Արամ MP3-ի «Հերիք եղավ» տեսահոլովակի պրեմիերան, աղջիկներին ուղղված օրիգինալ շնորհավորանքն ու համերգային ծրագիրը

12:03 • 09.03.20

Շոուբիզնես

Արամ MP3-ն «վիտամինցի» ընկերների հետ կանանց տոնը շնորհավորեց տեսահոլովակի պրեմիերայով և համերգային փոքրիկ ծրագրով։ «Հերիք եղավ» երգի տեսահոլովակը հումորային է, սակայն տղաներն ամեն ինչ ասում ուանում են դեմքի լուրջ արտահայտությամբ։ Ինչպես գրեթե բոլոր իրավիճակներում, տղամարդիկ կարող են բողոքել, «սրտները թեթևացնել», բայց վերջում ամեն ինչ անել սիրելի կնոջ սիրտը գրավելու համար։

Tert.am Life-ն ավելի վաղ պատմել է տեսահոլովակի նկարահանման ընթացքի մասին, իսկ երեկ ներկա է եղել տեսահոլովակի շնորհանդեսին ու զրուցել Արամի հետ։

Տեսահոլովակում տղաները բառի բուն իմաստով ոչնչացնում են բոլոր այն նվերները, որոնք աղջիկներն ակնկալում են նրանցից։ Արամ MP3-ն վստահ է՝ աղջիկներն իրենցից չեն նեղանա, նախ՝ տեսահոլովակը հումորոային է, երկրորդ՝ տարատեսակ բողոքներից հետո վերջում հնչում է կախարդական արտահայտությունը՝ Արամը դուրս գալով նկարահանման հրապարակից՝ պատասխանում է կնոջ զանգին ու ասում՝ «կյանքս, նկարահանման եմ, ազատվեմ, զանգեմ, հա՞։ Սիրում եմ քեզ»։

Գերզբաղված գրաֆիկի պատճառով Արամը կնոջը՝ Աննային, հասցրել է միայն բանավոր շնորհավորել․ «Աննային իմ շնորհավորանքը բանավոր է եղել, որովհետև Մարտի 8-ին տուն եմ եկել լուսադեմին, երբ բոլորը քնած էին, դուրս եմ եկել, երբ էլի բոլորը քնած էին»։

Ինչ վերաբորում է աշխատանքին՝ նա ասաց. «Այս տեսահոլովակը տղաների խոսքն է այն աղջիկներին, որոնք «համը հանում են» ու ստիպում, որ ասենք՝ հերիք եղավ։ Տղաների պաշտպանության կոմիտեից ձայնն՝ որպես օգնություն այն տղամարդկանց, որոնք ընկնում են այս դաժան պատմությունների մեջ։ Սա իհարկե կատակ է, ուզում էինք ստանալ հետաքրքիր գործ՝ նվիրված աղջիկների մեկամսյակին։ Առանց գենդերային խտրականության՝ բոլորն էլ երգելու են այն, պարելու և ուրախանալու երգի ներքո։ Պրեմիերան ուզում էինք շուտ անել, որպեսզի գարնան մեկնարկը լինի լավ տրամադրությամբ»։

Երգի երաժշտությունը գրել է Արամը, խոսքերը՝ Ֆելիքս Խաչատրյանը, գործիքավորումն արել է Նիկ Էգիբյանը, տեսահոլովակի ռեժիսորն Արամայիս Հայրապետյանն է, օպերատորը՝ Արտյոմ Աբովյանը, իսկ տղաների ոճով զբաղվել է Դիանա Շատվերյանը:

Խոսելով շնորհանդեսի մասին՝ կատարողը նշեց․ «Քանի որ չէինք կարող ուղղակի հավաքվել ու ասել՝ դիտեք տեսահոլովակը, որոշեցինք տոնական օրը ավելի տոնական դարձնել՝ ներկայացնելով նաև համերգային ծրագիր։ Սովորաբար իմ տեսահոլովակի շնորհանդեսներին փորձում ենք նաև համերգային ծրագիր ներկայացնել։ Բացի այդ, երբ հանդիսատեսի հետտ երկար չենք հանդիպում, կարոտում ենք»։

Անդրադառնալով աշխատանքային նորություններին՝ Արամն ասաց, որ երկրպագուներին մեծ նորությամբ կուրախացնի աշնանը․ «Մեծ մենահամերգի հետ կապված մտքեր, գաղափարներ կան, մնում է՝ կարողանանք հասցնել իրագործել: Մոտ ժամանակներս կհասկանանք, թե ինչ է մեզ սպասվում աշնանը։ Ամեն դեպքում, ինչ էլ լինի, լինելու է աշնանը։ Ինչպես գիտեք՝ բոլոր ճտերին աշնանն են հաշվում»։