«Շատ սիրահարված եմ, այն, ինչ զգում եմ, սովորական սիրահարվածություն չէ»․ Անելյա Գուբրյանը՝ սիրելիի և 2019 թվականի ամենամեծ կորստի մասին

19-ամյա մոդել, դերասանուհի Անելյա Գուբրյանի համար 2019 թվականը հագեցած ու աշխատանքային է եղել։ Ամփոփելով անցնող տարին՝ Անելյան ասաց, որ դժգոհելու առիթ չունի` անձնական կյանքում եղած ձեռքբերումը լրացնում է կյանքի մյուս ոլորտների անկումները։

Tert.am Life-ի հետ զրույցում դերասանուհին պատմել է 2019 թվականի վայրիվերումների, սիրահարվելու և անձնական կյանքում փոփոխության մասին։

«2019 թվականն ինձ համար վերելքներով  ու անկումներով հագեցած տարի էր։ Այս տարին շատ հետաքրքիր էր, որովհետև յուրաքանչյուր անկման հաջորդել է մի իրադարձություն, որն ինձ ուրախացրել ու գոհացրել է։ Կարևորն այն է, որ ամեն ինչ իր ճիշտ ժամանակին է եղել։ Իհարկե, ավելի շատ սպասելիքներ կարող էին իրականանալ, է՛լ ավելի հագեցած տարի կարող էր լինել։ Ամեն դեպքում, ես ռեալիստ եմ և հասկանում եմ՝ միշտ ու ամեն ինչ չէ, որ կյանքում հարյուր տոկոսով իրականանում է»,-ասաց Անելյան։

Մոդելն առանձնացրեց 2019 թվականի ամենամեծ կորուստն ու խոսեց ամենասպասված ձեռքբերման մասին․ «Տարվա ընթացքում մեծ կորուստ ունեցա՝ ամենամեծ կորուստս զուր վատնած ժամանակն է, որը սխալ մարդկանց վրա եմ ծախսել։ Ժամանակը շատ եմ գնահատում և համարում եմ մեր կյանքի ամենաթանկ երևույթներից մեկը։ Երևի ամենից շատ հենց ժամանակիս համար եմ ափսոսում։ Տարվա ամենամեծ ձեռքբերումս անձնական կյանքում էմոցիոնալ կայունությունն է։ Մի տեսակ ներքին հանգստության եմ հասել՝ հասկանում եմ ինչ եմ զգում և, ամենակարևորը, գիտեմ՝ ինչպես վարվել զգացմունքներիս հետ»։  

Անդրադառնալով անձնական կյանքում փոփոխությանը՝ Անելյան ժպիտով խոստովանեց․ «Շատ սիրահարված եմ․․․ Այն, ինչ հիմա եմ զգում, սովորական սիրահարվածություն չէ։ Թե ընտրյալս ով է, ինչ մասնագիտության տեր է ու ինչ ոլորտից է, չեմ ուզում նշել։  Անձնականում լուրջ փոփոխության ինքս դեռ պատրաստ չեմ, հիմա սպասելիքներ չունեմ։ Թե երբ պատրաստ կլինեմ, երբ այդ պահը կհասունանա, չգիտեմ։ Անձնական էմոցիաների տեսանկյունից առայժմ լրիվ բավարար է այն, ինչ կա»։

19-ամյա մոդելի խոսքով՝ որևէ թեմայի վերաբերյալ խոսել չի խուսափում, սակայն գիտի՝ թեման որքան է պետք բացել․ «Ինքս շատ բաց մարդ եմ՝ թաքցնելու, ինչ-որ իրադարձություններ պահելու անհրաժեշտություն չունեմ։ Եթե հանգիստ ու վստահ եմ լինում, խոսում եմ, սակայն չեմ սիրում, երբ փորփրում են կյանքիս այն կողմերը, որոնց մասին բարձրաձայնել ինքս չեմ ուզում։ Մենք ապրում ենք մի քաղաքում, որտեղ քննարկումներն ու խոսակցությունները շատ են, ես դա չեմ սիրում։ Առհասարակ, ինտրիգների սիրահար չեմ, այդ ամենից որքան հեռու, այնքան լավ։ Իմ էմոցիոնալ կայունությունը չխախտելու համար որոշ թեմաների մասին աշխատում եմ շատ չխոսել»։

Հարցին, թե ինչ է սովորել 2019 թվականից՝ Անելյան պատասխանեց․ «Ես իմ կյանքը սիրում եմ, սիրահարված եմ կյանքիս իր ամենավատ ու լավ իրադարձություններով։ 2019 թվականն ինձ սովորեցրեց զերծ մնալ սպասելիքներից, որովհետև կյանքում միշտ չէ, որ ամեն ինչ լինում է քո ուզածով։ Գալիս է մի պահ, երբ հիասթափվում ես քո իսկ ցանկությունների պատճառով»։