«Մազերս կտրելուց հետո սթրես էի ապրում, արտասվում էի»․Էվա Խաչատրյանը՝ ոճափոխությունից հետո ունեցած ապրումների և այլևս ոճը չփոխելու որոշման մասին

Դերասանուհի Էվա Խաչատրյանը այն հայտնիներից է, որոնց ոճափոխված դժվար է տեսնել։  Գրեթե միշտ Էվան ներկայանում է հեռուստադիտողներին և հանդիսատեսին արդեն հայտնի կերպարով։ Նա նշում է, որ փոփոխությունների բացակայությունը պայմանավորված է ոչ թե ցանկության բացակայությամբ, այլ անհրաժեշտություն չտեսնելով։ 

Tert.am Life-ը Էվայի հետ զրուցել է ժամանակին արված կտրուկ ոճափոխության հետևանքների, իր համար ընդունելի կերպարի և նախընտրելի ոճի մասին։

Դերասանուհին ժամանակին փորձել է փոփոխություն անլ, սակայն համոզվել է, որ դա համար չէ։ Տարիներ առաջ էվան կտրել է վարսերը, ներկայացել շիկահերի կերպարով, բայց այս բոլոր փորձարկումները նրան հանգեցրել են այն մտքին, որ ինքը պետք է մնա այնպիսին, ինչպիսին կա՝ շագանակագույն վարսերով, փարթամ ու երկար սանրվածքով։

«Տարիներ առաջ որոշեցի մազերս բավականին կարճ կտրել։ Միանգամից հասկացա, որ իմ կողմից դա շատ սխալ որոշում է: Երկար ժամանակ սթրես էի ապրում՝ անգամ արտասվում էի։ Հաշվի առնելով այդ ապրումներս, չեմ կարծում, որ երկրորդ անգամ նման ռիսկի կգնամ։ Առաջին մեկ շաբաթը շատ ծանր էր։ Ես ոչ մի կերպ չհամակերպվեցի նոր սանրվածքիս․ երկու օր անց դիմեցի վարսրահարդարին մազերս արհեստական երկարացնելու համար։ Որքան էլ ստացվեց հետ բերել նախկին երկարությունը, իմ սիրելի գանգուրները չէի ստանում։ Խատուտիկի նման մի բան էր ստացվում»,- ծիծաղելով ասաց Էվան։  

Դերասանուհին նշեց, որ բնությունն իրեն փարթամ գանգուրներով է օժտել, ինչը շատ համապատասխան է թե՛ իր ներաշխարհին, թե՛ բնավորությանը: Ըստ Էվայի՝ դա փոփոխելը սխալ կլինի։

«Մազերի գունային շատ կտրուկ փոփոխություններ ևս չեմ անում։ Մազերս իրենց բնական գույնից մեկ-երկու տոն բաց եմ ներկում, երանգային թեթև փոփոխություններ եմ անում՝ պահպանելով շոկոլադի գույնը։ «Եղբայրներ» հեռուստասերիլում ես շիկահեր էի, բայց դա էլ իմը չէր։ Իհարկե, մենք՝ աղջիկներս, երբեմն անում ենք էքսպերիմեներներ, փորձում ենք գտնել այն ոսկե միջինը, որը մեզ լավագույնս կհամապատասխանի։ Իմ մաշկի, աչքերի գույնը, մազերիս գագուրությունը հաշվի առնելով՝ կարծում եմ, ճիշտ է ամեն ինչ պահել այնպես, ինչպես կա։ Կտրուկ փոփոխությունների չդիմելը ցանկության բացակայության խնդիր չէ, դրանք ուղղակի պետք չեն»,-ասաց դերասանուհին։

Դերի համար արված փոփոխություններին Էվան դեմ չէ, սակայն, վստահ է՝ դերասանին «տանջելու» անհրաժեշտություն չկա, քանի որ ներկայումս գրիմի տեխնիկան շատ զարգացած է․ «Հիմա այնքան նորարարական երևույթներ կան, որ ամեն ինչ հնարավոր է ստանալ իդեալական՝ բնականին մոտ:  Եթե լինի այնպիսի դեր, որի համար պետք է սպիտակ մազերով ներկայանամ, դա կարելի է ստանալ կեղծամով։ Վերջերս «Գահերի խաղը» հեռուստասերիալի backstage-ն էի դիտում։ Այդքան եթերաշրջան դիտելուց հետո միայն այդ տեսանյութից իմացա, որ գլխավոր հերոսուհին ողջ ընթացքում կեղծամով եղել»։  

Հագուստի տեսանկյունից ևս դերասանուհին նախընտրում է զերծ մնալ փորձարկումներից։ Էվան սիրում է հարմարավետությունը համադրել ոճային տարրերի հետ, առօրյայում չի սիրում շատ վառ կերպարով լինել։

«Սեքսուալությունը հագուստով չես ստանա։ Հագուստը մեզ կարող է տալ ցայտուն տեսք, սակայն չի դարձնի սեքսուալ։ Առօրյայում խուսափում եմ ցայտուն տեսք ունենալ։ Սովորական օրերին մեծ մասամբ նախընտրում եմ ջինսեր և գործվածքային, լայն բլուզներ։ Այդ ամենը սիրում եմ համադրել կոպիտ, ճտքավոր կոշիկների հետ։ Համենայն դեպս, ձմեռային ոճս այդպիսին է։ Ես շատ մրսկան մարդ եմ և շատ եմ կարևորում տաքությունն ու հարմարավետությունը։ Եթե միջոցառման չեմ գնալու, առօրյայում ցայտուն տեսք չեմ ունենում։ Կրում եմ բլուզներ, որոնք չեն ընդգծում կազմվածքս, փոխարենը հարմար են, հանգիստ ու հաճելի»,-ասաց դերասանուհին ու հավելեց, որ ինքը սպիտակ գույնի սիրահար է, իր պահարանում դժվար է վառ գույն գտնելը։