացնում են։ Այս ամենի մասին հումորիստն անկեղծ խոսեց, իրերն իրենց անունով կոչեց, իսկ մարմնի մասերն ու բարեմասնությունները՝ իրենց։ Որոշ դրվագներում ցենզուրան զիջեց դիրքերը, սակայն, ինչպես հուշում է սթենդափի խորագիրը, «Դե հիմա էդ ա»։ 

Tert.am Life-ը ներկա է եղել Վաչեի սթենդափին, մինչ ելույթը զրուցել Վաչեի, իսկ ելույթից ու անձնական անկեղծ պատմություններից հետո՝ հումորիստի կնոջ հետ։  

Չնայած բեմին հանդես գալու տարիների փորձին՝ հետնաբեմում Վաչեն անհանգիստ էր ու հուզված․ «Խոսք կա՝ «թիթեռնիկներ փորի մեջ», հիմա ինձ մոտ դա է, թիթեռնիկները խմբով են ու շատ։ Ամեն անգամ ինձ մոտ այդպես է լինում, սակայն այսօր հուզմունքս մի փոքր ավելին է»։

«Իմ մեջ արթնացավ մազոխիստն ու ես ամուսնացա․․․». բեմից հայտարարեց Վաչեն ու շարունակեց սրամտել ամուսնության, համատեղ կյանքի ու փոքրիկ ունենալու մասին։

Սթենդափ ելույթների ժամանակ հիմնական շեշտադրումը ելույթի բովանդակության, խոսքի ու սրամտության վրա է, հումորիստին հանդիսատեսը վաղուց է ճանաչում, իսկ նա էլ՝ իր հանդիսատեսին։ Որոշ դրվագներում սրամտությանը փոխարինելու էին գալիս Վաչեի դերասանական հմտություններն ու հայտնի՝ «տատին ուտի» արտահայտությունը, որը, պարզվում է, հումորիստի բեմից դուրս կյանքի վրա այնքան էլ հումորային ազդեցություն չի ունեցել։

«Հետաքրքրության տեսանկյունից սթենդափում պետք է հաղթի բովանդակությունը, սակայն մենք փորձել ենք այնպես կառուցել սցենարը, որ եթե անգամ ինչ-որ հատված ծիծաղելի չէ, մատուցման ձևը հետաքրքիր լինի»,-ասաց Վաչեն։

Ավելի վաղ Tert.am Life-ի հետ զրույցում Վաչեն նշել էր, որ, գրեթե, բոլոր պատմություններն իր կյանքից են, այդ թվում, ընտանեկան նեղանձնական կատակները։ Որոշ դեպքերում դերասանի անկեղծությունը զարմացնում էր, քանի որ նա անդրադառնում էր նաև շատ անձնական, նույնիսկ, ինտիմ թեմաների: Վաչեի ելույթին առաջին շարքից հետևում էր կինը՝ Գայանեն։ 

Սթենդափի ավարտից հետո մեզ հետ զրույցում նա ծիծաղելով նշեց, որ ծանոթ չի եղել տեքստին և չի իմացել, թե ամուսինն ինչ է պատմելու․ «Գիտեի, որ կյանքից են պատմություններ լինելու, սակայն բովանդակությանը ծանոթ չէի, հետաքրքիր էր այստեղից նայելը։ Մեծ մասամբ պատմություններն իսկապես պատահել էին առօրյայում և շատ ծիծաղելի էին։ Իհարկե, այս ամենին հումորով եմ նայում՝ միայն ու միայն հումորով»։  

Լուսանկարները՝ Էլեն Գասպարյանի