«Երկարատև սերիալներում այլևս չեմ նկարահանվի»․ Ադրիանա Գալստյանը՝ «Վայրենի տատին» հումորային նոր ֆիլմի և սպասվող նորությունների մասին

16:09 • 20.02.20

Շոուբիզնես

Դերասանուհի Ադրիանա Գալստյանը կարճատև դադարից հետո վերադարձել է ֆիլմի նկարահանման հրապարակ։ Ադրիանան շուտով ներկայանալու է «Վայրենի տատին» գեղարվեստական նոր ֆիլմում, որը ռեժիսոր Հենրի Քոչարյանի «Փոքրիկ զորավարը» ֆիլմի շարունակությունն է, սակայն նախորդի հետ սյուժետային կապվածություն չունի։

Tert.am Life-ի հետ զրույցում Ադրիանան խոսել է դադարի ընթացքում իր զբաղվածության, նոր ֆիլմում հանդես գալու և առաջիկա նորությունների մասին։

Խոսելով «Վայրենի տատին» գեղարվեստական հումորային ֆիլմի և իր կերպարի մասին՝ դերասանուհին նշեց․ «Առաջարկը ռեժիսորից եմ ստացել, մեր համագործակցությունը սկսվել և շարունակվում է առողջ, արդյունավետ մթնոլորտում։ Աշխատում եմ պրոֆեսիոնալ, կազմակերպված թիմի հետ, ինձ միայն հաճելի է նման մարդկանց հետ նույն նախագծում հանդես գալը։ Այստեղ հումորը հումոր է, իսկ գործը՝ գործ»։

Անդրադառնալով եթերային դադարին և այդ ընթացքում իր զբաղվածությանը՝ Ադրիանան նշեց․ «Կարծում եմ՝ աշխատանքային դադարները պետք են այս ասպարեզում ճիշտ գործունեություն ծավալելու, շարունակելու համար։ Դադարը միայն հեռուստասերիալներում էր, տեսահոլովակներն ու գովազդային համագործակցությունները շարունակվում էին»։

Դերասանուհին ասաց, որ առաջիկայում իր հետևորդներին անակնկալ է սպասվում։ «Երկարատև սերիալներում այլևս չեմ նկարահանվի, ինձ համար պարզ էր, որ հաջորդ աշխատանքս գեղարվեստական ֆիլմում է լինելու։ Սերիալն ու գեղարվեստական ֆիլմերը տարբեր աշխարհներ են՝ և՛ աշխատանքն է տարբեր, և՛ պատասխանատվությունը, և՛ սպասումը։ Ամեն դեպքում մեկը մյուսին լրացնում են. սերիալում կերպարային գծի անընդհատ զարգացման հետ ամրապնդվում են խաղային հմտությունները, գեղարվեստական ֆիլմում քեզ զգում ես բալանսի մեջ»։

Ադրիանան ասաց, որ բացի նկարահանումները, այժմ զբաղված է նաև ներկայացման փորձերով: Թե ինչ ներկայացման մասին է խոսքն ու ինչ անակնկալ է խոստանում, Ադրիանան առայժմ չցանկացավ բացահայտել: