«Երբ եղանակը ցրտում է, մտածում եմ՝ զգեստապահարանս դատարկ է»․ Մանո Գրիգորյանը՝ ցուրտ եղանակին ոճային լուծումների և ձմեռային նորաձևության մասին

Պարուհի Մանո Գրիգորյանը ձմեռային հագուստ ընտրելիս նախապատվությունը տալիս է վառ գույներին։  Նրա խոսքով՝ մռայլ եղանակն իր տրամադրության վրա չի ազդում, փոխարենն ինքն է փորձում գունավոր look-երով բարձրացնել և՛ իր, և՛ շրջապատի տրամադրությունը։

Մանոն Tert.am Life-ին պատմել է ցրտից նորաձև «պաշտպանվելու» իր տարբերակի և իր ձմեռային պահարանի մասին։ Պարուհին ծիծաղելով նշեց, որ ինքն էլ մյուս կանանց պես հաճախ է մտածում, որ հագնելու ոչինչ չունի։

«Ամեն տարի, երբ եղանակը ցրտում է, մտածում եմ՝ զգեստապահարանս դատարկ է։ Նման պարագայում սիրում եմ գնումներ անել, դա հոգեբանորեն շատ է օգնում։  Ցուրտն ու սառնությունը չեմ սիրում, պետք է անպայման մի նոր տաք բան գնեմ, որ սկսեմ սպասել ձմռանը։ Երբ որևէ տաք հագուստ եմ ձեռք բերում, միանգամից ուզում եմ եղանակը ցրտի, որ կարողանամ հագնել։ Ես սովորություն ունեմ հագուստ գնել առանց եղանակին հետևելու։ Հիմա ձմեռ է, բայց եթե ամառային հետաքրքիր մի բան տեսնեմ, անպայման կգնեմ։ Ծիծաղելի է, բայց սկսում եմ անհամբեր սպասել եղանակի փոփոխությանը, որպեսզի կարողանամ հագնել»,-ասաց Մանոն։

Խոսելով իր պահարանի և մռայլ եղանակին գունավոր look-երի մասին՝ պարուհին ասաց․ «Առհասարակ, սիրում եմ ստեղծել գունային իմ տրամադրությունը։ Իմ զգեստապահարանում բոլոր գույները կան, չկա մի երանգ, որը բացակայում է կամ չեմ սիրում։ Հագուստ ընտրում եմ ըստ իմ տրամադրության, հաճախ նախապատվությունս տալիս եմ վառ գույների»։   

Հագուստի ընտրության տեսանկյունից Մանոն սիրում է աշունը։ Ըստ պարուհու՝ աշնանը հագուստի ընտրության լայն հնարավորություն ունի։ «Կիսաճթքավոր կոշիկներ, ժակետներ, պիջակներ, ջինսե տաբատներ ու ոճային մի շարք համադրություններ շատ եմ սիրում։ Այս ամենը կարող ենք մեր look-ում կիրառել և՛ աշնանը, և՛ ձմռանը։ Իհարկե, տաք եղանակին ավելի հեշտ է նորաձև տեսք ունենալ, որովհետև սառը եղանակը սահմանափակում է։ Այնպես չէ, որ խիստ հետևում եմ նորաձևությանը, ուղղակի փորձում եմ հնարավորինս ծանոթ լինել տվյալ շրջանի միտումներին, ինձ համար հոգեհարազատ մի բան գտնել։ Կարծում եմ՝ նորաձև է այն, ինչը քեզ համապատասխանում է։ Ամենակարևոր բանն այն է, որ դու քեզ հարամարավետ զգաս ընտրածդ հագուստի մեջ։ Ընթերցողներին էլ խորհուրդ կտամ հագնվել այնպես, ինչպես իրենց հարմար է, ընտրել հագուստ, որը համահունչ է իրենց ներաշխարհին։ Մարդու հագուստից կարելի է հասկանալ, թե նա ինչ մարդ է, ինչ աշխատանքով է զբաղվում։ Պետք է ուղղակի լինել համահունչ և ներդաշնակ»,-ասաց Մանոն։

Պարուհու խոսքով՝ աշխատանքային այն գրաֆիկը, որով ինքն է ապրում, իրեն հնարավորություն է տալիս լինել տարբեր, սակայն հաճախ ընտրությունը կանգ է առնում սպորտային, հարմարավետ կոշիկների վրա։  

«Ժամանակի հետ սկսեցի ավելի հանգիստ կոշիկներ նախընտրել։  Եղել է ժամանակ, երբ ես միայն բարձրակրունկներ էի նախընտրում, սակայն այդ ժամանակ ներկայից գրաֆիկը չունեի։ Հիմա բարձրակրունկներ հագնում եմ, եթե աշխատանքն է պահանջում։ Հստակ ոճ չկա, որով ես հագնվում եմ։  Իմ աշխատանքն այնպիսին է, որ ես պետք է հնարավորինս հանգիստ հագուստով ու կոշիկներով լինեմ։ Ամբողջությամբ սպորտային հագուստ չեմ սիրում, դրա համար հաճախ եմ երկու ոճ խառնում՝  սպորտային կոշիկները համադրելով դասական հագուստի հետ»,-ասաց պարուհին։

Դեռ տարիներ առաջ Մանոն հաճախ էր փոխում վարսերի գույնը, սակայն վերջին շրջանում միայն շիկահերի կերպարով է։ Ըստ Մանոյի՝ մազերի այս գույնը հատկապես ձմռանը դժվար է խնամել, սակայն ինքն այնքան է հավանում ու սովորել դրան, որ փոխելու ցանկություն չունի։

«Տարվա այս եղանակին բավականին բարդ է, սակայն, երկար փոփոխություններից հետո ես գտա մի գույն, որով ինձ շատ լավ եմ զգում։ Երբեք փոփոխություններից չեմ վախեցել, մազերս տարբեր գույների եմ ներկել, սակայն շիկահեր լինելն ունի շատ առավելություններ։ Ցանկացած սանրվածք մազերի այս գույնին համապատասխանում է, և դու լինում ես շատ տարբեր»,- նշեց պարուհին: