«Բռնցքամարտիկի դերի համար լավ մարզավիճակում եմ»․ Գոշ Հակոբյանը՝ «Սիրուն Սոնայի» փոխարեն «Շիրազի Վարդը» նախագծում նկարահանվելու մասին

Երիտասարդ երգիչ, դերասան Գոշ Հակոբյանն իրեն առաջին անգամ կփորձի հեռուստասերիալում՝ դրամատիկ կերպարով։  Նա նկարահանվում է Ելենա Արշակյանի նոր՝ «Շիրազի Վարդը» հեռուստանովելում։ Դերասանը հանդես կգա դրական կերպարով։ 

Tert.am Life-ի հետ զրույցում Գոշը պատմել է մինչև այս սերիալների առաջարկները մերժելու, առաջին անգամ այս ձևաչափում ներկայանալու, դժվարությունների ու կերպարի մասին։

«Սերիալում նկարահանվելու առաջնարկներ շատ ունեի, սակայն մերժում էի։ Կոնկրետ ինչ-որ պատճառ կամ չափանիշներ չկային, ուղղակի առաջին անգամ սերիալում նկարահանվելու առաջարկ ընդունեցի, որովհետև կերպարն ինձ հետաքրքրեց։ Շատ լավ խթան է, որ ես բավականին հետաքրքիր կերպարով կարող եմ ինձ փորձել նման ձևաչափում»,-ասաց դերասանը։

Գոշը պատմեց, որ իր և Ելենա Արշկյանի համագործակցության նախապատմությունը բավականին հետաքրքիր է ստացվել․ «Ելենա Արշակյանն սկզբում ինձ ներկայացրեց «Սիրուն Սոնա» նախագծի սցենարն ու պատմությունը, սակայն զրույցի ժամանակ իմացավ, ես երկար տարիներ բռնցքամարտ եմ պարապել։ Ավելի ուշ իմացա, որ նա ինձ տեսնում է «Շիրազի Վարդը» նախագծում՝  Հայկի կերպարով»։

Դերասանն նշեց, որ կերպարն իրենից շատ չի տարբերվում։ «Մարմնավորում եմ գլխավոր հերոսի եղբոր կերպարը։ Դրական կերպար է: Հերոսիս հետ գրեթե հասակակից ենք: Տաքարյուն, ակտիվ, մի քիչ ագրեսիվ երիտասարդ է, որն անընդհատ հակասություն է ունենում եղբոր հետ։ Բավականին էմոցիոնալ տղա է, որը համապատասխանում է մերօրյա երիտասարդների բոլոր չափանիշներին՝ ապրում է այդ առօրյայով, անընդհատ ընկնում է խնդիրների մեջ»,- ասաց նա:

Բռնցքամարտիկի կերպարով հեռուստադիտողներին ներկայանալու համար դերասանը հատուկ չի պատրաստվել, ըստ նրա, համապատասխան մարզավիճակում է․ «Ես շաբաթը վեց անգամ մարզասրահ եմ գնում, հատուկ պատրաստվելու կարիք չեղավ»։

Խոսելով կերպարի մեջ մտելու առանձնահատկությունների մասին՝ դերասանն ասաց․ «Բարդություններ չեն եղել: Առհասարակ, քո հերոսն առանձին մարդ է, որն ունի իրեն բնորոշ գծեր, ձայնային տեմբր, շարժուձև, դիմախաղ, արտահայտություններ, պահվածք։ Սրանք պետք է կարողանաս հիշել ու պահել ամբողջ խաղի ընթացքում։ Չի կարող քո կերպարը մի օր ուրիշ բնավորությամբ ու տեսակով ներկայանալ, մի օր՝ այլ։ Հայկի կերպարի հետ կապված նման խնդիր չունեմ, թեև բնավորության առանձին գծերի մասին չեմ կարող դեռ խոսել, քանի որ որոշ ժամանակից այն ամբողջությամբ կբացվի»։

Գոշի խոսքով՝ անընդհատ աշխատում է կերպարը ճիշտ ներկայացնելու համար։ Ըստ նրա՝, իրեն այդ հարցում օգնում է ինչպես թիմը, այնպես էլ նախագծի ռեժիսորը․ «Շատ լավ ռեժիսոր ունենք՝ Քաջայր Հակոբյանը։ Նա իսկապես պրոֆեսիոնալ է, հետաքրքիր է համագործակցել նրա հետ թե՛ որպես մարդ, թե՛ որպես ռեժիսոր։ Ամենակարևորն այն է, որ իր հետ աշխատում ենք առանց լարվելու և բավականին հեշտ»։

Հեռուստադիտողները Գոշին դեռևս բացասական կերպարով չեն տեսել։ Ըստ դերասանի՝ ինքը չի ցանկանում հանդես գալ նման դերով, հատկապես, երբ խոսքը կատակերգությունների ու սիթքոմերի մասին է․ «Բացասակայն կերպար չեմ խաղացել, թեև առաջարկ եղել է, սկզբում համաձայնեցի, վերջին պահին որոշեցի հրաժարվել: Խոսքը «Դեպի ճամբար» նախագծի մասին է։ Նախնական որոշմամբ ես այնտեղ պետք է վատ կերպարով ներկայանայի, սակայն իմ խնդրանքով կերպարը փոխեցինք։ Ինձ ինչ-որ բան հետ պահեց։ Հեռուստադիտողների մոտ բացասական տպավորվելու խնդիր չկար, ուղղակի չցանկացա սիթքոմի ձևաչափում ներկայանալ նման հերոսով»։

Գոշի խոսքով՝ գրաֆիկի ծանրաբեռնածության պատճառով առայժմ հանդես կգա միայն որպես դերասան։ Երգարվեստում կարճ դադարից հետո նա ծրագրում է ներկայանալ նոր ստեղծագործությամբ, սակայն իր համար երաժշտական այլ ոճում։