«Դատական գործընթացը մեծ գլխացավանք է»․ Սիլվա Հակոբյանը՝ դատարան դիմելու մասին

Երգչուհի Սիլվա Հակոբյանի երգերը հաճախ են հայտնվում արտերկրի կատարողների երգացանկում։ Երբեմն դրանք cover տարբերակով են հասանելի դառնում, երբեմն՝ երաժշտական տարբեր մրցույթների բեմերում, երբեմն էլ տեսահոլովակի տեսքով հայտնվում են կատորղների Youtube-յան պաշտոնական էջերում առաննց հեղինակային իրավունքի պահպանման:

Վերջին երկու հրապարակումներում Սիլվան հետևորդներին ներկայացրել է այս խնդիրը. իրեն հաջողություն բերած «Գիշեր է» երգը հնչել է ղազախական Got Talent-ի բեմում, իսկ «Կամաց-կամաց» երգն օրերս հնչել է արաբական MBC The Voice շոուի ժամանակ։  Սիլվան տեղեկացրել է նաև, որ ավելի վաղ արաբ երգչուհիներից մեկը տեսահոլովակ է նկարահանել «Կամաց-կամաց» երգի հիման վրա:   

Tert.am Life-ի հետ զրույցում Սիլվան ասաց, որ այս ամենին ժպիտով է արձագանքում, փորձում է ամեն հարցում ուշադրությունը սևեռել դրական կողմի վրա։ Հաշվի առնելով հեղինակային իրավունքների խնդիրը՝ երգչուհին կարող է դատական գործ հարուցել, սակայն նա նշեց, որ փորձում են խուսափել դատական քաշքշուկից։

«Հիմնականում այդ հոլովակներն ինձ ուղարկում են մարդիկ, որոնք ապրում են տվյալ երկրներում, հետևում են իմ ստղծագործական կյանքին, գիտեն իմ կատարումները։ Սովորաբար ասում են՝ Սիլվա ջան, մի բան արեք, ձեր երգերն են երգում, փորձեք պահել հեղինակային իրավունքները, դատական գործ հարուցեք և այլն։ Դեպքերը շատ տարբեր են՝ երբեմն ինձ զգուշացնում են, երբեմն՝ ոչ, սակայն անունս նշում են, երբեմն էլ ոչինչ չեն անում՝ երգը ներկայացնելով որպես իրենցը»,-ասաց Սիլվան։  

Երգչուհին նկատեց, որ նման դեպքերը եզակի չեն․ «10 տարի շարունակ իմ երգերը վերցնում են, cover անում, տեսահոլովակներ նկարահանում։ Նման թեմաներով հիմնականում հայրս է զբաղվում։ Նախկինում շատ էմոցիոնալ էի արձագանքում, հիմա ավելի դրական եմ նայում այս հարցին։ Փորձում եմ այս ամբողջ պատմության մեջ տեսնել դրական կողմը՝ քարոզում են իմ ստեղծագործությունները, դրանք տարածվում են, ճանաչելի են դառնում արտերկրում։ Իհարկե վատ է, որ երգի իրական կատարողին հաճախ չեն իմանում, բայց երգն ապրում է»,-ասաց երգչուհին։

Սիլվայի խոսքով՝ կան երկրներ, որտեղ բարեխղճորեն նշում են իր անունը, արդեն իրեն էլ են հասցրել ճանաչել, որպես իրենց սիրելի ստեղծագործությունների կատարող․ «Օրինակ՝ Ղազախստանում ինձ շատ են ճանաչում, քանի որ համագործակցում ենք, իմ երգերը հաճախ են կատարում այնտեղ: Այլ երկրներ էլ  կան, որտեղ պահպանվում են հեղինակային իրավունքները։ «Կանաչ-կարմիր», «Խաչիկ-Վաչիկ», «Գիշեր է», «Սիրելու», «Կամաց-կամաց», «Դե գնա», «Նորահարսիկը»... կարելի է շարունակել այն կատարումների շարքը, որոնք հնարավոր է տեսնել օտարալեզու երգիչ-երգչուհիների երգացանկում իրենց լեզվով»։  

Անդրադառնալով դատական գործերին՝ Սիլվան ասաց․ «Իսկապես չգիտեմ նման իրավիճակում ինչ կարելի է անել, որովհետև դատական գործերը բավականին բարդ ընթացք են ենթադրում։ Քանի որ դա բավականին մեծ գլխացավանք է, ես ուղղակի չեմ դիմում դատարան։ Միայն այստեղ փաստաբան վարձելով չէ, պետք է նաև այդ երկրներում ներկայացուցիչ ունենալ, որպեսզի նա այդ հարցերը կարգավորի։ Սա ինքնին մեծ ու դժվար գործ է։ Եթե մեկ ուրիշն իմ տեղը լիներ, հնարավոր է աներ, ես՝ ոչ։ Ուղղակի ուրախ եմ, որ իմ երգերը թևեր են առնում և տարածվում են տարբեր երկրներում»։