«Դերի համար պատրաստ եմ ճաղատանալ»․ Էմմա Սափունջյանը՝ «տղայական» ոճի, 14 տարեկանից մազերը ներկելու ու նորաձևությանը չհետևելու մասին

Դերասանուհի Էմմա Սափունջյանը նորաձևությանը կրնկակոխ չի հետևում, գնումների մեծ սիրահար չէ, իսկ վերջին շրջանում փորձում է փոխել իր ոճը։ 1.72 հասակով դերասանուհին հարմարավետությունը գերադասում է բարձրակրունկներից, երբեմն էլ, կանացի հագուստից։ Լայն տաբատները կազմվածքն ընդգծող զգեստներով փոխարինելու մասին Էմման մտածում է, սակայն իր ոճը գտնելու հարցում դեռ տատանվում է։  

Tert.am Life-ի հետ զրույցում երիտասարդ դերասանուհին խոսել է իր զգեստապահարանի պարունակության ու ոճափոխության մասին։ Շատ աղջիկների համար հագուստի խանութներում շրջելը լիցքաթափվելու լավագույն տարբերակներից է, սակայն Էմման առևտրի կենտրոններ գնում է միայն խիստ անհրաժեշտության դեպքում։

«Գնումներ անում եմ, երբ զգում եմ, որ վերջ՝ հագուստիս պաշարը վերջացել է։ Գնումներ անելն ինձ մոտ շատ արագ է ստացվում․ մտնում եմ խանութ, մի հայացքով նայում, թե ինչ կա, մոտավոր հասկանում ինչ կարելի է փորձել, արագ հագնում և ընտրում այն, ինչ ուզում եմ։ Լինում են դեպքեր, երբ չեմ էլ փորձում՝ աչքաչափով նայում եմ ու վերցնում։ Նորաձևությանը շատ չեմ հետևում, հագուստն ընտրում եմ հարմարավետության սկզբունքով։ Բացի դա, չեմ սիրում հագնել այնպիսի բաներ, որոնք բոլորն ունեն»,-ասաց դերասանուհին։

Օրվա կերպարը ևս Էմման ընտրում է՝ըստ հարմարավետության, չնայած նկատեց, որ մասնագիտության բերումով երբեմն օրվա ընթացքում ստիպված է լինում զգեստափոխվել մինչև տասն անգամ։

«Չկան ինչ-որ էջեր չկան, որոնց հետևում եմ նորաձևության միտումներին ծանոթանալու համար։ Look-երս ինքս եմ ստեղծում՝ մի քանի համադրություններ եմ անում, հասկանում եմ՝ համապատասխանո՞ւմ են, թե՞ ոչ»,- նշեց Էմման։

Խոսելով նախընտրելի գույների մասին՝ դերասանուհին ասաց․ «Պահարանումս գերակշռում է երկու երանգ՝ սև և մոխրագույն։ Վառ գույներ չեմ սիրում, չնայած վերջին շրջանում սկսել եմ ինչ-որ երանգներ փորձել։ Նաև «պրինտի» սիրահար եմ՝ շատ եմ հավանում սև ու սպիտակ գծերով հագուստը։ Ոճերի տեսանկյունից՝ տաբատներ և սպորտային հագուստ եմ նախընտրում»։

Էմման ծիծաղելով նշեց, որ ինքն իր ոճը դեռ չի գտել։ Ըստ դերասանուհու՝ տատանվում է՝ ամեն կերպ փորձելով առօրյա կերպարի մեջ մի փոքր կանացիություն մտցնել. «Թե՛ հագուստս, թե՛ շարժուձևս մի քիչ ավելի «տղայական» են։  Հիմա փորձում եմ այդ ամենը հանել միջիցս։ Հաճախ մտածում եմ, որ աղջիկ եմ, պետք է շորիկներ ընտրեմ։ Իհարկե ուզում եմ ավելի քիչ հագնել լայն տաբատներ, կոպիտ «բատինկաներ» (կիսաճթքավոր կոշիկներ), փոխարենը՝ ընտրել կազմվածքն ընդգծող հագուստ։ Ես այս ամենը հասկանում եմ ու քիչ-քիչ աշխատում եմ, որպեսզի շեշտը դնեմ կանացիության վրա, բայց իմ մշտական ոճին՝ տաբատներին ու հանգիստ կոշիկներին ոչինչ չի հասնի, որովհետև հարմար է»,-ասաց Էմման։

Դերասանուհին բարձրակրունկներ տանել չեմ կարողանում։ «Անհրաժեշտության դեպքում եմ հագնում ու անիծում դրանք ստեղծողին:) Ես ինձ նման բաներով տանջել չեմ սիրում։ Բացի այդ, բարձրահասակ եմ՝ հասակս 1․72 սմ է, դեռ փոքր տարիքից դա ինձ մոտ բարդույթ էր առաջացրել, որովհետև ամեն տեղ ամենաբոյովն էի։ Հիմա «Արմատներ» հեռուստասերիալում եմ նկարահանվում՝ այնքան հաճելի է, որ Սոֆյա Պողոսյանը, Աշոտ Տեր-Մաթևոսյանն ինձանից բարձրահասակ են»։

Եթե հագուստի հարցում ոճային փոփոխությունը դերասանուհուն այնքան էլ հեշտ չի տրվում, արտաքին փոփոխությունների Էմման միշտ պատրաստ է․ «Ամեն ինչին շատ թեթև եմ նայում։ Մտածում եմ՝ սա լավ չստացվեց, այլ բան կփորձեմ։ Մազերիս գույնի հետ կապված փոփոխությունները երբեք արմատից չեմ անում, որպեսզի իմ բնական գույնը չկորցնեմ»։

Դերասանուհին մազերի հետ կապված փորձարկումները սկսել է 14 տարեկանից․ «Սկզբում մազերիս տակի մի շերտը ներկեցի, հետո «օմբրե» ասվածը փորձեցի, ինստիտուտում սովորելու տարիներին կարմիր էի ներկել, որից շուտ հոգնեցի և դարձա «ռիժի» (կարմրաշիկահեր), ֆիլմում նկարահանվելու հրավեր ստացա ու մազերս կապույտ ներկեցի, ավելի ուշ՝ կանաչ, հետո ամբողջությամբ շիկահեր դարձա։ Մազերիս մոխրագույն երանգը համպատրաստից ընտրեցի. նկարահանման հրապարակում նստած էի, երբ ասացի, որ նկարահանումից հետո ուզում եմ մազերս «միլիրովկա» անել՝ մոխրագույնի համադրութամբ։ Նաև կտրեցի մազերս ու ստացա ներկայիս գույնը, հիմա ինձ շատ լավ եմ զգում։ Մտքիս մի շատ հետաքրքիր բան կա, որն անպայման փորձելու եմ հենց այս նախագիծն ավարտեմ: Չեմ ասի, թե ինչ է, բայց նկարահանումներս վերջացնելուց հետո շատ կտրուկ փոփոխություն եմ անելու,- ասաց դերասանուհին ու հավելեց,- ինչ վերաբերում է դերերին՝ դերի համար պատրաստ եմ անգամ ճաղատանալու և ցանկացած այլ կտրուկ ոճափոխության»։