«Միգուցե կյանքում էլ եմ ուժեղ, հաստատ թույլ չեմ». Լիանա Վանոյանը՝ «Կինստագրամում» կրկին «ուժեղ աղջիկ» մարմնավորելու և նախորդ հերոսուհուն չկրկնելու մասին

Դերասանուհի Լիանա Վանոյանը հեռուստադիտողներին հայտնի է ինչպես Ինստագրամյան հումորային հոլովակներով, այնպես էլ «Ֆուլ Yere1» նախագծով: Շուտով նա հադես կգա պրոդյուսեր Արա Բաղդասարյանի և ռեժիսոր Հարութ Շատյանի «Կինստագրամ» նախագծում: Երկրորդ անգամ անընդմեջ Լիանային բաժին է հասել ուժեղ աղջկա կերպարը: Դերասանուհին ընդգծեց, որ ամեն ինչ արել են նախորդ հերոսուհուց տարբեր կերպար ստանալու համար:

Tert.am Life-ի հետ զրույցում Լիանան խոսել է նոր կերպարի ու կրկին ուժեղ հերուսուհի կերտելու մասին:  

«Հեռուստադիտողներն ինձ կտեսնեն շատ խառը աղջկա կերպարով: Իմ հերոսուհին մեքենաների հետ կապված բավականին տարօրինակ գործ է անում, փորձում է ամեն կերպ գումար վաստակել: Մասնագիտությամբ վարսահարդար, սակայն գործազուրկ եղբայր ունի, որին փորձում է ապահովել: Շատ դրական, զգացմունքային, հետաքրքիր կերպար է, որը բացասական գիծ չունի: Կերպարում ընգծված է շուտ նյարդայնանալու բնավորությունը,  երբ ինչ-որ բան այնպես չի լինում, նա միանգամից բարկանում է: Տեսակով շատ է տարբերվում եղբորից, բնությունը հետաքրքիր կատակ է արել. եղբայրը թույլ, փափուկ, աղջկական գծերով օժտված կերպար է, քուրը՝ ուժեղ և դիմացկուն»,-պատմեց Լիանան:

Նախորդ կերպարը կրկնելու անհանգստություն Լիանան չունի, քանի որ ռեժիսորի հետ երկար աշխատել են նոր հերուսուհուն կերտելու համար. «Երկրորդ անգամ հումորային ձևաչափով այլ հերոսուհի ներկայացնելն ու չկրկնվելն իսկապես կարևոր է: Փորձել ենք ազատվել սանրվածքից, ոճից ու մի շարք այլ դետալներից: Նախորդ հերոսուհուս նման լինելն ինձ միանշանակ խանգարելու էր: Հեռուստադիտողներն այսպիսի նմանություններ չեն տեսնի: Փորձել եմ զուգահեռներ չանցկացնել, որպեսզի առաջին հերթին ինձ չխանգարի: Միակ նմանությունը, կարծում եմ,  ուժեղ աղջիկ լինելն է:  Բացի այդ, սյուժեն ևս շատ տարբեր է: Չգիտեմ, գուցե մարդիկ փորձեն նմանություններ գտնել: Անկախ ամեն ինչից, սյուժեն ուրիշ է, հեռուստադիտողներն ընթացքում սկսելու են հերոսուհուս բոլորովին այլ կերպար ընկալել»:

Ռեժիսորներն ու նախագծերի հեղինակները երկրորդ անգամ են Լինային վստահում դիմացկուն, պինդ, ուժեղ աղջկա կերպար: Հարցին, թե իր կարծիքով ինչով է սա պայմանավորված, դերասանուհին պատասխանեց. «Հնարավոր է՝ ռեժիսորներն ինձ այդպիսին են պատկերացնում, նրանք ինձ տեսնում են նմանատիպ կերպարներում: Նախորդ կերպարս, գուցե տրամաբանական ավարտ չունեցավ, դեռ զարգացման տեղ ուներ: Կարող է դա հաշվի առնելով՝ երկրորդ անգամ էլ ինձ ընտրեցին նմանատիպ կերպարի համար: Իրականում դժվարանում եմ պատասխանել: Միգուցե կյանքում էլ եմ ուժեղ, հաստատ թույլ չեմ: Իհարկե, կյանքում անհամեմատ ավելի կանացի եմ ու իրականում շատ աղջկական եմ ,-ասաց դերասանուհին ու ծիծաղելով հավելեց,- անկեղծ, չգիտեմ ինչու է այդպես ստացվում կերպարների առումով»:  

Լիանան նկատեց, որ երկրորդ նախագիծն անընդմեջ բախտ է վիճակվում համագործակցել ոչ կոնֆլիկտային անձնակազմի հետ: Նրա խոսքով՝ նկարահանումներն ընթանում են ջերմ ու դրական միջավայրում:

«Ռեժիսորին ու իր օգնականին կառանձնացնեմ,  քանի որ պարզ բացատրում են դերասանի աշխատանքը, այնպիսի խնդիր չեն տալիս, որից քեզ վատ կզգաս: Աշխատանքային ընթացքը շատ հաճելի է անցնում, լարվածություն չկա, անգամ, չեմ հասկանում, թե ինչպես կարելի է լարված լինել: Մեզնից ամեն մեկը զբաղվում է իր աշխատանքով, մարդիկ պրոֆեսիոնալ են ու ամեն ինչ շատ լավ է»,-ասաց Լիանան:

Դերասանուհու խոսքով՝  իր ակտիվությունն Ինստագրամում օգնող հանգամանք դարձավ առաջին դերը ստանալիս: «Ինստագրամն առաջին անգամ էր այցեքարտ: Ես ունեմ դերասանուհու մասնագիտություն, որը շատ եմ սիրում, անընդհատ աշխատում եմ: Հումորից զատ ինձ համար մի ուրիշ  աշխարհ կա՝ թատրոնը: Հիմա փորձում եմ ամեն ինչ անել, որպեսզի կարողանամ դա համատեղել հեռուստատեսային աշխատանքի հետ: Բնականաբար, մի քանի թատերախմբերից առաջարկներ ունեմ»,- նշեց Լիանան:

Լիանան ինքն իրեն բազմաժանր դերասանուհի է համարում: Այն, որ երկու նախագիծ հաջորդաբար հումորային է ստացվել, չի նշանակում, որ իրեն այլ ձևաչափում հնարավոր չէ տեսնել. «Չեմ սիրում շրջանակների մեջ ապրել: Ժանրային սահմանափակումներ չունեմ: Այնպես էլ չի, որ հստակ գծագրել եմ՝ այսօր հումորային կերպար կխաղամ, վաղը՝ դրամատիկ: Հույս ունեմ, որ այս նախագիծը դերակատարում կունենա, հաջորդիվ ինձ մի լավ կերպար կառաջարկեն: Հատուկ ամբիցիաներ չունեմ, կա նախագիծ, ուրեմն ես պետք է հնարավորինս պրոֆեսիոնալ ու լավ աշխատեմ այդ նախագծում: Երբ հումորային մի քանի նախագիծ է լինում, ամեն նոր հերոսիդ հետ փորձում էս կրկնակի աշխատել, որպեսզի լղոզված չստացվի, չնույնացնեն նախորդի հետ»: