«Հայ համերգի» շնորհանդեսը, պատրաստած շոուն ու հայտնի հյուրերը

13:43 • 23.12.19

Շոուբիզնես

Խորհրդային միության տարիներին հնչած երգեր, որոնք ծանոթ են ոչ միայն ավագ, այլև երիտասարդ սերնդին, սակայն կարող են մոռացվել, եթե նոր շունչ չստանան․ այս երգերին նոր կյանք տալու մտքով կոմպոզիտոր Արմեն Մարտիրոսյանն ու պրոդյուսեր Ռուբեն Ջաղինյանը մտահղացան ստեղծել «Հայ համերգ» նախագիծը։

Նախագծի շնորհանդեսը կայացավ համերգով, որին ստեղծագործական թիմը երկար էր նախապատրաստվել։ Երգերի վերամշակումից մինչև բեմականացում ու աուդիովիզուալ էֆեկտներ մանրակրկիտ մշակված էին։

Tert.am Life-ը ներկայացնում է համերգի հետաքրքիր դրվագները։ Նախորդ դարն 40-70-ական թվականների հիթերին նոր շունչ տալու համար պրոդյուսերական կազմը փնտրում էր երիտասարդ նոր անունների։ Կատարողական կազմին Արմեն Մարտիրոսյանն ընտրել է երկարատև լսումների ու քննարկումների արդյունքում։

Ի վերջո, «Հայ համերգը» ներկայացնում են Վահե Ալեքսանյանը, Սարո Գևորգյանը, Արմեն Չամիչյանը, Սոնա Վարպետյանը, Անահիտ Հակոբյանն ու Մանե Տոնոյանը: «Հայ համերգ» անվան ընտրությունն էլ պատահական չէ. այն ասոցացվում է խորհրդային ժամանակաշրջանում հայտնի նույնանուն կազմակերպության հետ, որն իր ժամանակին լայն գործունեություն էր ծավալում։

Ստեղծագործական թիմը մտադիր չէ սահմանափակել «Հայ համերգի» գործունեությունը միայն այս համերգներով։ «Մեր ցանկությունն է, որ Երևանը որոշ քաղաքների նման ունենա իր շոուն, ինչով կարող է ներկայանալ զբոսաշրջիկներին, քաղաքի հյուրերին՝ նրանց ծանոթացնելու այդ ժամանակաշրջանի մեր քաղաքային մշակույթին և ցույց տալու այսօրվա մեր մոտեցումը անցյալին։ Սա մի նախագիծ է, որը մեր պատկերացմամբ պետք է դառնա մշտապես գործող շոու։ Ընդհանրապես, խորհրդային ժամանակաշրջանի երգերն անարդարացիորեն մոռացվել են, սակայն դրանք բավականին մեղեդային և գեղեցիկ նմուշներ են։ Բացի այդ, և՛ երաժշտական, և՛ դիտարժանության առումով գրավիչ այս ներկայացումը արտահանելու նպատակ ունենք, որպեսզի աշխարհի հայաշատ վայրերում ևս մեր հայրենակիցները հնարավորություն ունենան վայելելու իրենց համար հոգեհարազատ հայ երգը»,- ասաց երաժշտական պրոդյուսեր Արմեն Մարտիրոսյանը: