«Կարևոր հետևություններ արեցի». Արսեն Սաֆարյանը՝ իր երգարվեստն ակտիվացնելու և եկամուտի աղբյուրների մասին

16:15 • 18.01.20

Շոուբիզնես

Երգիչ Արսեն Սաֆարյանը տևական դադարից հետո նախորդ տարի ակտիվացրեց իր գործունեությունն ու սկսեց նոր երգեր ներկայացնել լսարանին: Tert.am Life-ի հետ զրույցում երգիչն ասաց, որ այս տարի ևս առավել ակտիվ է լինելու այս դաշտում: Հիմա աշխատում է նոր երգերի վրա:

«Միաժամանակ երկու երգի վրա եմ աշխատում: Շուտով պետք է տեսահոլովակ նկարահանեմ: Հավանաբար 2 ամսվա ընթացքում արդեն լսարանին կներկայացնեմ նոր աշխատանքս»,- ասաց երգիչը:

Տևական դադարից հետո նոր երգեր ներկայացնելուց հետո Արսենն իր համար կարևոր եզրահանգման է եկել՝ իր լսարանը սպասում է իր նորություններին:

«Որպես հեղինակ-երգիչ՝ ինձ համար ամենակարևոր բանը տեղի ունեցավ. հասկացա, որ անկախ ժամանակի տենդենցներից, դեռ պիտի ստեղծագործեմ ու երգեմ, որովհետև շատ մարդիկ սպասում են իմ հեղինակային երգերին: Ինձ համար դա ամենակարևորն էր և ուժ տվեց: Մենահամերգներով, Նարեկ Բավեյանի հետ համատեղ համերգներով եղա մարզերում, կարևոր հետևություններ արեցի»,- ասաց երգիչը:

Հայկական շոու բիզնեսում երգիչների եկամուտներն ավելի շատ գոյանում են կորպորատիվ միջոցառումներից: Արսենից հետաքրքրվեցինք, թե այս դաշտում որքանով է մեծ իր պահանջարկը. «Ես չէի ասի, որ ամենամեծ պահանջարկ ունեցող երգիչն եմ, սակայն հրավերներ ունենում են: Ինձ հրավիրում են մարդիկ, որոնք սիրում են իմ երգերը»:

Նոր երգեր, տեսահոլովակներ ներկայացնելը ծախսեր է ենթադրում: Չնայած կորպորատիվների հրավերներն այնքան էլ շատ չեն, Արսենը կարողանում է հոգալ այդ ծախսերը: Այլ ոլորտում աշխատանք երգիչը չունի, վաստակում է երաժշտության միջոցով:

«Ես աշխատում եմ մի քանի ակումբում, որտեղից գոյանում են իմ եկամուտները: Աշխատում եմ այնքանով, որքանով կարողանում եմ, տնտեսում եմ, որպեսզի կարողանամ երգերը կյանքի կոչել: Որևէ մեկի կողմից չեմ հովանավորվում, հարուստ քեռի, հոպար չունեմ: Շատ թանկ տեսահոլովակներ նկարահանել չեմ կարողանում, սակայն ամենակարևորն այն է, որ կարողանում եմ էսթետիկ ու կուլտուրայով աշխատանքներ անել, որպեսզի ինքս իմ արածից չամաչեմ»,- եզրափակեց երգիչը:

Հեղինակ Ամալյա Հովհաննիսյան