Հասմիկ Խոջյանի հեքիաթային հանգիստն ու անմոռանալի տպավորությունները

Դերասանուհի Հասմիկ Խոջյանն Ամանորը դիմավորել է Մոսկվայում, որտեղից օրերս է վերադարձել Հայաստան և արդեն աշխատանքային առօրյայի մեջ է: Հասմիկը Tert.am Life-ին պատմել է իր ճամփորդության և սերիալում նկարահանվելու բարդության մասին:

Մոսկվայում անցկացրած օրերը դերասանուհին բնորոշեց հեքիաթային: Հասմիկն առաջին անգամ չէր Մոսկվայում, սակայն նկատեց, որ Ամանորին լույսերի մեջ ողողված քաղաքը բոլորովին այլ տրամադրություն է ստանում:

«Ինձ ամենից շատ տպավորել է Մոսկվայի հեքիաթը: Երբ այլ սեզոնի ես լինում Մոսկվայում, այնտեղ չկա այն, ինչ կա Ամանորին: Ձյուն քիչ եկավ, սակայն երբ գալիս էր, ամբողջը սպիտակով էր ծածկում, խառնվում տոնական լույսերին ու ինձ թվում էր՝ հեքիաթում եմ, չէի հավատում, որ աշխարհի վրա եմ»,- պատմեց նա:

Ըստ Հասմիկի՝ միակ թերությունը ցուրտն է, բայց այս տարի այն այնքան սաստիկ չի եղել, ինչպես բնորոշ է Մոսկվային: Այնուամենայնիվ, Հասմիկը հասցրել է մի լավ մրսել: «Մինչև մեկնելս պայմանավորվել էի ֆոտոշարքեր իրականացել, սակայն չէի պատկերացնում, թե այնտեղ ինչպիսի ցուրտ է: Ֆոտոշարքերը դրսում պետք է անեինք: Հասկացա, որ դիմանալն անհնար է լինելու և չեղարկեցի պայմանավորվածությունները»,- ասաց նա:

Ճամփորդությունից դերասանուհին շատ գոհ է. հասցրել է նորովի բացահայտել Մոսկվան, որի հանդեպ նախկինում անտարբեր էր: «Սովորաբար բոլոր օրերս պլանավորած եմ մեկնում ճամփորդության, միակ վատ բանն այն էր, որ ձմռանն օրերը շատ կարճ են: Առավոտյան 10-ին լույսը բացվում էր, 16-ին արդեն մթնում: Անկախ ամեն ինչից՝ հասցրեցի շատ տեղեր գնալ, հետաքրքիր թանգարաններ այցելել: Եղել եմ օղու, հացի թանգարաններում: Շատ հետաքրքիր էր»,- ասաց նա ու հավելեց, որ թանգարանի առաջարկած օղին չի փորձել, քանի որ մենակ էր, ինքն էլ խմել շատ չի սիրում:

Ճամփորդությունների ընթացքում Հասմիկը կարևորում է քաղաքը ճանաչելը, ընդ որում՝ դա անում է ոչ միայն տեսարժան վայրեր այցելելով: Դերասանուհին քաղաքը ճանաչելու իր տարբերակն ունի: Սիրում է քաղաքը տեսնել վերևից: Ռուսաստանի մայրաքաղաքում այդ հնարավորությունը տալիս է «Մոսկվա սիթին», որը Հասմիկը բաց թողնել չէր կարող: Այնտեղ անմոռանալի ժամանակ է անցկացրել:

Պարզվում է՝ դերասանուհին զբոսնելու սիրահար չէ, սակայն ճամփորդությունների ընթացքում իր համար ռեկորդներ է սահմանում. «Մեկ օր 18 կմ քայլել էի, Երևանում այդքան մեկ շաբաթվա ընթացքում էլ չեմ քայլում: Երբ սկսում ես զբոսնել օտար քաղաքներում, հետաքրքիր բացահայտումներ ես անում, ինչը մոռացնել է տալիս, որ զբոսնել չէիր սիրում»:

Դերասանուհու ընտրությունը կանգ էր առել Մոսկվայի վրա անձնական պատճառով. «Քանի որ եղբայրս ընտանիքի հետ այնտեղ է ապրում, մեկնեցի Մոսկվա, որպեսզի Նոր տարին իրենց հետ դիմավորեմ: Այսպիսի Նոր տարի երբեք չէի ունեցել. և՛ խառն էինք, ինչպես լինում է Ամանորին, և՛ շատ հանգիստ՝ երեխաների հետ, կարոտած: Ներսից եկող խաղաղություն կար, որով եզրափակեցինք տարին ու դիմավորեցինք նորը: Հուսով եմ՝ ամբողջ տարին այդպես կանցնի»:

Տարին նոր է սկսել և Հասմիկը մի շարք մասնագիտական նպատակներ ունի:Այս շրջանում Հասմիկը շարունակում է նկարահանվել «Անհասցե ծնվածները» հեռուստասերիալում: Երիտասարդ դերասանները հաճախ ներքին կռիվների մեջ են հայտնվում սերիալներում նկարահանվելու պատճառով. մի կողմից դրանք ճանաչելիություն են բերում, մյուս կողմից շատերը համարում են, որ հեռուստասերիալները չեն տալիս աճելու հնարավորություն:

«Բոլորը գիտեն, որ սերիալում նկարահանվելը շատ դժվար է: Մոտ 3 տարի է՝ նկարահանվում եմ սերիալում ու հասկացել եմ, որ մարդիկ, որոնք ներքին պայքար ունեն, վախենում են սպառվելուց: Ես էլ եմ ունեցել այդ վախը: Սերիալն իսկապես սպառում է դերասանին, դրա համար պետք է փորձես անընդհատ լցվել: Ամեն մեկը պետք է գտնի ներաշխարհը լցնելու իր տարբերակը՝ գրքեր, ներկայացումներ, ճամփորդել կամ մի այլ բան: Երբ գտնես լցվելու քո տարբերակը, այլևս չես վախենա»,- նկատեց նա:

«Անհասցե ծնվածները» հեռուստասերիալում նկարահանվելով՝ Հասմիկը թիմի փոփոխություն ունեցավ, քանի որ մինչև այդ մոտ 2 տարի աշխատել էր «Շանթ» հեռուստաընկերությունում: Դերասանուհին ոգևորությամբ նկատեց, որ թիմի փոփոխությունը միայն դրական ազդեցություն է ունեցել իր վրա:

«Առաջին իսկ օրվանից ինձ շատ լավ ընդունեցին: Երբեք չեմ զգացել, որ ես նորեկ եմ: Ես արագ ադապտացող մարդ եմ, եթե ինձ տալիս էին այդ հնարավորությունը: Էստեղ ինձ տվեցին այդ հնարավորությունը, հիմա շատերի հետ մտերիմ եմ, հաճույքով եմ աշխատում, ինչը շատ կարևոր է: Էկրաներից երևում է, որ դու այդ թիմում քեզ լավ ես զգում»,- նշեց նա: