«Առաջին հայացքից սիրահարվեցի, տեսահոլովակի առաջարկն արեցինք, որ խոսեմ իր հետ». Բեն Ավետիսյանը՝ իր և Դիանայի սիրո պատմության ու հարաբերություններն օրինականացնելու մասին

Դերասան Բեն Ավետիսյանն առաջին անգամ խախտել է անձնական կյանքի մասին լռությունն ու հրապարակայնորեն սեր խոստովանել դիմահարդար Դիանա Տոնոյանին՝ այսպիսով խոսելով անձնական կյանքի մասին:

Tert.am Life-ի հետ զրույցում Բենը պատմել է իր ու Դիանայի սիրո պատմության, նրա ուշադրությանն արժանանալու համար տեսահոլովակում նկարահանվելու առաջարկ անելու և հարաբերություններն օրինականացնելու մասին, ինչպես նաև լուսանկարներ է տրամադրել սիրելիի հետ:

Պարզվում է՝ դերասանը սիրահարվել է առաջին հայացքից, իսկ Գևորգ Սիրեկանյանի տեսահոլովակը, որտեղ նա և Դիանան նկարահանվել են որպես սիրահար զույգ, պատրվակ է եղել սիրելիի հետ ծանոթանալու համար:

«Նախքան տեսահոլովակը ես տեսա իրեն փողոցում և առաջին հայացքից սիրահարվեցի: Հետո ընդհանուր ծանոթների միջոցով գտա նրան: Դիանայի հետ խոսելու միակ առիթը տեսահոլովակում նկարահանվելու առաջարկն անելն էր: Իրականում այդ ամենը ծրագրված էր»,- խոստովանեց դերասանը:

Այս տեսահոլովակը, սակայն, միակ աշխատանքն է, որտեղ Դիանան ներկայացել է որպես մոդել: «Հետագայում Դիանան մասնագիտացավ դիմահարդարման մեջ: Այժմ իր առաջնային մասնագիտությունը դա է»,- պարզաբանեց դերասանը:

Թե ինչով աղջիկն առաջին իսկ հայացքից գրավեց դերասանին, նա պատասխանեց. «Անծանոթ մարդուն միշտ էլ սիրահարվում ենք իր գեղեցիկ լինելու համար: Ինձ հետ էլ այդպես եղավ, հետո բացահայտեցի նույնքան գեղեցիկ ներաշխարհ, որին սկսեցի սիրահարվել ամեն օր»:

Բենի խոսքով՝ Դիանան աղջկա իր իդեալն է: «Նրան հանդիպելուց հետո կյանքս միայն դեպի լավն է փոխվել»,- ընդգծեց նա:

Գարնանը Tert.am Life-ին տված հարցազրույցում դերասանն ասել էր, որ անձնական կյանքի մասին կխոսի այն ժամանակ, երբ լուրջ ու վստահ քայլ կանի: Բենի խոսքով` խնդիրը ոչ թե հարաբերությունների լուրջ կամ անլուրջ լինելն է, այլ երկկողմանի հստակ որոշումը։

Հարցին, թե 3 տարի ընկերություն անելուց հետո ինչո՞ւ կյանքի հենց այս էտապում որոշեց խոսել անձնական կյանքի մասին, դերասանը պատասխանեց. «Այդպես ուզեց Աստված, այդպես ուզեցինք մենք: Ի վերջո, մտադրված գաղտնի չէինք պահում մեր անձնական, ուղղակի հիմա հասունացավ պահը»:

Բենի խոսքով՝ իրենց հարաբերությունները դեռ չեն օրինականացրել, սակայն առաջիկայում կանեն այդ քայլը: 2020-ին հարսանիք սպասե՞լ, թե՞ ոչ, դերասանն էլ դեռ չգիտի, սակայն հարաբերությունները գնում են դեպի ամուսնություն:

«Ինչպես բոլոր նորմալ մարդկանց մոտ, հստակ ցանկություններ կան: Դրա ժամանակը, իհարկե, կգա»,- նշեց նա:

3 տարվա ընթացքում Բենն ու Դիանան ունեցել են նաև վեճեր, բաժանվել են, սակայն հասկացել են, որ պետք է հաղթահարել բոլոր տարաձայնությունները:

«Այս ընթացքում եղել են ընդհարումներ, բաժանություններ, ինչպես բոլոր զույգերի մոտ: Իրականում, կարևոր չէ, թե ով կանի հաշտվելու առաջին քայլը, բայց միշտ ես եմ անում»,- ասաց դերասանն ու հավելեց, որ իրենց հարաբերություններում ամենից շատ կարևորում է սերը, հարգանքը, շնորհքն ու վստահությունը: