«Երեխայի ծննդից հետո ես ու ամուսինս շատ փորձությունների միջով անցանք»․ Նարե Գրիգորյանը՝ որդու խնամքի ու ամուսնու հետ հարաբերությունների մասին

Երգչուհի Նարե Գրիգորյանն ու ամուսինը՝ իրավաբան Արամ Շամիլյանը, իրենց ընտանիքի կազմավորման երկրորդ տարեդարձը նշել են ծնողների կարգավիճակով։ Փոքրիկ Ժիրայր-Ալեքսը նրանց կյանքին նոր գույն է հաղորդել, ըստ երգչուհու, երբեմն նկատում են, որ մոռացել են իրենց մասին, քանի որ ժամանակի, ուշադրության մեծ մասը որդուն է բաժին հասնում։

Երգչուհին Tert.am Life-ի հետ զրուցել է ընտանեկան կյանքի, մայրիկ լինելու առանձնահատկության և երեխայի խնամքի գործում ամուսնու դերի մասին։

Ժիրայր-Ալեքսը լույս աշխարհ է եկել նախորդ տարվա հոկտեմբերի 3-ին։ Երգչուհու խոսքով՝ իր համար այդ ընթացքում բավականին բարդ է եղել, քանի որ փոքրիկի խնամքով ինքն ու ամուսինը միայնակ են զբաղվել։

«Մեր կյանքում ամեն ինչ շատ արագ ու անսպասելի ստացվեց, հատկապես, բալիկի ծնունդը: Նա մեր տան ամբողջ մթնոլորտը փոխեց։ Այդ շրջանում մայրիկս առողջական խնդիրներ ուներ, սկեսուրս Հայաստանում չի ապրում և փոքրիկիս խնամքն ամբողջությամբ ու անմիջապես ես ստանձնեցի, չունեի օրինակ, փորձ։ Չնայած դժվարություններին, կարծում եմ, այդպես ավելի ճիշտ էր՝ շատ արագ մեծացանք, հասկացած, որ մենք ծնողներ ենք։ Կարծում եմ՝ սա այն հրաշալի երևույթն է, որից հետո  կնոջ կյանքում ամեն ինչ ինքնաբերաբար ստացվում է»,-ասաց երգչուհին։

Խոսելով փոքրիկի խնամքի ու բարդությունների մասին՝ Նարեն նշեց, որ առանց ամուսնու օգնության չէր կարողանա գլուխ հանել․ «Շատ շնորհակալ եմ ամուսնուս, եթե իր գնությունը  չզգամ, իսկապես, հնարավոր է խելագարվեմ։ Հետծննդաբերական սթրես ասվածն իրոք կա, հատկապես, երբ առաջին անգամ ես մայր դառնում։ Իմ կյանքում հայտնվեց մի փոքրիկ, որի ամբողջ պատասխանատվությունն ինձ վրա էր, բայց ես երեխաների խնամքի մասին որևէ բան չգիտեի։ Երեխայի ծննդից հետո ես ու ամուսինս շատ փորձությունների միջով անցանք, առաջին 15-20 օրից հետո սկսեցինք ադապտացվել։ Գուցե մայրական բնազդով պայմանավորված ամեն ինչ արեցի, որովհետև անմիջապես սկսում ես քեզ ավելի պատասխանատու զգալ։ Չեմ կարողանում խորը քուն մտնել, որովհետև տղաս ամեն րոպե կարող է արթնանալ, քաղցած լինել։ Բայց, անկախ ամեն ինչից, մեր կյանքը շատ է փոխվել, ես ու ամուսինս, անկախ մեզնից, ժպտում ենք, որովհետև Ժիրայր-Ալեքսը փոխել է մեր առօրյան»։

Նարեն նկատեց, որ ամուսինն ամեն հարցում աջակցում է իրեն՝ չնայած հայկական իրականության մեջ եղած կարծրատիպերին, որ երեխայի խնամքով կինն է զբաղվում․ «Ամուսինս հայ տղամարդ է, ինքն էլ իր մեջ որոշ գծեր ունի, սակայն դրանք թողնում է մի կողմ ու օգնում ինձ։ Հավասարապես խնամում է երեխային, առանց նրա ես ոչինչ չէի կարող անել։ Ի հեճուկս տարբեր կարծրատիպերի՝ ամուսինները պետք է գիտակցեն, որ շատ հաճելի է օգնել կնոջդ, կիսել փոքրիկի խնամքը։ Փոքրիկին մեծացնելը հաճելի պարտականություն է ծնողների համար, ծնողներից միայն մեկը չի կարող երեխային լիարժեք տալ այն, ինչը կտան երկուսը։ Բացի այդ, կնոջ հոգնածությունն իր հետ կարող է վատ հետևանքներ բերել»։

Երգչուհին ասաց, որ ամուսնու օգնության շնորհիվ ծննդաբերությունից ընդամենը երկու ամիս հետո կարողացել է վերադառնալ աշխատանքային նախկին գրաֆիկին։  

«Երեխայի ծննդից մոտ երկու ամիս անց վերադարձա իմ նախկին գրաֆիկին, այդ հարցում ինձ աջակցեցին մայրիկս ու ամուսինս։ Նրանք հետևում են փոքրիկին, երբ ես ձայնագրման եմ լինում։ Չնայած բալիկս դեռ շատ փոքրիկ է, այս ամիսների ընթացքում հասցրել է քաղաքի գրեթե բոլոր ձայնագրման ստուդիաներում լինել»,-ասաց Նարեն ու հավելեց, որ դայակի ծառայությանը դեմ չէ, սակայն չի դիմում, քանի որ անհրաժեշտություն չի զգում։  

Անդրադառնալով ամուսնության տարեդարձին՝ երգչուհին ասաց, որ իրենց կյանքում որևէ դերակատարում չեն ունեցել ոչ ամուսնության վկայականը, ոչ էլ մատանին, քանի որ միշտ վստահ են եղել, որ միմյանց երջանկացնում են․ «Անսահման երջանիկ ենք, ուրիշ ոչ մի բառով չեմ կարող նկարագրել այն, ինչ հիմա ապրում ենք։ Տղաս շատ է հագեցրել մեր կյանքը, երբեմն, ես ու ամուսինս նկատում ենք, որ մեզ մոռացել ենք։ Չորս տարի է՝ ես ու Արամը միասին ենք, ամեն տարվա հետ հասկանում ենք՝ իսկապես հրաշալի է, որ եհանդիպել ենք։ Ես դեռ չեմ կարողանում հասկանալ, թե ինչպես ամեն ինչ այսքան արագ ստացվեց։ Հետ նայում միասին ապրած տարիներին ու հասկանում, թե որքան արագ է անցնում ժամանակը, սիրելի մարդկանց հետ ամեն վայրկյանը պետք է երջանիկ անցկացնել, վայելել: Դա աստծո պարգև է»։