«Տղաս շատ հետաքրքիր կերպար է». Արևիկ Ուդումյանը՝ հեռուստատեսությունից դուրս գալու որոշման և որդու ծննդից հետո եղած փոփոխությունների մասին

Հաղորդավարուհի Արևիկ Ուդումյանը վերջին շրջանում հեռուստատեսությունում չի ներկայանում, սակայն շարունակում է ներկայանալ որպես հաղորդավարուհի: Միշտ տարբեր աշխատանքներով զբաղվող Արևիկը որդու՝ Ռուբենի ծննդից հետո գրաֆիկը թեթևացնելու կարիք է ունեցել, բայց քանի որ տեսակով պրպտող է ու չաշխատել չէր կարող, որոշել է թիմ հավաքել ու տարբեր թեմաներով տեսանյութեր պատրաստել Ինստագրամի իր հետևորդների համար:

Tert.am Life-ի հետ զրույցում Արևիկը խոսել է կյանքի և գործունեության այս շրջանի մասին:

Արևիկի խոսքով՝ համացանցն իրեն հնարավորություն է տալիս ունենալ նոր արտադրանք ստեղծելու, ստեղծագործելու ազատությունը, միաժամանակ ունենալ իր համար ցանկալի ժամանակը որդուն, ամուսնուն, հարազատներին նվիրելու համար:

«Ամենալավն այն է, որ կարողանում եմ տղայիս հետ անցնել բոլոր փուլերը, վայելել իր հետ շփումը: Մինչև Ռուբենի ծնունդը շատ էի աշխատում, բայց հիմա մեր ընտանիքի համատեղ ժամանցը երբեք չի տուժում իմ գրաֆիկի պատճառով,- ասաց նա ու հավելեց, որ որդու հետ ժամանակ անցկացնելն ավելի ու ավելի հետաքրքիր է դառնում: -Գնալով ընկերներ ենք դառնում: Տղաս շատ հետաքրքիր կերպար է՝ հումորով, պայծառ, ուրախ: Շատ ջերմ երեխա է: Իր հետ ժամանակ անցկացնելը լի է բացահայտումներով. կարելի է անվերջ լսել այդ տարիքի երեխաների խոսքը, որովհետև աշխարհը նոր ճանաչող մարդիկ են, ովքեր այնքան օրիգինալ տարբերակով են ճանաչում շրջապատը, որ ուզում ես պարզապես հիանալ իրենց աշխարհընկալմամբ»:

Առհասարակ, կանայք «ամենակարող» են, հասցնում են անել ամեն ինչ, սակայն Արևիկը վստահ է՝ այդ ունակությունը չպետք է չարաշահել. «հոգնած» մայրիկի արդյունավետությունն ավելի քիչ է:

«Կանայք «ամենակարող» են, բայց հոգնում են, ունենում պոռթկումներ: Շատ ընտանիքներում դա լուրջ թեմա է: Միգուցե մարդիկ շատ չեն ֆիքսվում, սակայն շատ հոգնած մայրը երբեք նույն հավեսով, ջերմությամբ չի զբաղվում տան գործերով, երեխայով, ինչպես ավել էներգիա ունեցողը: Ավաղ, ոչ միշտ է ստացվում կանոնակարգել գրաֆիկը, սակայն ընտանիքի համար անցկացվող ժամանակը պետք է լինի ամենակարևորը»,- ասաց նա ու հավելեց, որ որդու ծննդից հետո հասկացել է, որ փոփոխությունն իր կյանքում անհրաժեշտություն է:

«Հետ նայելով հասկանում եմ՝ ինչքան կարևոր բան եմ բաց թողել, որովհետև ինքնամոռաց աշխատում էի: Տղայիս ծննդից հետո հասկացա, որ չեմ ցանկանում այդքան ժամանակ հատկացնել աշխատանքին: Հասկացա, որ ուզում եմ ունենալ ազատություն, ժամանակ չծախսել երկար ժողովների, ինտրիգների համար: Բայց և չէի կարող չաշխատել: Այս առումով համացանցն ինձ տվեց լիարժեք հնարավորություն: Հիմա ունեմ ազատություն պլանավորելու իմ օրը»,- ասաց Արևիկը:

Հաղորդավարուհին ժամանակին մի քանի աշխատանք ուներ, որոնց թվում էր կազմակերպչական բնույթի գործը: Նա շեշտեց, որ ունի կազմակերպչական ջիղ ու հաճույքով է զբաղվում դրանով: Կյանքի այս փուլում մեկտեղել է կազմակերպչական և ստեղծագործական աշխատանքները, ինչը կրկնակի սիրով է անում. «Ես ունեմ շփվելու հավեսն ու ուժը, այն մարդկանցից չեմ, որոնք փակվում են տանը և օրերով միայն ստեղծագործում: Երկուսը մեկում ինձ համար իդեալական է»:

Միաժամանակ, նա շեշտեց, որ այսպիսի գրաֆիկը մեծ պատասխանատվություն է ենթադրում, որպեսզի անելիքները չմնան «հետո»-ին:

«Երբ ընդհանուր հոսքի մեջ չես, ամեն ինչ քեզ վրա է. պետք է ներքին շարժառիթ ունենաս, որպեսզի հետ չընկնես, ամեն ինչ ժամանակին անես: Ինձ մոտ ստացվում է: Առաջ ինձ թվում էր, որ ինձ համար կարևոր է հեռուստատեսությունը, հետո հասկացա, որ էականը վիդեոպրոդուկտ ստեղծելն ու այն մարդկանց հասցնելն է, իսկ ժամանակն իր հետ բերում է  նոր գործիքներ: Այսօր ամենաուժեղ գործիքը համացանցն է, որտեղ անմիջապես տեսնում ես նախագծիդ արդյունքը, լսարանի արձագանքը, հասկանում ճիշտն ու սխալը: Իրականում, համացանցում պրոդուկտ ստեղծելը շատ պատասխանատու է. պետք է լինել ճկուն և զգոն, բայց և չդավաճանել սկզբունքներին: Սա ինձ համար նոր աշխարհ է: Ես կարողանում եմ առանձնացնել կարևոր թեմաներ, դրանք ներկայացնել ինչպես ճիշտ եմ համարում՝ մնալով անդավաճան իմ սկզբունքներին՝ չվիրավորել որևէ մեկին, հաշվի առնել, որ լսարանը բազմազան է՝ նույն երևույթը կարող է տարբեր արձագանքներ ունենալ: Ես շատ փշոտ մարդ չեմ և չեմ սիրում այդպիսին լինել: Կարծում եմ՝ ցավոտ կետերի մասին կարելի է խոսել հումորով»,- ասաց նա ու հավելեց, որ աշխատանքի հիմնական ուղղությունն ինքն է տանում, թեև ունի օգնող թիմ:

Արևիկը չի բացառում, որ հետագայում կրկին կլինի հեռուստատեսությունում, բայց իր համար հստակ է՝ հեռուստատեսությունն ու համացանցն այլևս չեն կարող զուգահեռ չլինել: Չնայած նա շեշտեց, որ հեռուստատեսությունը շատ հոգեհարազատ է իրեն, կարոտել չի սիրում:

«Մարդիկ կան, որոնք շատ են սիրում կարոտել երեկվա երաժշտությունը, հին օրերը, այն, ինչ երեկ էր… ես ունենում եմ կարոտի պահեր, բայց բնավորության մի լավ գիծ ունեմ. շատերն ասում են՝ «լավ է այնտեղ, որտեղ մենք չկանք», սակայն ինձ համար լավ է այնտեղ, որտեղ մենք կանք»,- շեշտեց հաղորդավարուհին: