«Հայաստանում մրցանակ տալը խնդիր է, բայց կարողացել ենք հարաբերությունները պահել տանելի մակարդակում». Van music awards-ի բոլոր մրցանակակիրներն ու ժակի բացահայտումները

13:51 • 29.02.20

Շոուբիզնես

Van music awards 2019-ն արդեն իրականություն է: Տարիներ շարունակ ռադիոկայանը հարթակ է տրամադրում այլընտրանքային երաժշտությանն ու ամենամյա մրցանակաբաշխություն իրականացնում:

Tert.am Life-ը ներկա է եղել միջոցառմանն ու ներկայացնում է հետաքրքիր դրվագներն ու բոլոր մրցանակակիրներին:

Քանի որ միջոցառման հիմնական հաղորդավարական զույգը՝ Ժակն ու Լուսինե Բադալյանն այլևս միասին չեն ներկայանում, Լուսինեն իր գործունեությունն է ծավալում որպես պատգամավոր, այս տարի միջոցառումը վարում էին «Վանի» բոլոր հաղորդավարները: Երաժշտական համարները համեմվում էին նրանց սթեդափերով:

Մրցանակաբաշխությունն ուներ 11 մրցանակակիր: Այս տարի հաղթողներին որոշել էին ոչ միայն ունկնդիրները, այլև «Ռադիո Վանի» ստեղծագործական ժյուրին: Ժակը նկատեց, որ մեր երկրում սովորաբար նեղանում են, երբ մրցանակ չեն ստանում, բայց իրենք կարողանում են պահել հավասարակշռությունը:

«Հայաստանում մրցանակ տալը և վերցնելը խնդիր է: Մենք կարողացել ենք մրցանակ տալ և հարաբերությունները պահել տանելի մակարդակում: Սկզբում որոշվել էր, որ պետք է լինի միայն հանրային քվեարկություն, հետո հասկացանք, որ միայն դրա վրա հիմնվելը բարդ կլինի և կազմվեց «Ռադիո Վանի» ստեղծագործական ժյուրի: Փորձեցինք բալանսավորել և մաքսիմալ մոտ լինել օբյեկտիվությանը: Դա արդարության միակ ճանապարհն էր: Եթե թողնում ես միայն հանրային քվեարկությանը, հաղթում է ոչ թե լավագույնը, այլ այն կատարողը կամ խումբը, որի թիմն ավելի լավ է աշխատում օնլայն հարթակներում»,- ասաց նա:

Ժակը նկատեց, որ արդեն 2 տասնամյակ է՝ իրենք իրականացնում են երաժշտական մրցանակաբաշխություն: Այս տարին նրանց համար առանձնահատուկ էր. «Համարձակ քայլ արեցինք: Չգիտեմ, որքանով է արդարացված, բայց կառուցեցինք երաժշտական ստուդիա, ինչը մասնավոր ռադիոկայանի համար շատ բարդ է: Մեծ հաշվով՝ պոպուլյար երաժշտությունը ստեղծվում է միայն որոշակի միջոցառումներին լսելի լինելու, տրամադրություն փոխանցելու համար, սակայն ձևավորվել է մի մշակույթ, երբ խմբերը փորձում են ներկայացնել cover-ներ, իրենց ստեղծագործությունները: Մենք որոշեցինք աջակցել այն խմբերին, որոնք ձգտում են կենդանի ելույթ ունենալ: Թեև խմբերն անդերգրաունդային չեն, մրցանակաբաշխությունն այլընտրանքային է՝ ֆոլկ և էթնո երաժշտության գերակայությամբ, որը ձուլված է երաժշտական տարբեր ոճերի հետ»,- ասաց Ժակը:

Ռադիոկայանն առանձնացրել է 11 անվանակարգ, որոնցից մեկն ընտրվել է միայն հանրային քվեարկությամբ: «10 ամսվա բոլոր հաղթողների միջև 1 ամիս հավելյալ մրցույթ անցկացվեց, քվեարկեցին ունկնդիրները: Նրանցից ամենաշատ միավոր հավաքած խումբը ստացավ «Հանրության սեր» մրցանակը»,- ասաց Ժակը:

Այսպիսով՝ Van music awards 2019-ի մրցանակակիրներն են.

Arni Rock, Haik Solar և Սոնե Սիլվեր – Հանրային ընտրություն

Գարիկ, Սոնա- Համար 1 հիթմեյքերներ

«Նեմրա» - Ռադիոկայանի համար 1 ընկերները

Իլոնա - Համար 1 «cover» կատարող

Vishup Ensemble & Tmbata - Համար 1 երաժշտական պրոդյուսեր

Aratta Band – Համար 1 «Ֆյուժն» բենդ

Sonet Quintet - Քաղաքային ժանրի համար 1 կատարողներ

FairWind - Համար 1 ռոք խումբ

«Կաթիլ» բենդ - Համար 1 հայտնագործություն

Սյուզաննա Մելքոնյան – Կնոջ՝ համար 1 կատարում

Arpi & Hayway Band - Համար 1 բենդ