«Կապիր ինձ մահճակալին»․ 18+ նոր ներկայացում՝ Անդրանիկ Հարությունյանի, Լիա Զախարյանի, Լևոն Հարությունյանի և այլոց մասնակցությամբ

17:30 • 30.01.20

Շոուբիզնես

Գարնանը Ստանիսլավսկու անվան ռուսական դրամատիկական թատրոնի բեմ կբարձրանա «Կապիր ինձ մահճակալին» կատակերգությունը, որը բեմադրել է Կարո Բալյանը, հիմքում ֆրանսիացի հեղինակ Րաֆֆի Շարթի պիեսն է։

Ներկայացման մեջ խաղում են Անդրանիկ Հարությունյանը, Լևոն Հարությունյանը, Արա Սարգսյանը, Մխիթար Ավետիսյանը, Լիա Զախարյանը, Անի Պետրոսյանն ու Սաթենիկ Հազարյանը։ Չնայած դերասանները պիեսին ծաոթացել են տարեվերջին, փորձերը նոր են մեկնարկել։

Անդրանիկ Հարությունյանը Tert.am Life-ին պատմել է իր կերպարի, ներկայացման բովանդակության ու ապաքաղաքական հումորի մասին։ «Դեռ մոտավոր եմ պատկերացնում, թե իմ կերպարն ով է։ Նրա ընկերն ամուսնալուծվել է, ինչի համար ինքը շատ ուրախ է։ Լինելով աշխույժ, կնամեծար, ինչ-որ առումով՝ կնամոլ տղամարդ՝ նա մտածում է, որ ընկերոջ հետ կարող է լավ ժամանակ անցկացնել աղջիկների շրջապատում։ Սակայն ընկերը շատ է սիրում նախկին կնոջը, ամեն վայրկյան նրան է հիշում, նրա մասին մտածում։ Այնպես չէ, որ բացասական տղա է, ուղղակի ուզում է ընկերոջն իր շարքերը տանել։ Փորձել ենք ստանալ մերօրյա ուրախ, հումորային կերպար»,- ասաց դերասանը ու հավելեց, որ փորձերի ընթացքում, երբեմն, փոփոխություններ են արվում, դա է պատճառը, որ հերոսին լիարժեք ճանաչել չի հասցրել։

Դերասանն ընդգծեց, որ ներկայացումը մեծերի համար է նախատեսված․ «Բեմադրությունը 18+ է, դա գրվելու է տոմսերի վրա։ Տեքստը 18 տարեկանից փոքր հանդիսատեսի համար չէ։ Բաց տեսարաններ կամ հայհոյանքներ չկան, ուղղակի նյութն այնպիսին է, որ թեման հասականալի կլինի ավելի հասուն հանդիսատեսին։ Բացի այդ, ես էլ ինձ լավ չեմ զգա նման նյութ ներկայացնելիս, երբ դահլիճում տեսնեմ պատանիների»։

Անդոն հատուկ շեշտեց, որ հանդիսատեսն այստեղ քաղաքականություն չի տեսնի։ «Նախորդ ներկայացումը՝ «Բումերանգ»-ը, ամբողջությամբ քաղաքական էր, սակայն կան ներկայացումներ, որտեղ քաղաքական թեմա չկա, բայց դրանք էլ հետաքրքիր, զվարճալի ու ծիծաղելի են։ Հումորային գործ է, որն արժե նայել։ Իրականում ծիծաղելի է՝ հասել ենք մի կետի, երբ ներկայացման մեջ քաղաքականություն չի լինում, չեն գնում դիտելու»,- նշեց Անդոն։

Դերասանի խոսքով՝ հիմա ամեն տեղ քաղաքականություն է, կարճ ժամանակով այդ թեման մոռանալը լավ կլինի․ «Տանը, դրսում, անգամ ներկայացումներում հիմա շոշափում են այդ թեման։ Հաստատ հաճելի կլինի, որ հանդիսատեսը գա, դիտի ապաքաղաքական մի ներկայացում, զվարճանա ու մի քիչ կտրվի առօրյա հոգսերից»։