«Տարեվերջին անձնական կյանքումս շատ լավ փոփոխություններ եղան»․ Էլեն Ասատրյանը՝ Ամանորն աշխատավայրում նշելու և 2019-ի փոփոխությունների մասին

15:34 • 27.12.19

Շոուբիզնես

2020 թվականն Առնետի տարի է։ Դերասանուհի Էլեն Ասատրյանը ծնվել է կենդանակերպի այս նշանի տակ և դրական է տրամադրված տարվան, վստահ է, որ սա իր տարին է լինելու ոչ միայն հորոսկոպի, այլև գրանցած հաջողությունների տեսանկյունից։

Tert.am Life-ի հետ զրույցում Էլենը խոսել է 2020 թվականից իր սպասումների, անցնող տարվա անձնական ու գործնական փոփոխությունների և Ամանորն աշխատանքային տարբերակով դիմավորելու մասին։

«Ընտանիքս նորմալ է արձագանքում, որ Ամանորն աշխատավայրում եմ դիմավորում, երևի, չեն էլ նկատում բացակայությունս։ Առաջին տարին չէ, որ ես ընտանիքիս հետ չեմ նշում, որովհետև մեր տանը դիմավորում են նոր տարին ու շուտ քնում։ Ես իմ բնույթով բավականին ակտիվ մարդ եմ, եթե չաշխատեի էլ, այդ օրը տանը չէի դիմավորի։ Աշխատանքի վայրում ես ավելի շատ եմ լինում, քան տանը, այդ իսկ պատճառով վստահ եմ, որ մի քանի վայրկյան բեմին լինելուց հետո հետնաբեմում լավագույն Նոր տարին ենք նշելու։ Բոլորն էլ, կոպիտ ասած, իրենց ընտանիքներից կտվել են, եկել աշխատավայր և ուզում են լավ Նոր տարի ունենալ։ Համոզված եմ, որ գործընկերներիս հետ շատ լավ ենք նշելու Նոր տարին»,-ասաց Էլենը։

Դերասանուու խոսքով՝ մանրակրկիտ պատրաստվում է Ամանորին. «Շատ երկար եմ պատրաստվում նոր տարվան, արդեն իսկ վազքի մեջ եմ։ Նախորդ տարի Ամանորի համար կարմիր զգեստ էի ընտրել, հետո հասկացա, որ փայլեր շատ եմ սիրում։ Նախապես որոշել էի, որ այս տարի look-իս մեջ փայլերը գերակշռելու են։ Զգեստս արդեն ընտրել եմ, թե ինչ դիմահարդարմամբ կլինեմ, դեռ չեմ որոշել։ Իհարկե, դիմահարդարումս էլ եմ փայլերով ու տոնական պատկերացնում»,- ասաց դերասանուհին։

Նախատոնական այս շրջանում Էլենը հիմնական ժամանակը տրամադրում է արտաքին խնամքին, իսկ տանն ընտանիքին օգնում է միայն ֆինանսական տեսանկյունից․ «Տանը միայն տոնածառն է, ոն անպայման պետք է իմ ձեռքով զարդարեմ։ Օրեր առաջ մինչև առավոտյանը ժամը 6-ը տոնածառ եմ զարդարել։ Ընտանիքիս անդամներն ասում էին՝ մի քիչ համբերիր, մինչև օրը բացվի, բայց ես տրամադրված էի, որ մեր բնակարանն այս օրերին պետք է տոնական տեսք ունենա»։

Դերասանուհին նշեց, որ գերծանրաբեռնված գրաֆիկով աշխատում է և շարունակելու է աշխատել, 2020-ին էլ մարտական է տրամադրված։

«Այս տարի շատ լավ էմոցիաներ ունեմ, որովհետև իմ տարին է։ Բարձր տրամադրությամբ կդիմավորեմ Ամանորը՝ վստահ եմ, որ այս տարին ինձ համար շատ լավն է լինելու։ 2020 թվականին մարտական եմ տրամադրված, ինձ անպայման տեսնելու են էկրանին։ Նաև նոր տեսահոլովակ ենք պատրաստում: Մտածում էի մինչև Ամանոր ներկայացնել այն, սակայն ինձ խորհուրդ տվեցին թողարկել 2020 թվականին, ոչ թե 2019-ի վերջում»,-ասաց Էլենը։

2019 թվականն դերասանուհին բաժանեց երկու էտապի՝ առաջին հատվածում ամեն ինչ վատ է եղել, երկրորդում՝ հարթվել է։

«2019 թվականի վերջին անձնական կյանքումս շատ լավ փոփոխություններ ունեցա, որոնց մասին չեմ ուզում խոսել։ Իսկ տարեսկիզբը բավականին վատն էր՝ ինձ վատ մարդիկ էին շրջապատել, որոնցից, փառք Աստծո, կարողացա ազատվել։ Այս տարի հասկացա, որ երբեք չպետք է կուրորեն վստահես ինչ-որ մեկին, կյանքում շատ են զարմանալի երևույթները, գուցե, նախկինում երբեք չեմ հասկացել այդ բառի իմաստը։ Այս տարի ինձ համար բացահայտել եմ մարդկանց, որոնց մասին պատկերացումներս բոլորովին այլ էին, մտքովս անգամ չի անցել, որ երբևէ կարող է դադարեցնեմ շփումս նրանց հետ։ Իմ լավ ընկերներն ու մտերիմ ընկերուհիներս կողքիս են եղել և օգնել, որ ես ամեն ինչ հաղթահարեմ»։