«Իմ կյանքում կանայք շատ են եղել և շատ են»․ Աղաս Մանուկյանը՝ «Աղասի 10 կանայք» նոր նախագծի ու իր կնոջ արձագանքի մասին

16:31 • 28.02.20

Շոուբիզնես

Դերասան, հումորիստ Աղաս Մանուկյանը ներկայումս նկարահանվում է «Հարս չկա» հումորային նախագծում, բացի այդ, շուտով հանդես կգա նոր «սթենդ ափ»-ով։ Ավելի քան 7 տարի ամուսնացած դերասանը պատրաստվում է ապրիլի 1-ին ներկայացնել «Աղասի 10 կանայք» պրովոկացիոն վերնագրով «սթենդ ափ»-ը։

Իր նախագծի առաջին մանրամասների, կնոջ արձագանքի ու նյութը նույնիսկ նրանից գաղտնի պահելու մասին հումորիստը պատմել է Tert.am Life-ին։

«Ներկայացումն ամբողջությամբ կանանց մասին է: Այնպես չէ, որ միայն կանանց մեկամսյակի ընթացքում է լինելու, քանի որ, համաձայն նախնական պայմանագրի, ամենաքիչը մեկ տարի «Աղասի 10 կանայք» կլինի բեմում։ Շատ ռեսուրս ենք ներդրել, որպեսզի լավ արդյունք ունենանք։ Մեծ թիմ է աշխատում՝ սցենարիստները Վահան Մովսեսյանը, Սարգիս Կալպակյանը և Արտուշ Գևորգյանն են, ունենք նաև սցենարիստներ, որոնց հետ օնլայն ենք աշխատում։ Ես նույնպես սցենարական կազմում եմ։ Պրոդյուսերը Արմեն Պետրոսյանն է»,-ասաց հումորիստը։

Վերնագրում նշված 10 թվի մասին Աղասը նախընտրեց չխոսել՝ ներկայացման հետաքրքրությունն ու ինտրիգը պահելու համար։

«Կարծում եմ՝ ինտրիգը մեծապես կապված է նաև վերնագրի ընտրության հետ՝ «Աղասի 10 կանայք»։ Ես նախապես մեծ ծրագրեր ներկայացնել չեմ սիրում, նախընտրում եմ մարդիկ գան, ամեն ինչ տեսնեն, գնահատեն, բայց իսկապես շատ-շատ ծիծաղելի նյութ ենք հավաքել։ Որքան էլ մենք կողմից հումորային հավելումներ ենք արել, «սթենդ ափ» դարձրել, պատմություններն իրենք իրենցով ծիծաղելի են։ Շատ արդիական պատմություններ են՝ հորինված չեն, հերոսուհիներն այն կանայք են, որոնք իրականում եղել են իմ կյանքում»,-ասաց Աղասը։

«Սթենդ ափ»-ում՝ 10 կին է նշվում, հարցին՝ իրականում քանի՞ կին է եղել հումորիստի կյանքում, նա պատասխանեց․ «Այդ հարցին կփորձեմ չեզոք պատասխանել՝ իմ կյանքում կանայք շատ են եղել և շատ են»։

Ըստ Աղասի՝ իր կինը՝ Տաթևիկը, նույնպես հանկարծակիի է եկել վերնագիրը լսելով։ «Երբ կինս առաջին անգամ լսեց «Աղասի 10 կանայք» արտահայտությունը, մի քիչ շփոթվեց՝ ո՞նց թե «Աղասի 10 կանայք»։ Նրան ոչինչ չեմ պատմել ներկայացման մասին, հանդիսատեսի պես նա էլ նյութին կծանոթանա պրեմիերայի օրը։ Իսկապես պատկերացում չունի, թե կոնկրետ ինչից եմ խոսելու, ովքեր են այդ կանայք, ինչ բնույթի հումորներ են։ Թիմով պայմանավորվել ենք, որ բացի մեզանից, անգամ, հարազատ մարդիկ մինչև պրեմիերան չպետք է իմանան մեր հումորները»։

Կնոջ արձագանքը Աղասի համար սպասելի է, սակայն վստահ է, որ նա էլ հումորով կվերաբերի ներկայացմանը․ «Կյանքից ձեռք չեմ քաշել, որ ուրիշ բաներից խոսեմ՝ թեթև իրավիճակներ են, ծիծաղելի փաստեր կանանց մասին ու կյանքի հետաքրքիր դրվագներ։ Կարծում եմ՝ կինս դրական կարձագանքի, որովհետև կատակոիմ ենք, ինքն էլ շատ հումորով է»։

Դերասանն ասաց, որ որքան էլ կանանց մասին հումորով խոսեն, նրանք ամենասիրելի ու առաջնային մարդիկ են: «Իմ կյանքում կանայք առաջնային դերակատարում ունեն, որովհետև կանանց պետք է մեծարել, գովել, լավ խոսքեր ասել, նշել, որ նա կարող է, ուժեղ է։ Տղամարդը չպետք է կնոջը ցավ պատճառի, եթե հանկարծ ցավ էլ է պատճառում, ապա պետք է փորձի գոնե քիչ, որ դանակը ոսկորին չհասնի։ Օրինակ՝ կինս իմ լավագույն ընկերն է, որովհետև կյանքի ամնաանհաղթահարելի դրվագներում միակ մարդը, որը կանգնած էր կողքիս, նա է եղել»։