Գրիգն ու Սոնան վերադառնում են եթեր. Սոնայի կերպարանափոխությունը, նոր ֆոտոշարքն ու առաջիկա ծրագրերը

Women's club նախագիծը լքելուց հետո ունեցած հեռուստատեսային դադարից հետո Գրիգն ու Սոնան շուտով կվերադառնան եթեր: Ամուսինները նոր նախագիծ են պատրաստել, որը կներկայացնեն «Շանթ» հեռուստաընկերությամբ:

Չնայած զբաղված գրաֆիկին՝ Սոնան այս ընթացքում հասցրել է նաև նոր ֆոտոշարք իրականացնել, որը տրամադրել է Tert.am Life-ին ու պատմել ոչ միայն ֆոտոշարքի համար արված կերպարանափոխության, այլև Գրիգի հետ նոր նախագիծ սկսելու մասին:

Պարուհին նոր ֆոտոշարքում ներկայանում է դրեդ հյուսքերով: «Այսպես ներկայանալու գաղափարն իմն էր, որովհետև ունեի համապատասխան հագուստ, մտածեցի՝ շատ սիրուն կլինի, եթե այդ սանրվածքն ընտրեմ: Այն համապատասխանում է ինձ: Արվին Քոչարյանի հետ քննարկեցինք միտքն ու հասկացանք, որ շատ սիրուն կլինի: Նա փորձում էր ինձ տեսնել ավելի կանացի կերպարում, ես փորձում էի ներկայացնել և՛ վայրիություն, և՛ կանացիություն: Մեր գաղափարները միախառնվեցին ու ստացանք շատ հետաքրքիր արդյունք: Սա չենք արել հատուկ տարբերվելու, առանձնանալու համար, ուղղակի փորձել ենք ավելի արտահայտիչ դարձնել իմ կերպարը: Ֆոտոշարքում ավելի արտահայտված է իրական «ես»-ս»,- ասաց Սոնան:

Նա նշեց, որ կերպարանափոխություններն իրեն բարդ չեն տրվում: Սիրում է ներկայանալ տարբեր ոճերում. «Կերպարանափոխվել շատ եմ սիրում, մի օր կարող եմ լինել շատ դասական ոճում, մի օր շատ casual: Սանրվածքս էլ մի օր կարող է գժական լինել, հաջորդ օրը՝ կոկիկ, հավաքված: Առօրյայում հաճախ լինում եմ ազատ ոճում, բայց կերպարանափոխվել չեմ վախենում»:

Սոնան հայտնեց, որ այս շրջանում Գրիգի հետ հեռուստատեսային նոր նախագծի ուղղությամբ են աշխատում, որ նկարահանումները կսկսեն մի քանի օրից:

«Ես ու Գրիգն այս շրջանում պատրաստվում ենք մեր նոր հեռուստանախագծին: Ունեմ նաև անձնական նախագծեր՝ «Սոնան տանը չի», «Պարիր Սոնայի հետ»: Այս փուլում շատ զբաղված ենք, ստուդիայից, գրեթե, դուրս չեմ գալիս: Գարնան երկրորդ ամսին կներկայացնեմ ևս մի նախագիծ: Նույնիսկ չեք կարող կռահել, թե ինչ նախագծի մասին է խոսքը, բայց կարծում եմ՝ կսիրվի»,- ասաց պարուհին:

Սոնայից հետաքրքրվեցինք, թե ինչպես է համատեղ աշխատանքն ազդում իր և Գրիգի ընտանեկան հարաբերությունների վրա և հակառակը: Պարուհին կարևորեց այն հանգամանքը, որ իր ու ամուսնու զբաղվածությունը համաչափ է, որևէ մեկը դժգոհելու տեղ չի ունենում:

«Իմ ու Գրիգի համատեղ աշխատանքը տարիների փորձ ունի, որովհետև իմ նախագծերի պրոդյուսինգով ինքն է զբաղվում: Ընտանեկան հարաբերությունների վրա դա ընդհանրապես չի ազդում: Այնպես չէ, որ մեկս մյուսից ավելի զբաղված ենք, երկուսս էլ այնքան զբաղված ենք, որ առավոտյան տանից դուրս ենք գալիս, գիշերը շատ ուշ հոգնած վերադառնում: Ժամանակ էլ չի լինում, որ տանը նստենք, խոսենք: Չեմ կարող ասել, որ աշխատանքն ազդում է մեր ընտանեկան հարաբերությունների վրա: Եթե մեկս ավելի քիչ զբաղված լիներ, կարող էր խնդիր առաջանալ, բայց այս դեպքում նման խնդիր չունենք»,- ասաց նա:

Լուսանկարները՝ Արվին Քոչարյանի