«Հիմա քրիստոնյա զինվորի հայր եմ». Անդրանիկ Հարությունյանի որդու 1-ամյակի և մկրտության խնջույքը, փոքրիկի ամենամեծ նվերն ու հայտնի հյուրերը

Դերասան Անդրանիկ Հարությունյանը երեկ տոնել է որդու առաջին տարեդարձը, ինչի առթիվ փոքրիկին մկրտել են Սուրբ Սարգիս եկեղեցում: Մկրտության արարողությանը հաջորդել է դերասանի ընկերների և հայտնի հյուրերի մասնակցությամբ մեծ խնջույքը, որին ներկա է գտնվել նաև Tert.am Life-ը:

Մեզ հետ զրույցում Անդոն նշեց, որ սա լավագույն նվերն է, որը ծնողները կարող են մատուցել իրենց փոքրիկին՝ չնայած Գրիշան ընտանիքի միակ արու զավակն է ու նրան, այսպես, թե այնպես,  բոլորը երես են տալիս բազմաթիվ նվերներով:

«Ես հիմա քրիստոնյա զինվորի հայր եմ, ինչն ամենամեծ հպարտությունն է: Իր համար շատ բան ենք անում, սակայն մկրտությունը կարևորագույն նվերն էր այս մեկ տարվա ընթացքում: Հետագայում տեսանյութերով և լուսանկարներով կտեսնի, թե ծնողներն իր համար ինչ են արել»,-ասաց դերասանը:

Ընտանեկան խնջույքին ներկա էին նրանց ընկերներն և գործընկերները: Անդոյի առաջնեկի՝ 7-ամյա Էլենի կնքահայրը երգահան Ռիչարդ Մադլենյանն է, իսկ որդու կնքահոր պարտականությունները դերասանը վստահել է իր մտերիմ ընկերոջը՝ Արտյոմ Աբրահամյանին: Հարցին՝ ինչու նույն կնքահորը չեն ընտրել, դերասանը պատասխանեց. «Որոշեցինք չհետևել պապենական ավանդույթներին, երբ ընտանիքի բոլոր առիթների համար մեկ կնքահայր են ընտրում: Կարծում եմ՝ ճիշտ է, երբ յուրաքանչյուրն իր կնքահայրն ունի: Եղբայրս այդ ավանդույթը պահում է, իր երեխաների կնքահայրը մեր ընտանիքի բոլոր առիթների նույն կնքայարն է: Ես որոշեցի խախտել այդ ավանդույթը: Մեր հարսանիքի կնքահայրը դերասան, սցենարիստ Արմեն Վարդանյանն է, դստերս կնքայարը՝ Ռիչարդ Մադլենյանը, տղայիս կնքնահայրն էլ Արտյոմն է»:

Ըստ դերասանի՝ Արտյոմը բոլորից անհանգիստն ու լարվածն է եղել, քանի որ մեծ պատասխանատվությամբ է ստանձնել այդ պարտականությունը. «Մոտ 3 տարի է՝ ընկերություն ենք անում Արտյոմի հետ: Նա մեծ պատասխանատվությամբ և ուրախությամբ ընդունեց իմ առաջարկը՝ դառնալ որդուս կնքահայրը: Այս ընթացքում նա ավելի շատ էր լարվում, թե ինչ է կլինի, ինչպես է անցնելու, ինչ ենք անելու, քան ես: Փառք Աստծո, ամեն ինչ հրաշալի անցավ, հատկապես, որ դա հայերիս կյանքում շատ կարևոր իրադարձություն է: Ե՛վ միջոցառումը, և՛ մկրտության արարողությունը հաջող իրականացնելուց հետո հանգիստ շունչ քաշեցինք»:

Դերասանը նշեց, որ կցանկանար որդին էլ զգար այն հետաքրքրությունն ու կարևորությունը, որն ուներ օրվա խորհուրդը, սակայն Գրիշան դեռ փոքր է նման միջոցառումների համար:

Անդոն ասաց, որ չնայած փոքր տարիքին՝ որդին բավականին աշխույժ ու հետաքրքիր երեխա է. «Գրիշան առավոտյան արթնանում է ու միանգամից սկսում իրեն ահավոր պահել: Ամեն ինչ թափում է, աղմկում, եթե նա արթուն է, բոլորը պետք է զգոն լինեն: Առաջինն իր անվտանգության համար ենք մտածում, որովհետև շատ ակտիվ է, բոլորիս ուշադրության կենտրոնում է: Գրիշան իմ ու եղբորս ընտանիքի միակ արու զավակն է: Շատ էինք սպասել նրա ծնունդին: Փորձում ենք թույլ տալ այն ամենը, ինչ ուզում է անել: Տղա երեխա է, մի քիչ երես ենք տալիս»:   

Դերասանի խոսքով՝ դուստրը շատ հասուն վերաբերմունք է ցուցաբերում. ոչ միայն չի նեղսրտում եղբոր հանդեպ եղած մեծ ուշադրությունից, այլև ինքն էլ է նրան յուրահատուկ սիրով և հոգատարությամբ վերաբերվում:

«Էլենս եղբոր հանդեպ անչափ ուշադիր է: Երբ մայրս կամ կինս զբաղված են, նա է կերակրում, խնամում, պահում եղբորը: Սա, կարծում եմ, շատ կարևոր հատկանիշ է նրանց հարաբերություններում: Դուստրս կարող է իր խաղը կամ այդ տարիքի երեխայի համար կարևոր մի բան թողնել ու եղբորով զբաղվել»,-ասաց Անդոն:

Լուսանկարները՝ Էլեն Գասպարյանի