«Ես չեմ մտածում, որ Հայաստանում ինձ չեն գնահատել»․ Միրիամ Բաղդասարյանը՝ «Դեպի Եվրատեսիլ»-ին մասնակցելու, Կանադայում իր զբաղվածության ու չկոտրվելու մասին

Երգչուհի Միրիամ Բաղդասարյանը հայ հանդիսատեսին հայտնի դարձավ XFactor նախագծից, որտեղ նա ընդգրկված էր Էրիկ Կարապետյանի թիմում։ Երգչուհու՝ այս նախագիծը լքելը բավականին աղմկահարույց ստացվեց։ Միրիամի անունը կրկին սկսեցին քննարկել, երբ համացանցում տարածվեց կանադական «Ձայնը» նախագծում նրա ելույթը։ Երգչուհին, որը Լառա Ֆաբիանի թիմում էր, հայտնվեց եզրափակչում ու պայքարեց հաղթանակի համար։ Ներկայումս Միրիամը մասնակցում է «Դեպի Եվրատեսիլ» նախագծին։ Նա ներկայանալու է  Runaway ստեղծագործությամբ։ Երգը նա է հեղինակել՝ համագործակցելով երաժիշտներ Dan Cinelli-ի, Lucas Liberatore-ի, և Pascal Dufour-ի հետ։

Tert.am Life-ի հետ զրույցում Միրիամը խոսել է նախագծին մասնակցելու, չկոտրվելու և Կանադայում իր զբաղվածության մասին։

«Ես նախորդ տարի էլ էի ուզում մասնակցել, սակայն նոր եթերաշրջան չեղավ։ Իմանալով, որ այս տարի նախագիծը լինելու է՝ որոշեցի մասնակցել։ Քանի որ այնտեղ ես համագործակցում եմ երաժշտական գործակալության հետ, որոնց շնորհիվ երգում եմ տարբեր իրադարձությունների ժամանակ, եսնրանց հետ խոսեցի, ամեն ինչ արեցի, որ կարողանամ հայտ ներկայացնել ու երգել «Դեպի Եվրատեսիլ»-ի ընթացքում»,-ասաց Միրիամը։

Խոսելով իր ստեղծագործության մասին նա ոգևորված պատմեց․ «Երգիս անունը Runaway  է, որը չհանձնվելու, չընկճվելու ու առաջ նայելու մասին է։ Նպատակս է բոլորի մեջ արթնացնել մոտիվացիան, տեղ հասցնել այն հաղորդագրությունը, որ պետք է սեփական անձիդ հանդեպ վստահ լինես։ Պետք չէ հետ նայել ու անցյալի պարտություններով քեզ, քո կյանքը դատել»։

Չկոտրվել ու չհանձնվել երգչուհին նկատեց՝ սովորել է  Xfactor նախագծից։ Կանադական «Ձայնը», ըստ երգչուհու, իրեն տվել է սեփական ուժերն ու կարողությունները վերստին գնահատելու հնարավորություն։

«Ես չեմ մտածում, որ Հայաստանում ինձ չեն գնահատել, որովհետև ես այստեղ ունեմ բավականին լավ լսարան։ Մարդիկ, կարծում եմ, ինձ սիրում են և ինձ համար ամենակարևոր գնահատականը հանդիսատեսինն է»,-ասաց երգչուհին։  

Այս ընթացքում երգչուհին Կանադայում էր, որտեղ շարունակում էր ուսումն ու այն փորձում համատեղել երաժշտության հետ․ « «Ձայնը» նախագծից հետո որոշեցի, որ պետք է  ուսումս շարունակեմ, որովհետև բավականին ժամանակ ընդմիջում էի վերցրել։ Ուսմանս զուգահեռ ես Կանադայում սկսեցի աշխատել մի շատ հայտնի երաժշտական գործակալության հետ, որի շնորհիվ մի շարք ելույթներ եմ ունեցել տարբեր իրադարձությունների ժամանակ։ Իմ կատարումները ներկայացրել եմ իհարկե ավելի փակ շրջանակներում, ոչ թե հեռուստանախագծերում։ Հետո մասնակցեցի մի նախագծի, որտեղ երգչուհի Janis Joplin-ի կերպարով իր երգերն էի կատարում։ Սա ևս այս ընթացքում տեղի ունեցած նախագծերից է»։

Միրիամը նշեց՝ նախագծում հաղթելու դեպքում ամեն ինչ կանի, որ Հայաստանը բարձր հորիզոնականում հայտնվի, սակայն նա ոչ մի տարբերակ չի բացառում, եթե պարտվի․ «Պարտության դեպքում չեմ կոտրվի, որովհետև ես սովոր եմ և՛հաղթանակների, և՛ պատությունների։ Երկուսն էլ պատրաստ եմ գրկաբաց ընդունել։Կարծում եմ, Հայաստանը «Եվրատեսիլ 2020» մրցույթում պետք է ներկայացնի այն մասնակիցը, որը կլինի լավագույնը, իսկ նրա անունը հայտնի կդառնա շոուի ավարտից հետո։ Ես մրցակցություն բառը երաժշության մեջ  չեմ սիրում։ Նախագծում յուրաքանչյուրն էլ փայլում է իր տեսակի մեջ ու կարող են թե՛ հաղթել, թե՛ պարտվել»։