«Գոշայի հիմքում Ադիկն է, ոչ թե Միստր Բինը»․ Մկրտիչ Արզումանյանը՝ ռուսական շուկայի համար նախատեսված «Գոշա» նախագծի և սպասվող նորությունների մասին

Դերասան Մկրտիչ Արզումանյանը ռուսական «Սուպեր» հեռուստաալիքի եթերում կներկայանա նոր կերպարով, որը ստեղծվել է «Կարգին սերիալում» նրա հերոսի՝ Ադիկի կերպարի հիմքով։ «Գոշա» հեռուստանախագիծը բաղկացած է 14 սերիայից, իրենից ներկայացնում է հումորային սքեթչեր, հեռուստատեսային մյուս արտադրանքներից տարբերվում է նրանով, որ երկխոսություններ, գրեթե, չկան։ 

Նախագծի հեղինակ, պրոդյուսեր ու սցենարի համահեղինակ Սարգիս Մնոյանի հարցազրույցը Tert.am Life-ն արդեն ներկայացրել է իր ընթերցողներին, այս անգամ զրուցել ենք Մկրտիչ Արզումանյանի հետ, որը պատմել է իր նոր կերպարի, բարդությունների, ռուսական հեռուստաշուկա մտնելու և իր հետագա անելիքների մասին։

Այս նախագծում դերասանը հետ հանդես է գալիս որպես համապրոդյուսեր։ Դերասանն ասաց, որ իրեն տեսնելու են մի ժանրում, որն իր համար ևս նորություն է, սակայն հասցրել է սիրել։ Այս ժանրն իր մատուցման բարդությամբ Մկոյի առաջ մի շարք խնդիրներ է դրել․ ««Գոշա»-ի ձևաչափն իմ ամենասիրելին է, քանի որ այստեղ խոսքը շատ քիչ է, դերասանը պետք է բոլոր տեսարանները հեռուստադիտողին հասցնի իր խաղով, ներաշխարհով, հուզումներով։ Դա մի շարք դժվարություններ առաջացրեց։ Բոլորս էլ գիտենք, որ խոսքն աշխատանքը հեշտացնում է։ Բավականին երկար ժամանակ ռեժիսոր Միխայիլ Միրոնովի և պրոդյուսեր Սարգիս Մնոյանի հետ շատ նուրբ աշխատանք ենք տարել, որպեսզի կերպարի նուրբ լարերը չկորցնենք։ Բարդ էր գտնել ոսկե միջինը։ Ամիսների աշխատանքի արդյունքը, կարծում եմ, պարծենալու բան է»։

Գոշայի կերպարի մասին դերասանը սիրով է խոսում։ Ըստ նրա՝ երկար ժամանակ է պահանջվել մինչև կարողացել են ստանալ Գոշայի բնավորության ամբողջական պատկերը: «Դերի վրա երկար ենք աշխատել: Որպես հիմք՝ վերցրել ենք Ադիկի կերպարը, դա կետ էր, որտեղից սկսեցինք հերոսին զարգացնել։ Ադիկի կերպարը շատ ճկուն է, հատկապես, որ շեշտադրումը լինելու էր դիմախաղի, շարժուձևի վրա։ Չնայած հիմքում Ադիկն է, Գոշան այլ կերպար է։ Մենք թողել ենք Ադիկի վախերը, իր հայտնի «պրիվետ»-ը, որը հայ հեռուստադիտողների կողմից շատ սիրված է, բայց Գոշայի բնավորությունը, կյանքի մասին պատկերացումները, զգացողությունները, զգացմունքները  բոլորովին այլ են,- ասաց նա ու հավելեց,-  Գոշան միամիտ, պարզ, հասարակ  կերպար է, որը ես ամենաշատն եմ գնահատում ցանկացած հերոսի մեջ։ Հաճելի է, երբ քեզ հաջողվում է այդ անկեղծությունն ու միամտությունը փոխանցել հեռուստադիտողին կամ հանդիսատեսին։ Չնայած 21-րդ դարն է՝ Գոշան դեռ 70-80-ականներով է ապրում։ Դա է իր կյանքի ճիշտ ընկալումը, իր հանգստությունը, ունի սիրելի մշտական օգտագործման իրերը, ունի նաև այնպիսի իրեր, առանց որոնց իր գոյությունը չի պատկերացնում։ Նա սիրահարված է մի աղջկա, որը չի էլ կասկածում այդ մասին, երազում է ամուսնանալ այդ աղջկա հետ ու ճանապարհներ է փնտրում, թե ինչպես հասնի նրան։ Ամեն անգամ, երբ Գոշան ուզում է սեր խոստովանել, ինչ-որ բան խանգարում է։ Գոշան ունի վախեր, որոնք այս կերպարի համար շատ հետաքրքիր են՝ և՛ խաղալու, և՛ դիտելու համար»։

Դերասանն իր գործընկերների աշխատանքը բարձր է գնահատում: Նա շեշտեց, որ իրենք թիմ են և թիմով են հաղթահարել իրենց առջև դրված բարդ խնդիրը․ «Մտահղացման հեղինակ Սարգիս Մնոյանը փայլուն աշխատանք տարավ։ Սցենարի համահեղինակ Աշոտ Աբրահամյանը ևս շատ լավ աշխատանք է տարել։ Նրանք մասնագետներ են, որոնց հետ շատ երկար եմ աշխատել,  միասին իրականացրել ենք սիրված, ընդունված, լավ նախագծեր։ Սա մի նոր ճանապարհի սկիզբ է, որը կլինի երկարատև և մեզ էլ հնարավորություն կտա հասկանալ, թե ինչպես կարող ենք հետաքրքիր, ընկալելի լինել  նաև այլազգի, այլ մշակույթ կրող հեռուստադիտողի համար»։

Դերասանը նշեց, որ ստեղծել են մի կերպար, որն ազգություն չունի, ինչը համարում է իրենց թիմի գլխավոր ձեռքբերումներից. «Ցանկացած ազգության հեռուստադիտող կարող է նախագիծը դիտել և հասկանալ՝ խոսքն ինչի մասին է։ Կարծում եմ՝ դա զգալի հաղթանակ է։ Ես մեծ հույսեր ունեմ, որ այս նախագիծը կշարունակի ապրել ու շարունակություն կունենա։ Կերպարը հաստատ դեռ շատ ասելիք ունի»:

Այս աշխատանքը նախատեսված է ռուսական շուկայի համար: Խոսելով հայկական և ռուսական հեռուստաշուկաների տարբերության մասին՝ դերասանն ասաց․ «Ռուսական և հայկական շուկաների տարբերությունը շատ մեծ է, չնայած ընդհանուր բաներ էլ շատ ունենք։ Հայկական  իրականության մեջ մենք ավելի հմուտ ենք, քան օրինակ ռուսական իրականության մեջ։ Պետք է լավ տեղեկացված լինել, շուտ կողմնորոշվել և հասկանալ, թե ինչը կհետաքրքիր ռուս հեռուստադիտողին»։

Դերասանի խոսքով՝ իրենք փոքրիկ հաղթանակ ունեն, քանի որ վերցրել են մի ժանր, որում քչերն են իրենց փորձում․ «Շատերը խուսափում են այս ձևաչափից՝ մտածելով, որ Անգլիայում, ԱՄՆ-ում նմանատիպ հաջողված նախագծեր արդեն կան»։

Ռուսական մի քանի կայք շտապեց  նախագիծն ու դերասանին համեմատել «Միստր Բինի» հետ։ Ոչ նախագծի հեղինակները, ոչ էլ Մկրտիչ Արզումանյանն այս կարծիքը չեն կիսում․ «Միստր Բինի հետ նմանություն չկա, որովհետև տարբեր կերպարներ են։ Նրանից  առաջ էլ են եղել բազմաթիվ նման սքեթչեր, որտեղ գլխավոր հերոսը ինչ-որ պատմությունների մեջ է հայտնվում։ Կարող ենք սկսել Չարլի Չապլինից և նրան հաջորդած մյուս բոլոր պատմություններից։ Կենսակերպով, պահվածքով Միստր Բինից շատ տարբեր հերոս է։ Եթե ես դիմախաղով նմանակեի նրան, դա կլիներ Միստր Բինի ռուսական տարբերակը, սակայն ես խաղում եմ նոր կերպար»։  

Մինչ ռուս հեռուստադիտողները դերասանին կգնահատեն միամիտ Գոշայի կերպարում, Մկոն նկարահանվում է Հրաչ Քեշիշյանի նոր նախագծում, որը նկարահանվում է Շիրվանզադեի «Պատվի համար» ստեղծագործության մոտիվներով։ «Շատ ուրախ եմ, որ նկարահանվում եմ «Պատվի համար» նախագծում եմ։ Հրաշալի գործընկերներ ունեմ։ Շնորհակալ եմ իմ գործընկերներին, որոնք ուղղակի պրոֆեսիոնալ են և սիրում են իրենց աշխատանքը, ամեն ինչ անում են, որ նկարահանման հրապարակում քո յուրաքանչյուր րոպեն լինի հետաքրքիր, արդարացված։  Կարծում եմ՝ լավ նախագիծ կլինի։ Որպես ռեժիսոր՝ Հրաչ Քեշիշյանի հետ առաջին համագործակցությունս է, ուղղակի բավականություն եմ ստանում նկարահանման յուրաքանչյուր օրվանից։ Իսկապես, ամեն ինչ արվում է, որպեսզի յուրաքանչյուր կադր ունենա իր բացատրությունը, նախագիծը լինի հաջողված։ Նման մթնոլորտում աշխատելը շատ լավ է: Նման նախածի ավարտից հետո անգամ տխրում ես, սպասում ես, թե երբ նորից նույն զգացողությունները կունենաս կամ ոչ։ Այս անգամ բացասական կերպարով եմ հանդես գալիս, այնպես որ, սիրելի հեռուստադիտողներ, շատ խիստ չդատեք, ես ձեր սիրելի Մկրտիչ Արզումանյանն եմ, ոչինչ չի փոխվել, ուղղակի այս անգամ բացասական կերպարով եմ ներկայանալու»,- ասաց դերասանը։

Անդրադառնալով իր ապագա ծրագրերին՝  Մկրտիչն ասաց․ «Թատերական բազմաթիվ նոր նախագծեր կան, առհասարակ, թատրոնն է ինձ շատ է հետաքրքրում։ «Արմենիա» հեռուստաընկերությունը հումորային նոր նախագիծ է սկսում, որը գարնանն է եթերում լինելու: Փակագծերը դեռ չեմ բացի, սակայն հեռուստադիտողներին հետաքրքիր նախագիծ է սպասվում, դերասանական նոր կազմով: Արդեն մշակման փուլում է, սցենարական աշխատանքներ են տեղի ունենում և մի որոշ ժամանակ անց սկսվելու են նաև նկարահանման աշխատանքները»։