«Խորհրդային ժամանակաշրջանի երգերն անարդարացիորեն մոռացվել են». «Հայ համերգի» երիտասարդ թիմը նորովի կներկայացնի 20-րդ դարի հիթերը

17:19 • 18.12.19

Շոուբիզնես

Խորհրդային տարիների հիթերը՝ նոր մոտեցմամբ ու մեկնաբանմամբ. երաժիշտ Արմեն Մարտիրոսյանի և պրոդյուսեր Ռուբեն Ջաղինյանի նոր համագործակցության արդյունքում ծնվել է «Հայ համերգ» նախագիծը, որի շրջանակում լսարանին արդեն հայտնի երգերը կներկայացվեն նոր երանգավորմամբ:

Tert.am Life-ի հետ զրույցում կոմպոզիտոր, նախագծի երաժշտական պրոդյուսեր Արմեն Մարտիրոսյանը պատմել է նոր նախագծի մանրամասները:

«Այս ամռանը, երբ Հայաստանում էի, հանդիպեցի իմ ընկեր, պրոդյուսեր Ռուբեն Ջաղինյանին և նախնական խոսակցություն ունեցանք այն մասին, որ կարելի է ստեղծել մի համերգային ծրագիր՝ կազմված խորհրդային ժամանակաշրջանի հայկական երգերից։ Միտք ծնվեց անցյալ դարի 40-70-ականների երգերից կազմել ընտրանի՝ մոտ 10-15 ստեղծագործություն, և դրանք նորովի ներկայացնել հանդիսատեսին ուշ աշնանը կամ ձմռանը։ Լոս Անջելես մեկնելուց հետո զանգ ստացա, որ նախագիծը հաստատվել է, սկսեցինք աշխատել այդ ուղղությամբ։ Մեզ բավական մեծ աշխատանք էր սպասվում՝ ընտրել երգերը, մշակումներ անել, կազմակերպել և կյանքի կոչել համերգային ծրագիրը»,- պատմեց երաժիշտը:

Նա հայտնեց, որ երգերն ընտրել են արխիվներից, քանի որ ուզում էին մշակել խորհրդային ժամանակաշրջանում հնչած ստեղծագործություններ։ «Երգերի ընտրության հիմնական սկզբունքը դրանց պոզիտիվ, ռիթմիկ ու մեղեդային լինելն էր և, իհարկե, դրանք երգեր էին, որոնց մեջ սեր կար։ Ընտրված երգերի մեծ մասը ժամանակին սիրված ու տարածված էր, կարող ենք ասել, որ յուրաքանչյուրն իր շրջանի, այսպես կոչված, հիթն էր․ դրանց թվում՝ «Երգ գինու մասին», «Գարնանային երազ», «Մանուշակ», «Խռոված էր», «Երգ սիրո մասին» և այլն։ Ընդհանրապես ինձ սրտամոտ է հին երգերի մշակմամբ զբաղվելը, գործընկերներս գիտեն իմ սկզբունքը, ես հինը նոր շնչով ներկայացնելու կողմնակից եմ»,- ընդգծեց երաժիշտը:

Այժմ բավականին նորաձև է հայտնի երգերի վերամշակումը։ Հարցին, թե այդ բազմազանության մեջ ինչո՞վ կառանձնանա «Հայ hամերգը», նա պատասխանեց. «Իրոք, կա նման միտում, սակայն մեր ծրագիրը տարբերվում է նրանով, որ սա խմբային աշխատանք է, այստեղ մասնակցում են թե՛ վոկալիստներ, թե՛ օրկեստր, թե՛ պարողներ։ Հայաստանում ընդունված է հին երգերի մշակումների կատարումը անհատների կողմից, իսկ մեր ծրագիրն անձնավորված չէ, թիմային է։ Բացի այդ, մեր ծրագրի գործող անձերից մեկն էլ Երևանն է, որի անցյալը ներկայացնող դրվագները համերգի ընթացքում ժամանակ առ ժամանակ ցուցադրվում են էկրանին։ Կարծում եմ՝ սա մի յուրօրինակ կամուրջ է անցյալի ու ներկայի միջև»։

Խմբի կատարողական կազմին ընտրելը հաջորդ քայլն էր, որը բավականին աշխատատար էր: «Հայ համերգի» մեներգիչներն են՝ Վահե Ալեքսանյանը, Սարո Գևորգյանը, Արմեն Չամիչյանը, Սոնա Վարպետյանը, Անահիտ Հակոբյանն ու Մանե Տոնոյանը:

«Առաջին իսկ պահից պետք էր հասկանալ մասնակիցների կազմը, թե ովքեր պետք է լինեին երգերի կատարողները, անշուշտ դա կարևոր էր։ Երևանում կազմակերպվեցին լսումներ՝ ի հայտ բերելու նոր անուններ և նոր ծրագրին մասնակից դարձնելու մերօրյա երգիչ-երգչուհիների: Քանի որ ես ծրագրի երաժշտական պրոդյուսերն էի, կատարողների ընտրության հարցում իմ կարծիքն առաջնային էր։ Սկսվեցին քննարկումները հեռախոսով, համացանցով, այսօր տեխնիկական հնարավորությունները թույլ են տալիս նման գործեր իրականացնել հեռավորության վրա։ Բավականին ժամանակ անցավ, մինչև երկարատև լսումներից ու քննարկումներից հետո հաստատվեց կատարողների ներկայիս՝ վերջնական կազմը»:

«Հայ համերգ» անվան ընտրությունն էլ պատահական չէ. այն ասոցացվում է խորհրդային ժամանակաշրջանում հայտնի նույնանուն կազմակերպության հետ: «Այն լայն գործունեություն էր ծավալում՝ կոորդինացնելով համերգային խմբերի, համույթների ելույթները, հյուրախաղերը խորհրդային բոլոր հանրապետություններում։ «Հայ համերգ» անվանումը ինչ-որ կերպ խորհրդանշում է այն ժամանակների Հայաստանի երաժշտությունը: Եվ հետո, եթե հումորային մեկնաբանություն անեմ՝ «Հայ», որովհետև հնչում են հայկական երգեր, «համերգն» էլ՝ դե որովհետև ի վերջո սա համերգ է»,- ծիծաղելով ասաց նա:

Դեկտեմբերի 20-ին և 21-ին «Հայ համերգը» համերգ կունենա Երևանում, որը, ըստ պրոդյուսերի, կառանձնանա կատարված աշխատանքով: Արմեն Մարտիրոսյանը նշեց, որ ստեղծագործական աշխատանքներում ներգրավված է շատ ուժեղ թիմ։ Նա նկատեց, որ նախագիծը կյանք են կոչել երիտասարդ կազմով, որտեղ յուրաքանչյուրը զբաղվում էր իր գործով: Երաժշտական մասով զբաղվել է Արմեն Մարտիրոսյանը, բեմադրող ռեժիսորը Դավիթ Բաբայանն է, վոկալով զբաղվել է Արաքսյա Մուշեղյանը, պարերը բեմադրել է Քրիստինա Ավագիմյանը, աշխատանքները կոորդինացրել է գծային պրոդյուսեր Դավիթ Միրոյանը։ Ծրագրի իրագործմանը մեծ աջակցություն է ցուցաբերել «Շարմ» ընկերությունը։

«Պետք է նկատեմ, որ այս միջոցառումն իր ձևաչափով այնքան էլ համերգ չէ՝ ինչպես ընդունված է սովորական ընկալմամբ։ Սա լայնածավալ աշխատանք է, աուդիովիզուալ մի ամբողջ ներկայացում ՝ լուսային և ձայնային միջոցների կիրառմամբ, նվագախմբի մասնակցությամբ և պարային շոուով։ Հետևաբար` այսպիսի շոուն նախապատրաստական մեծ աշխատանք էր պահանջում։ Պետք էին մարդիկ, ովքեր իրենց գործի գիտակներ էին»,- ասաց նա ու հավելեց, որ նախագծի գործունեությունը չի սահմանափակվի այս համերգով:

«Մեր ցանկությունն է, որ Երևանը որոշ քաղաքների նման ունենա իր շոուն, ինչով կարող է ներկայանալ զբոսաշրջիկներին, քաղաքի հյուրերին՝ նրանց ծանոթացնելու այդ ժամանակաշրջանի մեր քաղաքային մշակույթին և ցույց տալու այսօրվա մեր մոտեցումը անցյալին։ Սա մի նախագիծ է, որը մեր պատկերացմամբ պետք է դառնա մշտապես գործող շոու։ Ընդհանրապես, խորհրդային ժամանակաշրջանի երգերն անարդարացիորեն մոռացվել են, սակայն դրանք բավականին մեղեդային և գեղեցիկ նմուշներ են։ Բացի այդ, և՛ երաժշտական, և՛ դիտարժանության առումով գրավիչ այս ներկայացումը արտահանելու նպատակ ունենք, որպեսզի աշխարհի հայաշատ վայրերում ևս մեր հայրենակիցները հնարավորություն ունենան վայելելու իրենց համար հոգեհարազատ հայ երգը»,- նշեց երաժիշտը:

Հեղինակ Ամալյա Հովհաննիսյան