«Ես և աղջիկս արդեն զարդարել ենք մեր տոնածառը»․ Էմմա Մանուկյանը՝ նախատոնական տրամադրության և Ամանորը դիմավելու նախընտրելի տարբերակի մասին

11:30 • 30.12.19

Շոուբիզնես

Դերասանուհի Էմմա Մանուկյանի մոտ տոնական տրամադրությունը մեկնակրոմ է միայն դեկտեմբերի 31-ին, սակայն տան ինտերիերին տոնական շունչ սիրում է հաղորդել շատ ավելի վաղ։

Tert.am Life-ը Էմմայի հետ զրուցել է Ամանորը դիմավորելու, 2020 թվականի սպասելիքների և Ձմեռ պապիկից իր ցանկության մասին։

Այս տարի, ինչպես սովորաբար, դերասանուհին Նոր տարին կդիմավորի նախ տանը, հետո արդեն ընկերական միջավայրում։

«Սիրում եմ Ամանորը՝ դեկտեմբերի 31-ի կեսգիշերը, դիմավորել տանը, իսկ հետո ընկերներիս հետ գնալ ինչ-որ տեղ և ուրախանալ։ Այս տարի ևս Ամանորը նախատեսում եմ դիմավորել ընտանիքիս, ընկերներիս հետ և որ ամենակարևորն է՝ ուրախ սրտով։ Կարծում եմ, կարևոր չէ, թե որտեղ ես դիմավորում Նոր տարին, ինչ ճոխության սեղանների շուրջ՝ կարևորը սիրելի մարդկանց հետ և ուրախ տրամադրությամբ»,- ասաց Էմման։

Դերասանուհին սիրում է զբաղվել տան ձևավորմամբ և այդ առումով արդեն օգնական ունի՝ դուստրը՝ 7-ամյա Սառան։

«Շատ եմ սիրում տունը զարդարելու ընթացքը և եթե անկեղծ, կարելի է ասել, Ամանորին հենց միայն դա էլ սիրում եմ՝ ուրիշ ոչ մի բան։ Տոնական տրամադրությունն ինձ մոտ մեկնարկում է հենց դեկտեմբերի 31-ին, չնայած ես և աղջիկս արդեն զարդարել ենք մեր տոնածառը։ Չգիտեմ աղջիկս իսկապես հավատում է Ձմեռ պապիկի գոյությանը, թե ոչ, համենայն դեպս, ասում է, որ հավատում է և բացի դա, անպայման Ձմեռ պապիկին նամակներ էլ է գրում»,-նշեց Էմման։

Մտերիմների համար նվերներ ընտրելն ու գնելը դերասանուհուն հեշտ է տրվում․ «Ես միշտ գիտեմ, թե ընտանիքիս անդամներն ինչ կցանկանային ունենալ և ըստ դրա կողմնորոշվում եմ։ Կարծում եմ, սիրելիների համար նվեր ընտրելը հեշտ է»։

Ձմեռ պապիկից Էմման ցանկանում է առողջություն, որովհետև, ըստ նրա, դա ամենակարևոր բանն է, ինչը կարելի է ցանկանալ։

Ամփոփելով անցնող տարին և խոսելով 2020-ի սպասելիքների մասին՝ դերասանուհին նշեց․ «2019 թվականը հրաշալի, երջանիկ և բեղմնավոր իրադարձություններով լի տարի էր ինձ համար։ 2020 թվականից ակնկալիքներ չկան, ուղղակի թող բարին լինի»։