«Ես եմ հոգում իմ ճամփորդական ծախսերը». Լիա Զախարյանը՝ ճամփորդելիս խորամանկելու և գումար տնտեսելու մասին

Դերասանուհի Լիա Զախարյանը վերջին շրջանում նոր սեր է գտել. ճանապարհորդում է առաջին իսկ հնարավորության դեպքում, էներգիա ստանում և ոգևորված վերադառնում հայրենիք: Լիան  օրերս է վերադարձել  եվրոպական ճամփորդությունից, եղել է Պրահայում և Վիենայում:

Դերասանուհին Tert.am Life-ին է տրամադրել հանգստի լուսանկարներն ու պատմել նոր բացահայտումների, գումար տնտեսելու համար ճամփորդելիս խորամանկելու և մեծ երազանքն իրականացնելու մասին:

Լիան նկատեց, որ միայնակ է ճամփորդում, թեև շատերը չեն հավատում այդ փաստին, ինքը սիրում է միայնակ բացահայտել երկրներն ու նոր ծանոթություններ ձեռք բերել:

Լիայի ճամփորդությունը չի անցել առանց արկածների, առաջին օրը Պրահայում ձախողվել է, բայց այդ մասին ժպիտով է հիշում. «Պրահայում կորցրել էի ուղեբեռս. իմ չվերթը տրանզիտով էր, առաջին թռիչքս ուշացավ, երկրորդ ինքնաթիռիս հասա թռիչքից վայրկյաններ առաջ: Ես հասցրեցի մեկնել, ուղեբեռս՝ ոչ: Հասա Պրահա ու պարզվեց, որ ճամպրուկս չէին հասցրել տեղափոխել Պրահա մեկնող ինքնաթիռ: Պրահայում ընդամենը 3 օր ունեի, սակայն չունեի հագուստ, վերարկու, հիգիենայի պարագաներ, նույնիսկ, լիցքավորիչ: Դա ամենավատ օրն էր, ուղեբեռս ինձ հասավ միայն հաջորդ օրը: Մյուս օրերը վայելել եմ որքան հնարավոր է»:

Թե՛ Պրահայում, թե՛ Վիենայում դերասանուհին առաջին անգամ էր: Ճամփորդելիս նոր քաղաքներ ընտրելը Լիայի համար սկզբունքային է: «Հիմնականում  փորձում եմ գնալ այն տեղերը, որտեղ նախկինում չեմ եղել, որպեսզի ժամանակի ու գումարի ծախսն ուղղեմ նոր բացահայտումներին ու նոր էմոցիաներին: Հետագայում, գուցե, կրկնեմ այն տեղերը, որտեղ  սիրտս ու հոգիս եմ թողել, սակայն հիմա ինձ մոտ նոր բացահայտումների շրջան է»,- ընդգծեց նա:

Պրահայի գեղեցկությունը Լիային շատ է տպավորել, մարդիկ՝ ոչ: Դերասանուհին հասցրել է բախվել նրանց կոպտությանը: «Պրահան շատ գեղեցիկ էր: Այդ հնությունը, որ պահպանվել է այնտեղ, շատ արժեքավոր է: Պրահան ինձ համար շատ ավելի պարզ, հասանելի ու հասկանալի էր, բայց չեխերին չեմ հավանել: Չգիտեմ, այնտեղ հիմնականում չեխե՞րն են աշխատում, թե՞ այլ երկրներից եկած մարդիկ, սակայն բավականին կոպիտ էին: Շատ անշնորհքություններ եմ տեսել, որոնց վրա փորձել եմ աչք փակել և վայելել ճամփորդությունս: Փորձել եմ տեսնել հնարավոր ամեն բան, փորձել եմ չեխական գարեջուրը, նրբերշիկները, քաղցրավենիքները: Հասցրել եմ  նույնիսկ մենաստան գնալ,- ասաց նա ու ծիծաղելով հավելեց,- մայրիկիս ասացի՝ տեսնեմ տեղ ունե՞ն, մնամ այստեղ, բայց մենաստան էլ չընդունեցին ինձ: Պարզվեց՝ առաջիկա 1 տարվա համար այլևս տեղ չունեն: 1 տարի ունեմ, որպեսզի ամուսնանամ, եթե չամուսնանամ, հաջորդ տարի կգնամ մենաստան: Մայրիկս ասում է՝ փաստորեն 1 տարի էլ պետք է հանդուրժեմ քեզ»:

Վիեննայի գեղեցկությունը ևս տպավորել է դերասանուհուն: Նա ոգևորությամբ պատմեց, որ գնացել է օպերա, դիտել է «Եվգենի Օնեգին» բալետ-ներկայացումը. «Ես արտասվում էի, այնպես էի փշաքաղվել: Տեսնել էր պետք, թե ինչքան մանրակրկիտ էին աշխատել էմոցիաների վրա: Աննկարագրելի էր»:

Ճամփորդությունները, իհարկե, իրենց արժեքն ունեն: Լիայից հետաքրքրվեցինք՝ կարողանո՞ւմ է վաստակել այնքան, որ ինքնուրույն հոգա իր ճանապարհորդական ծախսերը: Լիան շեշտեց, որ մինչև հիմա իր բոլոր ճամփորդությունների համար ինքն է վճարել և պատմեց գումար տնտեսելու իր մեթոդի, ճամփորդելիս խորամանկելու մասին:

«Ես միշտ երազել եմ շատ ճամփորդել, ճանաչել աշխարհը, որտեղ ապրում եմ  և չսահմանափակվել այն սահմաններով, որն ինձ տվել է իմ հայրենիքը: Փոքր տարիքում չէի կարող դա ինքնուրույն իրականացնել, պետք է հասունանայի այնքան, որ կարողանայի ինձ թույլ տալ նման բան: Ամենաբարդն առաջին ճամփորդությունս էր, երբ օտարության մեջ փորձում ես քեզ ճիշտ դրսևորել, տեսնել, ճանաչել նոր մարդկանց, նոր մշակույթ և տեսնում ես, որ ստացվում է, ավելին, դա շատ խոստումնալից է և երջանկացնում է քեզ, ամեն բան հեշտանում է,- ասաց նա ու հավելեց,- ես տարվա ընթացքում գումար եմ խնայում: 3 մեծ «բանկա» ունեմ, որոնց մեջ հավաքում եմ գումարս: Ինքս ինձ խոստացել եմ օրվա ընթացքում առնվազն 2000 դրամ քիչ կծախսեմ և կհավաքեմ: Իրականում մենք շատ գումար ենք ծախսում տաքսիների, սրճարանների վրա, բայց կարելի է մի բան պակաս անել: Ամեն օր ինչ-որ բան պակաս եմ անում և հավաքում գումարս: Առօրյա ծախսերում խնայել ինձ օգնում է այն, որ իմ գործունեության շնորհիվ շատ աքսեսուարների, հագուստի, խնամքի համար գումար չեմ ծախսում, այլ  համագործակցում եմ խանութների, սրահների հետ: Այդ գումարները խնայելով՝ փորձում եմ տարին 2 անգամ նոր երկիր բացահայտել: Իրականում, ճամփորդելն այդքան էլ թանկ հաճույք չէ, եթե հյուրանոցդ 5 աստղանի չէ, թռիչքդ բիզնես-կլասով չէ»:

Լիան նաև նկատեց, որ տեղում պետք է կողմնորոշվել և ճիշտ ծախսել գումարը: «Շատ կարևոր է, որ գիտակցես, թե ինչպես ծախսես գումարդ: Բոլորն ասում էին՝ Վիենայում ամեն ինչ շատ թանկ է: Ես վախեցած ու պատրաստված գնացել էի Վիենա, սակայն գնացքի կայարանից հյուրանոց հասա մետրոյով՝ վճարելով ընդամենը 2 եվրո, 10 ցենտ: Բնականաբար, դու հիմնականում լինում ես տուրիստական կենտրոնում, որտեղ  ամեն բան շատ թանկ է: Շատ կարևոր է դուրս գալ տուրիստական կենտրոնից, մտնել  քաղաքի բնակելի տարածքը: Կրկնակի արդյունավետ է՝ ավելի քիչ ես ծախսում, ավելի համեղ ես ուտում, ավելի իսկականն ես տեսնում և ձեռք ես բերում տեղացի ընկերներ, ոչ թե տուրիստներ»,- բացահայտեց դերասանուհին: