«Երգելու ժամանակ չեմ կարողանում նայել տղայիս»․ Քրիստինե Պեպելյանի համերգը, որդուն նվիրված երգն ու հյուրերը

Համերգային կարճատև դադարից հետո Սուրբ Սարգսի տոնին Քրիստինե Պեպելյանը ներկայացավ երաժշտական ծրագրով։ Երգչուհին կատարեց հին ու նոր ստեղծագործություններ՝ մեկնաբանելով, որ կան երգեր, որոնք իր երգացանկում են լինելու, քանի դեռ ինքը բեմում է։

Tert.am Life-ը ներկա է գտնվել համերգային երեկոյին, զրուցել երգչուհու հետ և լուսանկարել հետաքրքիր դրվագները։

«Այս օրն իսկապես լի է սիրով, ուզում եմ, որ բոլորիս կյանքում սերը շատ լինի։ Ցանկությունս է ստեղծել մի իրավիճակ, որտեղ մարդիկ կլինեն հանգիստ, կմոռանան իրենց հոգսերի մասին, կհիշեն սիրելի մարդկանց։ Իմ հանդիսատեսն ինձնից սպասում է երաժշտություն: Չնայած ինքս շոուներ սիրով եմ դիտում, ամեն դեպքում, ես այն արտիստն եմ, ով մարդկանց երաժշտություն է տալիս»,֊ասաց Քրիստինեն։

Երգչուհին հուզմունքով նկատեց, որ պրեմիերա ունի, որը նվիրված է որդուն՝ Արեգին: ««Դու ես»–ը ստեղծվել է տղայիս համար, սակայն ես չեմ ուզում այն անձնավորել։ Ուզում եմ մարդիկ իրենց երեխաների համար զգան այս ստեղծագործությունն ու անկախ ձայնային տվյալներից իրենց փոքրիկների համար կատարեն այն, հասկանան, որ եթե մեր կյանքում մի լավ բան եղել է, ապա դա մեր փոքրիկների ծնունդն է։ «Դու ես»֊ը շատ պատահական հայտվեց իմ երգացանկում։ Ես հեղինակներին խնդրել էի, որ ինձ նման թեմայով ստեղծագործություններ ուղարկեն, պատահաբար լսելով այս գործը՝ հասկացա, որ այն պետք է լինի Արեգինը։ Հուսանք՝ հետագայում կկարողանանք նաև տեսահոլովակով ներկայացնել»,֊ասաց երգչուհին ու հավելեց, որ ստեղծագործությունն իրեն և Արեգին նվիրել է Մանե Հակոբյանը։

Քրիստինեի որդին դահլիճում ներկա չէր, ըստ երգչուհու, փոքրիկը մայրիկի կատարումներին հետևել է գլխավոր փորձի ընթացքում. «Արեգը ներկա էր մեր գլխավոր փորձին․ նրա մասնակցությունը և՛ օգնեց, և՛ խանգարեց։ Չեմ կարծում, որ նա այսօր պետք է այստեղ լինի, որովհետև ժամը 21:30-ին իր քնելու ժամն է։ Գլխավոր փորձին իրեն բերեցի, որպեսզի կարողանա իր շունչը թողնել այս դահլիճում և ես կարողանամ երգելիս իրեն զգալ։ Երգելու ժամանակ չեմ կարողանում նայել տղայիս։ Երբ երգելիս իրեն եմ նայում, ինձ մոտ ամեն ինչ խառնվում է, լավ է, որ ինքը դահլիճում չէ»։

Պրեմիերայից բացի Քրիստինեն հանդիսատեսին ներկայացրեց նաև ավելի հին ստեղծագործություններ։ «Երգացանկն ընտրելը ծրագրի ամենաբարդ հատվածն է, որովհետև, երբ կազմում ես երգացանկդ, չես կարող բոլոր երգերը ներկայացնել։ Կան հին երգեր, որոնք ես պետք է երգեմ այնքան ժամանակ, քանի դեռ բեմում եմ, այդ երգերն իմ երգացանկից դուրս չեն գա, որովհետև դրանք անչափ կարևոր դեր ունեն իմ կյանքում։ Այդ երգերից երկուսը «Հրաժեշտ» ու «Մայրիկ» ստեղծագործություններն են»,- ասաց նա:

Լուսանկարները՝ Էլեն Գասպարյանի