«Արամեն զայրացել էր նվերիցս, հիմա ծիծաղելով ենք հիշում այդ օրը»․ Աննա Թովմասյանն աղաբլիթ է պատրաստել ու հիշել Արամեի հետ Սիրո առաջին տոնը

Վաղը՝ փետրվարի 8-ին, Հայ առաքելանակ եկեղեցին տոնում է Սուրբ Սարգիսը։ Սիրո բարեխոսի տոնը նշում են ոչ միայն եկեղեցական ծեսերով, այլև ժողովրդի մեջ տարիների ընթացքում ձևավորված սովորույթներով։ Սովորույթները շատ են, նպատակը մեկը՝ սերը։ Ընդունված է, որ չամուսնացած աղջիկներն ու տղաները տոնին նախորդող գիշերն աղի բլիթ են ուտում: Համաձայն ավանդույթի՝ ապագա հարսնացուն կամ փեսացուն երազում ջուր պետք է բերի:

Թե ով պետք է պատրաստի աղաբլիթը, կարծիքներն ու տարբերակները շատ են։ Ընդունված ու տարածված տեսակետն այն է, որ պատրաստողը պետք է լինի ամուսնացած ու երջանիկ կին։ Tert.am Life-ը հյուրընկալվել է հայկական շոու բիզնեսի ամենահայտի զույգերից մեկը՝ երգիչ Արամեի ու Աննա Թովմասյանի տանը։

Խոհանոցի սիրահար Աննան սիրով համաձայնեց այս տարի մեզ համար աղաբլիթ պատրաստել։ Պատրաստման ընթացքում Աննան վերհիշեց Արամեի հետ անցկացրած առաջին սիրո տոնն ու խոսեց իրենց հարաբերությունների մասին։ 

Աղաբլիթ պատրաստելու համար Աննան առաջարկեց հայտնի բաղադրիչներին՝  2 բաժակ ալյուրին, 1 ճաշի գդալ աղին ու ջրին ավելացնել սեր՝ ըստ ճաշակի։

Մինչև Արամեին հանդիպելն Աննան փորձել է բլիթի միջոցով գուշակել՝ ո՞վ է լինելու ապագա ամուսինը․ «Կարծում եմ, հետաքրքրությունից ելնելով, շատերն են կերել աղաբլիթ։ Տարիներ առաջ քույրիկներիս հետ շատ դժվարությամբ, մեզ տանջելով պատրաստեցինք այն ու մինչև վերջ կերանք։ Ավելի շատ մեզ գրավում էր բոլորով թխելու միտքը, պատրաստման ընթացքը, արարողությունը, սպասման հետաքրքրությունը։ Մեզ ոգևորելու համար շատերն ասում էին, որ երազին իրենց սիրելիին են տեսել, պատմություններ կային, որ անծանոթ մարդու են տեսել, որի հետ ապագայում ծանոթացել են։ Բայց ես երազ չտեսա։  Կարծում եմ՝ Սուրբ Սարգսի տոնը շատ գեղեցիկ է և հետաքրքիր ավանդույթներ ունի, որոնց կարելի է հետևել ու հավատալ»։

Աննան ծիծաղելով վերհիշեց, թե ինչպես են Արամեի հետ անցկացրել առաջին սիրո տոները․ «Մեր առաջին սիրո տոնը շատ լավ է տպավորվել, մինչև հիմա երկուսս էլ հիշում ենք։ Երբ դեռ հանդիպում էինք, նա սիրո տոներին ընդառաջ համերգ ուներ։ Չցանկացա առանց նվերի գնալ, իր համար փոքրիկ արջուկ գնեցի, դրեցի սրտաձև տուփի մեջ ու նվիրեցի։  Արամեն բարկացել էր, թե ինչու եմ նման բան արել, հիմա ծիծաղելով ենք հիշում։ Ասաց, որ նեղություն եմ կրել, գումար ծախսելու կարիք չկար, մյուս անգամ նման բան չանեմ։ Իհարկե, հիմա անպայման  նվերներ պատրաստում ենք իրար համար, թեկուզ փոքրիկ, խորհրդանշական ինչ-որ բան, սակայն մեր բոլոր նվերներից իմ մեջ հենց այդ արջուկն է տպավորվել, քանի որ առաջինն էր, ինքն էլ անսպասելի ձևով արձագանքեց»։

Աննան ասաց, որ իրենք ոչ մի տարի չեն շրջանցում սիրո տոները։ Ըստ նրա՝ և՛ Սուրբ Սարգիսը, և՛ Սուրբ Վալենտինը փորձում են նշել։

Ռոմանտիկ արարքների մասին խոսելիս Աննան ժպիտով նկատեց․ «Արամեն ռոմանտիկ չէ:) Կարծում եմ՝ կլինի ամուսնությունից առաջ, թե հետո, ռոմանտիկությունը կախված է մարդու տեսակից։ Իհարկե, ամուսնությունից հետո հարաբերություններում որոշ բաներ փոխվում է՝ ընկերության ընթացքում մարդիկ ուզում են տպավորություն գործել, յուրահատուկ մտածված պատրաստում նվերներ են իրար համար, հիմա մենք կենցաղ ենք կիսում, մեկ հարկի տակ ենք ապրում, ինչը չի կարող իր ազդեցությունը չունենալ: Ռոմանտիզմը սկսում է թերանալ, ես և Արամեն շարունակում ենք իրար հաճելի ու հետաքրքիր անակնկալներ մատուցել, սակայն, բնականաբար, նույնը չէ, ինչ մինչև ամուսնությունն էր»։  

Աննան բավականին ժամանակ է անցկացնում խոհանոցում՝ նա սիրում է համեղ պատրաստել, ամուսինը՝ համեղ ուտել․ «Արամեի դեպքում աշխատում է այն սկզբունքը, որ սիրելիի սիրտը շահելու լավագույն տարբերակը նրան համեղ կերակրելն է։) Երբեմն փորձում եմ ստեղծագործել խոհանոցում, երբեմն էլ համացանցից եմ բաղադրատոմսեր գտնում։ Իրավիճակից է կախված, թե ինչ կպատրաստեմ, եթե գրաֆիկը հագեցած է լինում, գնումների ժամանակ չեմ ունենում, տանը եղած մթերքից փորձում եմ հետաքրքիր ու համեղ որևէ ուտեստ ստանալ»։

Զրույցի ընթացքում Աննան Արամեին հարցրեց՝ երբևէ եղե՞լ է դեպք, որ իր պատրաստածը չի հավանել, բայց ասել է, թե համեղ էր, որպեսզի իրեն չնեղացնի։ Ամուսինն արձագանքեց՝ ոչ, չի եղել։

Աղաբլիթները պատրաստելուց հետո Աննան, որպես հարաբերություններում փորձառու, գեղեցիկ ընտանիք ունեցող կին, բոլոր սիրահարներին ու իրենց սերը փնտրողներին խորհուրդ տվեց․ «Ամենակարևորը սերն է, որը պետք է ամուր-ամուր պահել։ Հարաբերությունները քրտնաջան աշխատանք են պահանջում։ Երկուսն էլ պետք է այնպես անեն, որ իրենց ունեցած սերը գնալով մեծանա, ամրապնդվի, ոչ թե մարի։ Հարգանքը, իրար հետ զրուցելը, իրար հասկանալը ևս շատ կարևոր են։ Չպետք է մոռանալ ռոմանտիկ արարքների ու միմյանց հաճելի պահեր պարգևելու մասին՝ դրանք պետք է անել և՛ առիթնեին, և՛ առանց առիթի»։

Լուսանկարները՝ Գրիգոր Հովսեփյանի